Lucas

4 Chaymantataq Jesusqa santo espirituwan* junt’a kaspa Jordán mayumanta ripurqan, espiritutaq ch’inneqpi kashaqtin kayman jaqayman purichirqan+ 2 tawa chunka p’unchay, chaypin Saqraqa tentarqan.+ Chay p’unchaykunapiqa manan imatapas Jesusqa mijurqanchu, chaymi yarqasqa kasharqan. 3 Jinan Saqraqa nirqan: “Diospa churinchus kanki chayqa, kay rumita niy t’antaman tukunanpaq”, nispa. 4 Jesustaq nirqan: “Qelqasqan kashan: Manan t’antallawanchu runaqa kausanqa”,+ nispa.

5 Jinan Saqraqa juj orqoman Jesusta aparqan, chaypin juj ratullapi kay pachapi llapa nacionkunata qhawarichirqan,+ 6 jinaspa Jesusta nirqan: “Qanmanmi qopusayki llapa kay nacionkunata qhapaq kayninkunatawan, noqamanmi qosqa karqan llapa kaykunaqa,+ chaymi noqaqa pichus munasqayman qoyta atiyman. 7 Chayrayku, sichus juj kutillata adorawanki chayqa, llapa kaykunan qanpaq kapunqa”, nispa. 8 Jinan Jesusqa nirqan: “Qelqasqan kashan: Jehová* Diosniykitan adoranki, pay sapallantataqmi servinkipas”,+ nispa.

9 Chaymantataq Saqraqa Jerusalenman Jesusta aparqan, jinaspa templopi aswan alto perqapi sayaykachispa nirqan: “Diospa churinchus kanki chayqa, kaymanta saltaykuy,+ 10 qelqasqan kashan: Paymi angelninkunata kachamusunki cuidanasuykikupaq, 11 jinan paykuna makinkupi apasunkiku, mana ima rumiwanpas chakiykita takakunaykipaq”,+ nispa. 12 Jesustaq nirqan: “Qelqasqan kashan: Aman Jehová* Diosniykita pruebaman churankichu”,+ nispa. 13 Jinan Saqraqa tentayta tukuspa ripurqan jayk’aqchus allin kanman wajmanta tentananpaq chaykama.+

14 Jesustaq santo espirituwan junt’a kaspa Galileaman+ kutipurqan. Chaypi kaq llapa jawa llaqtachakunapin paymanta allin willakuykuna mast’arikurqan. 15 Jesusqa paykunaq sinagogankunapin* yachachiyta qallarirqan, llapa runakunataq paymanta allinta rimarqanku.

16 Chaymantataq Jesusqa wiñasqan Nazaret+ llaqtaman rirqan, samana p’unchay* kaqtintaq imaynachus ruwallaqpuni jinata sinagogaman jaykurqan,+ jinaspa sayarirqan Diospa simin qelqata leenanpaq. 17 Jinan paymanqa jaywarqanku profeta Isaiaspa qelqasqan k’uyuta, paytaq chayta mast’arirqan, maskhaspataq tarirqan: 18 “Jehová* Diospa espiritunmi noqapi kashan, paymi ajllawan wajchakunaman allin willakuykunata willanaypaq. Paymi kachamuwan kacharichisqa kanankumanta wisq’asqa kaqkunaman willanaypaq, ñausakunamanpas qhawarinankumanta willanaypaq; sarunchasqakunata libranaypaq,+ 19 Jehová* Diospa chaskinan watamanta willanaypaqwan”,+ nispa qelqasqata. 20 Chay qelqata k’uyupuspataq waqaychaqman qopuspa tiyaykurqan, sinagogapi llapa kaqkunataq mana chinkachispa payta qhawasharqanku. 21 Jinan Jesusqa paykunata nirqan: “Kunan p’unchaymi kay leesqay qelqa junt’akun”,+ nispa.

