Zacarías

5 Jujmanta qhawarispan rikullarqanitaq juj qelqa k’uyu phalashaqta. 2 Angeltaq tapuwarqan: “¿Imatan rikushanki?”, nispa.

Noqataq nirqani: “Isqon metro largoyoq, tawa metro kuskan anchoyoq* qelqa k’uyutan phalashaqta rikushani”, nispa.

3 Jinan payqa niwarqan: “Suwakuqkunaqa+ manan kay qelqa k’uyuq juj lado uyanpi ñakayman jina castigasqachu kanku. Llullakuspa juraqkunapas+ manan kay qelqa k’uyuq juj kaq uyanpi ñakayman jina castigasqachu kanku, chayraykun kay ñakaykunaqa pachantinman mast’arikushan. 4 Ejercitokunata kamachiq Jehová Diosmi nin: Noqan chay ñakaykunataqa chayachimuni. Suwa runaq wasinmanmi, llullakuspa sutiypi juraqpa wasinmanmi jaykunqa, lliutan k’aspinkunatapas ruminkunatapas ch’usaqyachinqa, nispa”.

5 Jinan noqawan rimashaq angelqa asuykamuwaspa niwarqan: “Ama jinachu kay wichayta qhawariy, imachus rijurimushan chayta qhawariy”, nispa.

6 Noqataq nirqani: “¿Imataq chayri?”, nispa.

Paytaq niwarqan: “Chay rijurimushaqqa efá tupunan”,* nispa. Paymi niwallarqantaq: “Chhaynan millay runakunaqa pachantinpi kashanku”, nispa. 7 Qhawashallaqtiymi chay tupunaq plomomanta* tapanqa orqosqa karqan, chay ukhupitaq juj warmi tiyashasqa. 8 Jinan angelqa niwarqan: “Kay warmiqa Mana Allin Kaymi”, nispa. Jinaspan tupuna ukhuman jujmanta tanqaykuspa llasa plomo tapanawan qaqata taparqan.

9 Chaymantataq altota qhawarispa rikurqani wayraq apamusqan iskay warmikuna phalamushaqta. Chay warmikunaq rafranqa cigüeñaq rafran jinan kasqa, paykunan chay tupunata altoman oqarispa apapurqanku. 10 Jinan noqawan rimashaq angelta tapurqani: “¿Maymantaq chay tupunatari apashanku?”, nispa.

11 Paytaq niwarqan: “Sinar* jallp’amanmi+ apashanku, chaypin chay warmipaq wasita ruwanqaku, ruwayta tukuspataq chay wasipi maychus kananpi churanqaku”, nispa.