Deuteronomio
12 ”Ñaupa taytaykichiskunaq Diosnin Jehová Diospa qonan jallp’apiqa, jap’ikapunaykichis jallp’apiqa, kay kamachikuykunata leykunatawanmi sapa p’unchay makilla kasukunkichis. 2 Chay nacionkunaman jaykuspaqa, chaypi tiyaq runakuna maykunapichus diosninkuta yupaychaqku chaykunataqa llapantan ñut’unkichis.+ Orqo patakunapiña, moqo patakunapiña, jatun sach’a k’uchukunapiña kanqa chaypas chinkachinkichismi. 3 Altarninkutapas thuninkichismi, yupaychana sayashaq ruminkunatapas ñut’unkichismi,+ yupaychana sayashaq k’ullunkunatapas* kanapunkichismi, thupasqa idolonkunatapas ñut’unkichismi,+ chhaynapin chay idolokunaq sutinqa chinkachisqa kapunqa.+
4 ”Jehová Diosniykichistaqa aman imaynatachus chay runakuna diosninkuta yupaychanku chhaynatachu yupaychankichis.+ 5 Aswanpas maytachá Jehová Diosniykichis ajllakunqa yupaychasqa kananpaq, aylluykichiskuna ukhupi maypichá sutinta churanqa chaypin yupaychankichis.+ 6 Chaymanmi apankichis ruphachina ofrendaykichista,+ sacrificioykichista, diezmoykichista,+ promesa ruwasqa ofrendaykichista, tukuy sonqo qonaykichis ofrendaykichista,+ waj ofrendaykichiskunata,+ ñaupaq wachay wakaykichiskunata, ñaupaq wachay ovejaykichiskunatapas.+ 7 Chaypin Jehová Diosniykichispa ñaupanpi qankunapas wasiykichispi kaqkunapas mijunkichis.+ Jehová Diosniykichis bendicionninta churamusqanwanmi ima llank’asqaykichispas allin kanqa, chaywanmi kusisqa kankichis.+
8 ”Chayman jaykuspaqa aman kaypi ruwasqanchista jinachu imatapas ruwankichis. Kaypiqa sapankanchismi imatachus allinpaq qhawarinchis chayta ruwashanchis, 9 ichaqa Jehová Diospa herencia qonan jallp’aman jaykunaykichiskamalla, samanaykichis jallp’aman+ jaykunaykichiskamallan chayqa kanqa. 10 Jordán mayuta chimpaspa Jehová Diospa qonan jallp’api tiyapuqtiykichisqa,+ llapa enemigoykichiskunamantan payqa samachisunkichis, chhaynapin mana imata manchakuspa thaj kausankichis.+ 11 Llapa imachus kamachisqaytan apankichis maytachá Jehová Diosniykichis ajllakunqa sutin jatunchasqa kananpaq chayman.+ Chaymanmi apankichis ruphachina ofrendaykichista, sacrificioykichista, diezmoykichista,+ waj ofrendaykichiskunata, Jehová Diosman prometesqaykichis ofrendaykichiskunatapas. 12 Jinan qankunaqa Jehová Diosniykichispa ñaupanpi kusikunkichis+ churiykichiskunawan, ususiykichiskunawan, qhari kamachiykichiskunawan, warmi kamachiykichiskunawan, llaqtaykichispi Leví runakunawan ima. Leví runakunaqa manan ima herenciatapas qankuna ukhupiqa chaskirqankuchu.+ 13 Diosmanqa aman comuntachu maypipas ruphachina ofrendakunataqa jaywankichis.+ 14 Mayneqtachá Jehová Diosniykichis ajllakunqa, jujnin aylluykichispi mayqen partetachá ajllakunqa chayllapin ruphachina ofrendaykichiskunataqa jaywankichis, chaypin kay kamachisqaykunataqa ruwankichis.+
