Hechos
22 “Wayqeykuna, taytakuna, uyariychis imatachus nisaykichis chayta”,+ nispa. 2 Hebreo rimaypi rimashasqanta uyarispankun paykunaqa astawanraq ch’innirqanku, jinan Pabloqa nirqan: 3 “Noqaqa judion kani,+ Ciliciapi kaq Tarso llaqtamanta,+ ichaqa kay llaqtapin kikin Gamalielpa+ yachachisqan karqani, ñaupa taytanchiskunaq chaskisqan kamachikuy simimantapas allintan yachachiwarqanku;+ noqapas qankuna jinan tukuy sonqowan Diosta serviq karqani.+ 4 Noqaqa Señorpa Ñanninpi kaqkunatan mayta qatikachaspa wañuchinankupaq entregaq kani, qharitapas warmitapas watasqata apamuspan carcelman wisq’achiq kani,+ 5 chay ruwasqaytaqa yachankun uma sacerdotepas llapa umalliq runakunapas.* Paykunamantan cartatapas mañakurqani Damasco llaqtapi wayqenchiskunapaq, jinaspa rirqani chay llaqtapi kaqkunata Jerusalén llaqtaman watasqata apamunaypaq, chhaynapi castigasqa kanankupaq.
6 ”Damasco llaqtaman chayanaypaq kashaqtiyñan ichaqa chaupi p’unchayta jina qonqaylla cielomanta juj k’anchay sinchita k’ancharimuwarqan,+ 7 jinan noqaqa pampaman wijch’ukuspay juj kunkata uyarini: Saulo, Saulo, ¿imanaqtinmi qatikachashawanki?, nispa nimuqta. 8 Jinan noqaqa nini: ¿Pin kanki, Señor?, nispa. Chaymi chay kunkaqa nimuwan: Noqaqa Nazaret llaqtayoq Jesusmi kani, noqatan qatikachashawanki, nispa. 9 Noqawan rishaq qharikunapas rikunkun chay k’anchaytaqa, ichaqa manan imatapas entiendenkuchu rimapayamuwaqniy kunkaq nimusqantaqa. 10 Jinan noqaqa nini: ¿Señor, imatataq ruwasaqri?, nispa. Jinan Señorqa nimuwan: Sayarispa Damasco llaqtaman riy, chaypiñan nisayki lliu imatachus ruwanaykita,+ nispa. 11 Chay k’anchay sinchita k’anchaykamuwasqanraykun noqaqa manaña imatapas rikurqanichu, chaymi noqawan kashaq qharikunaqa makiymanta pusaspa Damasco llaqtaman apawarqanku.
12 ”Chay llaqtapin kasqa kamachikuy simiq nisqanman jina kausaq Dios sonqo Ananías sutiyoq runa, chay llaqtapi tiyaq lliu judiokunan paymantaqa allinta rimaq kasqaku. 13 Paymi noqawan tupaq jamusqa, jinan ladoypi sayaykuspa niwan: ¡Wayqéy Saulo, wajmanta qhawaripuy!, nispa. Chaymi kaq ratu qhawarispa paytaqa rikuruni.+ 14 Chaymantan payqa niwallantaq: Ñaupa taytanchiskunaq Diosninmi ajllasunki munayninta yachanaykipaq, pichus chanin kaqta rikunaykipaq+ paypa kunkanta uyarinaykipaqwan. 15 Qanqa paymanta imachus uyarisqaykita rikusqaykitawanmi llapa runakunaman willamunki.+ 16 Chayrayku, usqhaylla sayariy, jinaspa bautizakuy, paypa sutinta wajakuqtiykin Diosqa juchaykikunamanta perdonasunki,+ nispa.
17 ”Jerusalén llaqtaman kutimuspaymi+ noqaqa templopi Diosmanta mañakusharqani, chayllamanmi juj rijuriypi 18 Jesusta rikullanitaq, chay kutipin payqa niwan: Usqhaylla Jerusalén llaqtamanta lloqsiy, manan kaypiqa uyarinqakuchu noqamanta willasqaykitaqa,+ nispa. 19 Jinan noqaqa nini: Señor, paykunaqa allintamá yachashanku riki imaynatachus noqaqa qanpi iñiqkunata carcelman wisq’achiq kani, sinagogakunapipas waqtachiq kani chaytaqa;+ 20 qanmanta willaq Estebanta wañuchishaqtinkupas noqaqa chaypin sayasharqani chay ruwasqankuta allinpaq qhawarispa, wañuchiqninkunaq jawa p’achankuta qhawaspa ima,+ nispa. 21 Paymi ichaqa nimuwan: Phaway riy, noqaqa karu nacionkunamanmi kachasayki,+ nispa”.
22 Chaykamallan Pabloq rimasqantaqa uyarirqanku. Chaymantataq fuerteta qaparirqanku: “¡Wañuchiychis chay runata, payqa manan kausananchu!”, nispanku. 23 Chhayna qaparisqankuta, jawa p’achankutapas wijch’usqankuta, jallp’atapas jach’isqankuta+ rikuspan 24 ejercitopi comandanteqa kamachikurqan soldadokunaq cuartelnin ukhuman Pablota apaykunankupaq, jinallataq imaraykuchus runakuna paypa contranpi chhaynata qaparisqankumanta soq’ashaspalla tapunankupaqwan. 25 Soq’anankupaq wataruqtinkun Pabloqa chaypi sayashaq capitanta nirqan: “¿Allinchu qankunapaq Roma llaqtayoq runata manaraq juzgashaspa soq’ay?”,+ nispa. 26 Chayta uyarispan capitanqa ejercitopi comandanteman rispa nirqan: “¿Kunanri imanankitaq? Chay runaqa Roma llaqtayoqmi kasqa”, nispa. 27 Jinan comandanteqa Pabloq kasqanman rispa nirqan: “¿Cheqachu Roma llaqtayoq kanki?”, nispa. Pablotaq “arí” nirqan. 28 Chaymi comandanteqa payta nirqan: “Noqaqa askha qolqetan pagarqani Roma llaqtayoq kanaypaq”, nispa. Pablotaq payta nirqan: “Noqan ichaqa Roma llaqtayoqña nacerqani”,+ nispa.
29 Jinan soq’ashaspalla tapunankupaq kamachisqa runakunaqa kaq ratu paypa ladonmanta ripurqanku. Ejercitopi comandantepas mancharisqan kasharqan Roma llaqtayoq runata cadenakunawan watasqanmanta.+
30 Qhepantin p’unchaytaq imamantapunichus judiokuna juchachasqanta yachayta munaspa Pablota paskachipurqan, jinaspa kamachikurqan umalli sacerdotekuna Jatun Juntapi* llapa kaqkunapiwan juñunakunankupaq. Chaymantataq Pablota uraykachimuspa paykunaq juñunakusqanman aparqan, jinaspa chaupinkupi sayaykachirqan.+