2 Crónicas
12 Rehoboammi aswan atiyniyoqman tukupurqan kamachikuyninpas allin tajyasqan kapurqan,+ chay qhepallamanmi ichaqa Jehová Diospa kamachikuyninkunata saqepurqan,+ Israel runakunapas kaqtan ruwallarqankutaq. 2 Chhaynapin paykunaqa Jehová Dios contra juchallikurqanku. Chaymi pisqa wataña Rehoboam kamachikushaqtin Egipto rey Sisacqa+ Jerusalén llaqta contra maqanakuq jamurqan. 3 Sisacqa Egiptomantan jamurqan waranqa iskay pachaj carretakunantin, caballopi sillasqa soqta chunka waranqa soldadokunantin, jinallataq mana yupay atiy soldadokunantin; chay soldadokunan karqanku Libia soldadokuna, sukiyin soldadokuna, Etiopía soldadokunapiwan.+ 4 Judá aylluman chayaspataq Sisacqa allin perqasqa llaqtakunata atipaspa jap’ikapurqan, chaymantataq Jerusalén llaqtaman chayarqan.
5 Rehoboamtaq Judá ayllupi umallikunapiwan Jerusalén llaqtapi juñukurqanku Sisacta manchakuspa, jinan profeta Semayaqa+ paykunaq kasqanman chayaspa nirqan: “Jehová Diosmi kayta nisunkichis: Qankunaqa noqatan saqerpariwankichis, chaymi noqapas Sisacpa makinman qankunata entregasaykichis,+ nispa”. 6 Chayta uyarispan reypas Israelpi umallikunapas juch’uyaykukuspa+ nirqanku: “Jehová Diosqa chaninpunin”, nispa. 7 Chhayna juch’uyaykukusqankutan Jehová Diosqa rikurqan, jinan Jehová Diosqa profeta Semayata nirqan: “Juch’uyaykukusqankuraykun paykunataqa manaña ch’usaqyachisaqchu,+ aswanpas yanapasaqmi. Paykunapaqqa manan k’araqtañachu phiñakusaq, chaymi Sisacqa mana Jerusalén llaqtata chinkachinqachu. 8 Chaywanpas paykunaq kamachinmi kapunqaku, chhaynapin paykunaqa yachanqaku imas aswan allin kasqanta: Noqata serviychu icha juj reykunata serviychu”, nispa.
9 Chaymantataq Egipto rey Sisacqa Jerusalén llaqta contra maqanakuq jamurqan. Jinaspa Jehová Diospa wasinmantapas reypa wasinmantapas* llapa valorniyoq cosaskunata apapurqan.+ Apapullarqantaqmi Salomonpa ruwasqan qorimanta jark’apakuna escudokunatapas.+ 10 Chay escudokunaq rantinpin rey Rehoboamqa cobremanta escudokunata ruwachirqan, chay escudokunata cuidanankupaqtaq encargarqan reypa wasinpi kaq soldadokunaq umallinkunaman, chay soldadokunaqa reypa wasintan cuidaqku. 11 Sapa kutin Jehová Diospa wasinman rey jamuqtinmi soldadokunaqa chay escudokunantin jamuqku, chaymantataq kaqta kutichipuqku soldadokunaq kasqan cuartoman. 12 Rey Rehoboam juch’uyaykukusqanrayku, Judá ayllupi wakin runakuna allinta ruwasqankuraykun+ Jehová Diospa phiñakuyninqa thanipurqan,+ chaymi manaña paykunata ch’usaqyachirqanchu.+
13 Rehoboamqa aswan atiyniyoqmi kapurqan, chaymi Jerusalén llaqtapi kamachikushallarqan. Payqa tawa chunka jujniyoq watanpi kashaspan kamachikuyta qallarirqan, chunka qanchisniyoq watataqmi Jerusalenmanta kamachikurqan. Chay llaqtatan Jehová Diosqa llapa ayllukunamanta ajllakurqan sutinta jatunchananpaq. Rehoboampa mamanmi karqan Namá, payqa Anmón jallp’amantan karqan.+ 14 Rehoboamqa manan tukuy sonqowanchu Jehová Diospa yanapayninta maskharqan,+ chaymi payqa mana allinkunata ruwarqan.
15 Rehoboampa wakin ruwasqankunaqa lliumi qelqasqa kashan profeta Semayaq qelqasqankunapi,+ Diospa rikuchisqanta willaq Idopa qelqasqankunapipas,+ chay qelqakunan willarqan runakunaq mirayninmanta. Rehoboamwan Jeroboanwanqa tukuy tiempon guerrallapi kasharqanku.+ 16 Chaymantataq Rehoboamqa ñaupa taytankuna jina wañukapurqan, jinaspa ñaupa taytankunawan kuskata Davidpa Llaqtan nisqapi p’ampapurqanku.+ Rehoboampa wañupusqan qhepamantaq churin Abías+ rey kapurqan.