Romanos
4 Chhayna kaqtinqa, ¿imanisunmantaq ñaupa taytanchis Abrahanmantari? 2 Imakuna ruwasqanraykuchus Abrahán chanin runa nisqa kanman karqan chayqa, atinmanmi karqan alabakuyta, ichaqa manan Diospa ñaupanpiqa alabakuyta atinmanchu karqan. 3 ¿Imanishanmi paymanta Diospa simin qelqapi? “Abrahanqa Jehová* Diospi iñisqanraykun chaninpaq jap’isqa karqan”+ nispan nishan. 4 Llank’aqman pago qosqaqa manan juj regalochu ¿riki? Aswanpas chayqa llank’asqanmanta imachus payman qona kaqllan. 5 Mana llank’aq runachus, juchasapata chaninpaq qhawariq Diospi iñinman chayqa, iñisqanraykun chaninpaq jap’isqa kanqa.+ 6 Juj runa manaña kamachikuy simiq nisqanman jinapunichu kausanman chaypas, Diosqa chaninpaqmi payta qhawarinman, chhaynapitaq chay runaqa ancha kusisqa kanman. Chaymantan Davidpas nirqan: 7 “Kusisqan kanku mana allin ruwasqankumanta perdonasqa kaqkunaqa, juchankupas pampachasqaña kaqkunaqa; 8 may kusisqan Jehová* Diospa perdonasqan runaqa”,+ nispa.
9 Chay kusikuyqa, ¿qhari kayninku qaracha kuchuchikuqkunallapaqchu, icha mana kuchuchikuqkunapaqwanchu?+ Nimusqay jina, “Abrahanqa iñisqanraykun chaninpaq jap’isqa karqan”.+ 10 Ichaqa, ¿imayna kashaspataq Abrahanri chaninpaq jap’isqa karqan? ¿Qhari kaynin qaracha kuchusqa kashaqtinñachu, icha manaraq kuchusqa kashaqtinchu? Qhari kaynin qaracha manaraq kuchusqa kashaqtinmi payqa chaninpaq jap’isqa karqan. 11 Chaymantañan Diosqa payta nirqan qhari kaynin qarachata kuchuchikunanpaq, chay kuchuchikusqanmi juj señal karqan,+ chay señalmi rikuchirqan manaraq qhari kaynin qaracha kuchusqa kashaqtin iñisqanrayku Diosqa chaninpaq payta jap’isqanta. Chhaynapin Abrahanqa iñisqankurayku llapa chaninpaq jap’isqa kaqkunaq taytan kapurqan,+ manaña qhari kayninku qaracha kuchusqachu karqanku chaypas. 12 Payqa qhari kayninku qaracha kuchusqa kaqkunaqpas taytallantaqmi. Paykunaqa qhari kayninku qaracha kuchusqa kasqankumantapas, imaynan Abrahanqa+ manaraq qhari kaynin qaracha kuchusqa kashaqtin iñirqan chhayna iñiqllataqmi kanku.
13 Jinaspapas Diosqa Abrahanman mirayninmanwanmi prometerqan kay pachata herenciata jina chaskinanpaq, chaytaqa manan kamachikuy simiraykuchu prometerqan,+ aswanpas iñiynin jawa chaninpaq jap’isqa kasqanraykun.+ 14 Ichaqa kamachikuy simita kasukuqkunallachus chay herenciata chaskinkuman chayqa, manachá valenmanchu iñiyniyoq kayqa, chay promesapas yanqan kanman. 15 Kamachikuy simiqa Diospa k’araq phiñakuynintan apamun,+ ichaqa maypichus kamachikuy simi mana kanchu chayqa, manallataqmi juchallikuypas kanchu.+
16 Abrahanqa iñisqanraykun Diospa promesanta chaskirqan, chaywanmi Diosqa ancha sumaq sonqo kayninta rikuchirqan.+ Chhaynapin Abrahanpa llapa mirayninpas chay promesata chaskirqan.+ Chay promesaqa manan kamachikuy simiman k’askakuqkunallapaqchu, Abrahán jina iñiyniyoq kaqkunapaqwanmi. Payqa llapanchispa taytanchismi.+ 17 (Qelqasqan kashan: “Askha nacionkunaq taytan kanaykipaqmi churayki”,+ nisqa). Chayqa Diospa ñaupanpin ruwakurqan. Abrahanqa paypin iñirqan; paymi wañusqakunatapas kausarichiqqa, manaraq junt’akuq kaqkunamantapas junt’akunmanñapas jinata rimaqqa.* 18 Abrahanqa iñiywanmi suyakurqan askha nacionkunaq taytan kananta, mana atikuq jinaña chay karqan chaypas. Payqa chaypi iñirqan “askhallañan mirayniykiqa kanqa”+ nisqa promesaman jinan. 19 Payqa manaña iñiyninpi pisiyarqanchu chaypas, pachaj watayoq jinaña+ kasqanraykun wañusqata jina cuerponta qhawarikurqan, yacharqantaqmi Sarapas manaña wawayoq kay atinanta.+ 20 Diospa promesanraykun ichaqa manapuni iñiyninpi pisiyarqanchu, aswanmi astawan kallpachakurqan, chhaynapin Diosta jatuncharqan; 21 tukuy sonqowantaqmi confiarqan Diosqa imachus prometesqanta junt’ananpaq atiyniyoq kasqanpi.+ 22 Chaymi “payqa chaninpaq jap’isqa karqan”.+
23 Chay “chaninpaq jap’isqa karqan” niq simiqa manan payraykullachu qelqakurqan,+ 24 aswanpas noqanchisrayku iman qelqasqa karqan; noqanchisqa Señorninchis Jesusta kausarichimpuqpi iñisqanchisraykun chanin kananchispaq ajllasqa kanchis.+ 25 Payqa juchanchiskuna jawan wañunanpaq entregasqa karqan,+ ichaqa chaninpaq jap’isqa kananchispaqmi kausarichisqa* karqan.+