22 Llapankun paymanta allinta rimasharqanku, admirasqataq kasharqanku ancha sumaq simikuna rimasqanmanta.+ Ichaqa ninakusharqankun: “¿Manachu kayqa Josepa churin kashan?+ ¿Imaynapitaq chhaynatari rimanman?”, nispa. 23 Jesustaq paykunata nirqan: “Rimaypi nisqankuman jinachá: Doctor, qan kikiykita jampikuy, niwankichis. Niwallankichistaqchá: Capernaún+ llaqtapi imaymana ruwasqaykitan uyariyku, ruwallaytaqyá chaykunata kay llaqtaykipipas, nispaykichis”, nispa. 24 Nillarqantaqmi: “Cheqaqtan niykichis: Manan mayqen profetapas kikin llaqtanpiqa allin chaskisqachu.+ 25 Cheqaqtapunin nillaykichistaq: Eliaspa tiemponpiqa askhan viudakuna Israel llaqtapi karqan. Chay tiempopin kinsa wata soqta killayoqta mana paramurqanchu chaymi jinantinpi yarqay karqan.+ 26 Chaywanpas Eliasqa manan chay viudakunamanta mayqenmanchu kachasqa karqan, aswanpas Sidonpi kaq Sarepta llaqtapi tiyaq viudallamanmi.+ 27 Profeta Eliseoq tiemponpipas askhan lepra* onqoyniyoq runakunaqa Israelpi karqan, chaywanpas manan mayqenninkupas qhaliyachisqachu karqanku, aswanpas Siria llaqtayoq Naamanllan qhaliyachisqa karqan”,+ nispa. 28 Chayta uyarispankun sinagogapi llapa kaqkunaqa sinchita phiñakurqanku,+ 29 jinan sayarispanku usqhaylla llaqtamanta orqorqanku, jinaspa llaqta jatarichisqanku orqopi sayaq qhata patakama aparqanku chaymanta qaqapachinankupaq. 30 Jesusmi ichaqa paykunaq chaupinta lloqsispa ripurqan.+

31 Jinaspan Galileapi kaq Capernaún llaqtaman uraykurqan, chaypitaq samana p’unchaykunapi runakunaman yachachirqan,+ 32 paykunataq anchata admirakurqanku imayna yachachisqanmanta;+ Jesusqa Diospa nisqanman jinapunin yachachiq.* 33 Sinagogapin kasharqan millay espirituq junt’aykusqan runa, paymi fuerteta qaparirqan:+ 34 “¡Yau, Nazaret llaqtayoq Jesús!+ ¿Iman noqaykuwan ruwanayki? ¿Wañuchiwaqniykuchu jamushanki? Allintan yachani pichus kasqaykita, qanqa Diospa ch’uya Churinmi kanki”,+ nispa. 35 Jesustaq payta phiñarikurqan: “Upallay, lloqsiy paymanta”, nispa. Jinan chay espirituqa runakuna chaupiman wijch’urparispa mana k’irispalla paymanta lloqsirqan. 36 Chaywanmi llapallanku anchata admirakuspa paykunapura ninakurqanku: “¿Ima rimaytaq kayri? Atiywanmi millay espiritukunatapas kamachin, paykunataq kasukuspa runakunamanta lloqsinku”, nispa. 37 Jinan paymanta willakuykunaqa muyuriqninpi lliu llaqtakunaman mast’arikurqan.

38 Sinagogamanta lloqsispataq Jesusqa Simonpa* wasinman jaykurqan. Chaypin Simonpa suegranqa sinchi fiebre onqoywan ñak’arisharqan, jinan payta valekurqanku yanapananpaq.+ 39 Jesustaq payman qayllaykuspa fiebrenmanta qhaliyachirqan. Jinan chay warmiqa kaq ratu jatarispa paykunata atienderqan.

40 Inti jaykupushaqtintaq runakunaqa wasinkupi kaq onqosqakunata Jesusman pusamurqanku, ima onqoyniyoqña karqanku chaypas. Paytaq sapankaman makinta churaykuspa qhaliyachirqan.+ 41 Askha runakunamantataqmi supaykunapas qaparispa lloqsirqanku: “Qanqa Diospa Churinmi kanki”,+ nispa. Jesustaq ichaqa phiñarikuspa supaykunata mana rimarichiqchu+ pay Cristo kasqanta yachasqankurayku.+

42 Qhepantin p’unchaytaq Jesusqa lloqsispa ch’in ladoman rirqan.+ Runakunataq payta maskhayta qallarirqanku, maypichus kasqanman chayaspankutaq valekurqanku ama ripunanpaq. 43 Jesusmi ichaqa paykunata nirqan: “Juj llaqtakunapipas willamunaymi Diospa gobiernonmanta allin willakuykunataqa, chaypaqmi Diosqa kachamuwarqan”,+ nispa. 44 Chaymi payqa Judeapi kaq sinagogakunapi allin willakuykunata willaspa purirqan.