Éxodo
10 Jehová Diosmi Moisesta nirqan: “Faraonpa* ñaupanman riy, paypa sonqonpas serviqninkunaq sonqonpas rumiyapunmi,+ jinallatan chaytaqa saqesaq chhaynapi imaymana señalkunata payman rikuchinaypaq.+ 2 Egipto runakunata imaynatachus castigasqayta, imaymana milagrokuna ruwasqaytawanmi wawaykikunaman nietoykikunamanwan willanki.+ Qankunaqa allintan yachankichis noqaqa Jehová Dios kasqayta”, nispa.
3 Jinan Moiseswan Aaronwanqa faraonpa ñaupanman rispa nirqanku: “Hebreo runakunaq Diosnin Jehová Diosmi nin: ¿Jayk’aqkaman mana kasuwankichu?+ Llaqtayta kachariy adorawananpaq. 4 Manachus llaqtayta kacharinki chayqa, paqarinmi langostakunata* llaqtaykiman chayachimusaq. 5 Chay langostakunan lliuman junt’aykunqa, manan jallp’aqa rikukunqapaschu. Llapantan chijchiq puchuntapas campopi wiñaq sach’akunatapas mijupunqa.+ 6 Wasiykiman, kamachiykikunaq wasinman, llapa Egipto runakunaq wasinman iman langostakunaqa junt’aykunqa. Manan chhayna pasaqtaqa ñaupa taytaykikunaqa jayk’aqpas rikurqankuchu, manan kay llaqtapi tiyasqankumantapachapas chayqa pasarqanchu”,+ nispa. Chayta nispan payqa faraonpa ñaupanmanta lloqsimpurqan.
7 Chaykunata uyarispan faraonpa kamachinkunaqa payta nirqanku: “¿Jayk’aqkamataq kay runari chhaynata amenazaspa jamuwasun? Kacharipuy chay Israel runakunata Diosninku Jehovata adoramunankupaq. ¿Manachu reparanki yaqaña Egipto chinkapushasqanta?”, nispa. 8 Jinan Moisesta Aarontawan wajmanta faraonpa ñaupanman pusamurqanku. Chaypin faraonqa paykunata nirqan: “Riychis Jehová Diosniykichista adoraq. Ichaqa, ¿pikunan rinqaku?”, nispa. 9 Moisestaq nirqan: “Jehová Diospaqtaq fiestata ruwamusaqku chayqa,+ llapaykun risaqku wayna-sipaskunantin, kuraq runakunantin, churikunantin, ususikunantin, ovejakunantin, wakakunantin ima”,+ nispa. 10 Jinan faraonqa nirqan: “¡Manan wawaykichiskunatawanqa kachaykichismanchu! Kachaykichisman chayqa, Jehová Diosmi noqaykuwan kashan niwaqchischá.+ Ima mana allintachá qankunaqa ruwayta munashankichis. 11 ¡Manan llapaykichischu rinkichis! Qharikunallan risaqku nirqankichismá riki. ¡Chhaynaqa qharikunallan Jehovata adoraqqa rinkichis!”, nispa. Jinamantaq Moisesta Aarontawan faraonpa ñaupanmanta qarqomurqanku.
12 Jehová Diosmi Moisesta nirqan: “Egipto ladoman makiykita jaywariy langostakuna jamunanpaq. Chay langostakunan llapa plantakunata chijchiq puchusqankunatawan lliuta mijupunqa”, nispa. 13 Kaq ratun Moisesqa varanta jaywarirqan Egipto jallp’a ladoman. Jinan Jehová Diosqa inti lloqsimuy ladomanta Egiptoman wayrachimurqan p’unchay ch’isiyaqta llapa tutantintawan. Qhepantin p’unchaytaq chay wayraqa langostakunata apamurqan. 14 Chay langostakunaqa sinchi askhapunin karqanku, lliu Egiptomanmi junt’aykurqanku, llapa k’uchunkunamanraqmi chayarqanku.+ Manan jayk’aqpas chhaynaqa pasarqanchu,+ manataqmi jayk’aqpas jujmantaqa pasananchu karqan. 15 Lliu Egiptotan langostakunaqa p’ampaykurqanku, chaywanmi Egiptoqa tutayarqanraq. Tukuy imaymana plantakunata, chijchiq puchusqan llapa rurukunata iman lliuta tukupurqanku. Manañan ima sach’apas ni ima plantapas Egiptopiqa karqanñachu.
16 Faraonqa apurayllan Moisesta Aarontawan wajachimurqan, jinaspa nirqan: “Diosniykichis Jehová contra, qankuna contra iman juchallikuni. 17 Kay kutitawan juchayta perdonaykuwaychis. Diosniykichis Jehovata valekapuwaychis kay sinchi castigota noqamanta karunchananpaq”, nispa. 18 Chaymi Moisesqa faraonpa ñaupanmanta lloqsimuspa Jehová Diosmanta mañakurqan.+ 19 Jinan Jehová Diosqa langostakunata apamuq wayrata kutichirqan, chay wayratan inti jaykuy ladomanta fuerteta wayrachirqan. Chay wayran llapa langostakunata apapurqan, jinaspa Puka lamar-qochaman apaykurqan. Manan juj langostapas Egiptopiqa qheparqanchu. 20 Ichaqa jujmantan faraonqa sonqonta rumiyachirqan, chaymi Israel runakunata mana kacharirqanchu. Jehová Diosqa manan jark’arqanchu faraonpa sonqon rumiyananta.+
21 Chaymantan Jehová Diosqa Moisesta nirqan: “Makiykita wichayman jaywariy lliu Egiptota laqhayaykunanpaq.* Arí, llapa Egipton sinchi laqhallaña kanqa”, nispa. 22 Jinan Moisesqa makinta wichayman jaywarirqan, chayllamanmi lliu Egipto laqhayapurqan. Kinsa p’unchaymi laqhayaq karqan.+ 23 Egipto runakunaqa manan rikunakurqankupaschu, kinsa p’unchaymi maypichus kasqankumanta mana kuyurirqankuchu. Israel runakunaq tiyasqanpin ichaqa normal-lla k’anchay karqan.+ 24 Jinan faraonqa Moisesta wajachimuspa nirqan: “Riychis Jehovata adoraq,+ wawaykichiskunatapas pusaychis. Wakaykichista ovejaykichiskunatawanmi ichaqa kayllapi saqenkichis”, nispa. 25 Moisesmi ichaqa nirqan: “Qan kikiykin uywakunatapas qowankiku Jehová Diosniykuman sacrificiokunata, ruphachina ofrendakunatawan jaywamunaykupaq.+ 26 Apasaqkupunin uywaykutaqa, manan jujpas kaypiqa qhepanqachu. Chay uywakunamanta wakintan Jehová Diosniykuman jaywasaqku. Ichaqa manan yachaykuraqchu mayqen uywakunatachus Jehová Diosman jaywasaqku chaytaqa, jaqayman chayaspañachá yachasaqku”, nispa. 27 Faraonmi ichaqa jujmanta sonqonta rumiyachirqan, chaymi manapuni munarqanchu Israel runakuna kachariyta.+ Jehová Diosqa manan jark’arqanchu faraonpa sonqon rumiyananta. 28 Faraonmi Moisesta nirqan: “¡Lloqsiy kaymanta! Aman jayk’aqpas jamuwankichu, jamuruwanki chayqa wañunkin”, nispa. 29 Jinan Moisesqa nirqan: “Nisqaykiman jinan kanqa, manañan jayk’aqpas jamusaqchu”, nispa.