15 ”Aychata munankichis chayqa, ñak’awaqchismi uywaykichiskunata aychata mijunaykichispaq,+ atiwaqchismi Jehová Diosniykichis bendicionta qosqasuykichisman jina mayqen llaqtaykichispipas chayta mijuyta. Chaytaqa mijunmanmi ch’uya kashaq runapas qhelli kashaq runapas. Atiwaqchismi imaynan tarukatapas gacela tarukatapas mijunkichis chhaynata mijuyta. 16 Ichaqa aman yawartaqa mijunkichischu,+ pampamanmi chaytaqa unuta jina jich’apunkichis.+ 17 Aman llaqtaykichispiqa mijunkichischu trigoykichismanta* chunka kaq parteta, ni mosoq vinoykichismanta, aceiteykichismanta chunka kaq partetapas. Amallataqmi mijunkichischu ñaupaq wachay wakaykichiskunatapas, ñaupaq wachay ovejaykichiskunatapas,+ promesa ruwasqaykichis ofrendatapas, tukuy sonqomanta qosqaykichis ofrendatapas, ni ima ofrendaykichistapas. 18 Chaykunataqa Jehová Diosniykichispa ñaupanpin mijunkichis. Maytachá Jehová Diosniykichis ajllakunqa chaypin mijunkichis+ churiykichiskunawan, ususiykichiskunawan, qhari kamachiykichiskunawan, warmi kamachiykichiskunawan, llaqtaykipi tiyaq Leví runakunawan ima. Jehová Diosniykichispa ñaupanpin kusikunkichis llapa imachus ruwasqaykichismanta. 19 Chay jallp’api tiyashaspaqa amapunin qonqankichischu Leví runakunataqa.+
20 ”Jehová Diosniykichismi prometesqanman jina+ jallp’aykichista jatunyachinqa,+ chaypichus ninkichis: Aychatan mijuyta munashani, nispa chayqa, mijullankichismi jayk’a kutitapas.+ 21 Jehová Diosniykichispa sutin jatunchasqa kananpaq ajllakusqan llaqta qankunamanta karupi kanqa chayqa,+ Jehová Diospa qosqasuykichis uywaykichistan ñak’akunkichis jinaspa chayta mijunkichis, wakapas kachun ovejapas kachun kamachisqayman jinan chaytaqa mijunkichis. Munasqaykichis ratun chaytaqa llaqtaykichispi mijunkichis. 22 Imaynan tarukatapas gacela tarukatapas mijunkichis chhaynatan mijunkichis.+ Chaytaqa mijunmanmi ch’uya kashaq runapas qhelli kashaq runapas. 23 Ichaqa amapunin yawartaqa mijunkichischu,+ yawarpin kausayqa* kashan.+ Aman aychata kausaytawanqa* mijunkichischu. 24 Amapunin chaytaqa mijunkichischu. Yawartaqa unuta jinan pampaman jich’apunkichis.+ 25 Aman yawartaqa mijunkichischu, chhaynapin qankunapas wawaykichiskunapas allillan kankichis. Jehová Diospa ñaupanpi allin kaqta ruwasqaykichisraykun allillan kankichis. 26 Maytachus Jehová Dios ajllakunqa chayman rispaqa ch’uya ofrendaykichiskunata promesa ruwasqaykichis ofrendakunata imallan chaymanqa apankichis. 27 Chaypin ruphachina ofrendaykichiskunata jaywankichis. Aychata yawartawanmi Jehová Diospa altarninman apankichis.+ Sacrificio jaywasqaykichis uywakunaq yawarninqa Jehová Diosniykichispa altarninpa chakinmanmi jich’asqa kanqa,+ aychatan ichaqa mijunkichis.
28 ”Tukuy kay kamachisqaykunatan allinta junt’ankichis, chhaynapin qankunapas wawaykichiskunapas allillan kankichis. Jehová Diospa ñaupanpi allin kaqta chanin kaqta ruwasqaykichisraykun allillan kankichis.
29 ”Jehová Diosniykichis llapa chay nacionkunata ñaupaykichismanta chinkachiqtintaq,+ chay jallp’api tiyashaspaykichistaq, 30 chay nacionkuna manaña kaqtintaq niwaqchis: ¿Imaynatataq chay nacionkunari diosninkunata servinkuman karqan? Noqapas chhaynatan ruwayta munayman,+ nispa. 31 Aman Jehová Diosniykichistaqa chhaynataqa ruwankichischu. Chay runakunaqa Jehová Diosniykichispa cheqnisqan ruwaykunatan diosninkunapaqqa ruwashanku. Paykunaqa churinkuta ususinkuta imaraqmi chay yanqa dioskunapaq ruphachishanku.+ 32 Kay kamachisqayman jinapunin tukuy imatapas ruwankichis.+ Aman chaymanqa imatapas yapankichischu ni qechunkichispaschu.+