Lucas
14 Juj kutinmi Jesusqa samana p’unchaypi* fariseokunamanta jujnin umalliq wasinman jaykurqan mijuq, wasipi kaqkunataq mana chinkachispa payta qhawasharqanku. 2 Juj punkillisqa runataq paypa ñaupanpi kasharqan. 3 Jinan Jesusqa kamachikuy simita allin yachaqkunata fariseokunatawan tapurqan: “¿Allinchu kanman samana p’unchaypi pitapas qhaliyachiy icha manachu?”,+ nispa. 4 Paykunataq ch’inlla karqanku. Jinan payqa onqosqa runata llamiykuspa qhaliyachirqan, jinaspa kachapurqan. 5 Chaymantan Jesusqa paykunata tapullarqantaq: “¿Mayqenniykichistaq samana p’unchaypi wawaykichis otaq toroykichis pozoman urmaykuqtin+ mana kaq ratuchu orqowaqchis?”,+ nispa. 6 Paykunataq mana imaniytapas atirqankuchu.
7 Invitasqa runakuna ñaupaq tiyanakunata ajllakusqankuta+ rikuspataq Jesusqa llapankuman juj willakuyta* willarqan: 8 “Pipas casarakuy fiestaman invitasunki chayqa, ama ñaupaq kaq tiyanapiqa tiyankichu,+ paqtapas invitaqniyki qanmanta aswan allinpaq jap’isqa runata invitallanmantaq karqan, 9 jinaspa nisunkiman: Kay runaman qoy chay tiyanata, nispa; qantaq p’enqasqa riwaq qhepa tiyanaman. 10 Aswanpas pipas invitasunki chayqa, qhepa tiyanapi tiyaykuy, chhaynapin invitaqniyki runa jamuspa nisunki: Amigolláy, kay ñaupaqman jamuy, nispa. Chhaynapitaq llapa invitasqakunaq ñaupanpi allin qhawarisqa kanki.+ 11 Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”,+ nispa.
12 Chaykunata nispan invitaqnintapas Jesusqa nillarqantaq: “Almuerzotapas cenatapas wayk’uchispaqa aman amigoykikunata, wayqeykikunata, parienteykikunata ni qhapaq llaqtamasiykikunatachu wajanki; yaqapaschá paykunaqa jayk’aqllapas wajarisunkikuman, chhaynapitaq invitasqaykimanta pagapushasunkikuman. 13 Aswanpas jatun mijuyta wayk’uchispaqa invitamuy wajchakunata, ñuk’ukunata, such’ukunata, wist’ukunata, ñausakunatawan,+ 14 paykunaqa manan imankuwanpas pagapuyta atisunkikumanchu, chaymi kusisqa kanki. Chay ruwasqaykimantaqa chanin runakunaq kausarimpunan tiempopiñan+ pagasqa kanki”, nispa.
15 Chaykunata uyarispan jujnin invitasqa runa payta nirqan: “Kusisqan Diospa gobiernonpi mijuq* runaqa”, nispa.
16 Jinan Jesusqa payta nirqan: “Juj runan jatun cenata wayk’uchirqan+ askha invitasqan runakunapaq. 17 Cenay horastataq invitasqan runakunaman kamachinta kacharqan: Jamuychis, ñan tukuy imapas listoña kashan, nispa nimunanpaq. 18 Invitasqakunan ichaqa sapankanku “manan jamuyta atiymanchu” nirqanku.+ Jujninmi nirqan: Chajratan rantirukuni, chayta qhawaqmi rinay kashan; disculpaykuway, manan jamuyta atiruymanchu, nispa. 19 Jujnintaq nirqan: Pisqa masa torokunatan rantirukuni, chaykunaq imayna llank’asqanta qhawaqmi rinay kashan; manan jamuyta atiruymanchu,+ nispa. 20 Juj kaqtaq nirqan: Kunallanmi casararukuni, chaymi mana jamuyta atiymanchu, nispa. 21 Jinan kamachiqa patronninman kutimuspa llapa chaykunata willarqan. Chaywanmi patronqa sinchita phiñakurqan, jinaspa kamachinta nirqan: Usqhaylla riy llaqtapi jatun callekunata juch’uy callekunatawan, jinaspa pusamuy wajchakunata, ñuk’ukunata, such’ukunata, ñausakunata, wist’ukunatawan, nispa. 22 Jinan kamachiqa patronninpa nisqanman jina ruwarqan, kutimuspataq nirqan: Patrón, kamachiwasqaykiman jinan ruwaramuni, chaywanpas kashanraqmi campoqa, nispa. 23 Chaymi patronqa kamachinta nirqan: Riy jatun ñankunata k’ijllu ñankunatawan, jinaspa llapa tarisqayki runakunata pusamunkipuni, chhaynapi wasiy junt’a kananpaq.+ 24 Noqan qankunata niykichis: Chay invitasqa runakunamantaqa manapunin mayqenpas wayk’uchisqay cenataqa malliykullanqapaschu”,+ nispa.
25 Ancha askha runakunan Jesuswan risharqanku, Jesustaq paykunaman kutirispa nirqan: 26 “Pipas noqaman jamuqqa cheqnikunanmi* taytanta, mamanta, esposanta, wawankunata, wayqenkunata, panankunata, pay kikintawanpas,*+ mana chayqa manan atinmanchu discipuloy kayta.+ 27 Pipas discipuloy kayta munaqqa ñak’arina k’aspinta* apariykuspa qhepayta jamuchun, mana chayqa manan atinmanchu discipuloy kayta.+ 28 Pipas juj torreta sayarichiyta munaqqa, ¿manachu tiyaykuspa ñaupaqtaraq qolqenta tanteakun torreta tukunanpaq aypanqachus manachus chayta? 29 Mana chayqa cimentacionta churaykuspallapaschá sayarapunman, manataq tukuyta atinmanchu, llapa chayta rikuqkunataq payta asipayankuman: 30 Kay runaqa torre perqaytan qallarin, manataq tukuyta atinchu, nispa. 31 Juj reypas juj reywan guerraman rinan kashaqtinqa, ¿manachu ñaupaqtaraq tiyaykuspa yuyaychaqninkunata tapurikun atinmanchus chunka waranqa soldadokunallawan iskay chunka waranqa soldadokuna atipayta icha manachus chayta? 32 Manachus atinman chayqa, contranpi jamuq rey karupiraq kashaqtinmi payqa juj comisionta kachanman allipunakapunankupaq. 33 Chayraykun niykichis: Mayqenniykichispas kaqninkunata mana saqeqqa manan atinmanchu discipuloy kaytaqa.+
34 ”Kachiqa ancha allinpunin; kachitaqchus q’aymayapunman chayqa, ¿imaynatan wajmanta kachiman tukunman?+ 35 Manan valenmanñachu ni jallp’apaqpas ni wanupaqpas, aswanpas jawaman jich’anallapaqñan. Uyarinanpaq ninriyoqqa uyarichun”,+ nispa.