Éxodo
13 Jehová Diosmi Moisesta nillarqantaq: 2 “Israel runakunaq llapa phiwi* qhari wawankunata noqapaq t’aqapuway.* Noqaqmi phiwi qhari wawakunapas, uywakunaq ñaupaq wachaynin orqo uywakunapas”,+ nispa.
3 Jinan Moisesqa Israel runakunata nirqan: “Kay p’unchaytaqa aman jayk’aqpas qonqankichischu. Kay p’unchaymi Jehová Diosqa jatun atiywan orqoshasunkichis Egiptopi esclavo kasqaykichismanta.+ Aman mijunkichischu imatapas levadurayoqtaqa. 4 Kunan p’unchaymi qankuna kay abib killapi,* lloqsishankichis.+ 5 Jehová Diosmi ñaupa taytaykichiskunaman jurarqan Canaán runakunaq, Het runakunaq, amorreo runakunaq, heveo runakunaq, Jebús runakunaq jallp’anta qankunaman qonasuykichispaq,+ maypichus lechepas mielpas askha kan chayta qonasuykichispaq.+ Chay jallp’aman jaykuchisuqtiykichispas ruwashallankichismi chay fiestataqa. Kunan jina killapitaqmi chaytaqa ruwankichis. 6 Qanchis p’unchaymi mana levadurayoq t’antata mijunkichis.+ Qanchis kaq p’unchaytaq Jehová Diospaq fiestata ruwankichis. 7 Chay qanchisnintin p’unchaymi mana levadurayoq t’antata mijunkichis.+ Chay p’unchaykunaqa amapunin imatapas levadurayoqtaqa jap’inkichischu.+ Llaqtaykichispiqa manapunin kanqachu poqosqa masaqa. 8 Chay p’unchaymi wawaykichiskunata ninkichis: Kaytaqa ruwashani imaynatachus Jehová Dios Egiptomanta orqomuwarqan chayta yuyarinaypaqmi,+ nispa. 9 Kay fiestan qankunapaq kanqa makiykichispi señal jina, mat’iykichispi yuyarichiq marca jina.+ Chhaynapin Jehová Diospa kamachikuynin simiykichispi kanqa. Manataqmi qonqankichischu Jehová Dios jatun atiywan Egiptomanta orqomusqasuykichistapas. 10 Sapa watanmi kay kamachikuyman jina chay fiestata ruwankichis, jayk’aqchus ruwakunanman jina.+
11 ”Jehová Diosqa chayachisunkichismi qankunaman ñaupa taytaykichiskunamanwan prometesqan Canaán jallp’aman, chayman chayaspaykichismi+ 12 Jehová Diospaq t’aqankichis phiwi qhari wawakunata, uywakunaq ñaupaq wachaynin orqo uywakunatawan. Llapa chaykunaqa Jehová Diospan.+ 13 Ñaupaq wachay asnokunataqa ovejawanmi cambiankichis, chaymi libranapaq pago kanqa. Manachus chay pagota qonkichis chayqa, kunkanta p’akispan wañuchinkichis. Phiwi wawaykichiskunata libranaykichispaqpas pagankichismi.+
14 ”Jamuq tiempopi wawaykichiskuna tapusunkichis: ¿Imapaqtaq kaytari ruwankichis?, nispa chayqa, ninkichismi: Jehová Diosmi atiyninwan libramuwarqanku Egiptopi esclavo kashaqtiyku.+ 15 Faraonqa* sonqonta k’ulluyachispan mana lloqsimunaykuta munasharqanchu,+ chaymi Jehová Diosqa llapa Egipto runakunaq phiwi wawankunata, uywakunaq ñaupaq wachayninkunatawan wañuchirqan.+ Chaymi uywakunaq ñaupaq wachaynin orqo uywakunataqa Jehová Diosman sacrificiopi jaywayku. Phiwi wawaykumantapas preciota pagayku libranaykupaq, nispaykichis. 16 Chaymi makiykichispi señal jina kanqa, mat’iykichispi watasqa cinta jina.+ Chhaynapin mana qonqankichischu Jehová Diosqa jatun atiyninwan Egiptomanta orqomuwasqanchista”, nispa.
17 Faraón Israel runakunata kacharipuqtinqa manan Diosqa Filistea runakunaq llaqtanman rina ñannintachu Israel runakunata pusarqan, cercaña chayninta kashaqtinpas. Payqa nirqanmi: “Paqtapas guerrapi rikukuspa manaña ripuyta munankumanchu, jinaspa Egiptoman kutipunkuman”, nispa. 18 Chaymi Diosqa Israel runakunata pusarqan Puka lamar-qocha ch’in ladoman.+ Israel runakunaqa guerraman riq soldadokuna jinan ordenpi Egiptomanta lloqsimurqanku. 19 Moisesqa Josepa tullunkunatawanmi apapurqan, paymi Israel runakunata jurachisqa: “Diosqa orqosunkichispunin kaymantaqa, ripuspaykichisqa tulluykunatawanmi apankichis”,+ nispa. 20 Israel runakunaqa Sucojmanta lloqsispan ch’inneqwan tupay Ezanpi karpakurqanku.
21 Jehová Diosqa Israel runakunaq ñaupantan risharqan paykunata pusananpaq. P’unchaymi sayaq phuyupi riq,+ tutataq paykunata k’anchaspa sayaq ninapi riq, chhaynapi Israel runakuna tutapas p’unchaypas purinankupaq.+ 22 Chay sayaq phuyuqa sapa p’unchaymi paykunawan kashaq, ninapas sapa tutanmi paykunallawan kashaq.+