Job
13 ”Arí, ñawiywanpunin llapa chaykunataqa rikuni,
ninriypas uyarinmi chaykunataqa, chaymi yachani chhaynapuni kasqanta.
2 Qankunaq yachasqaykichistaqa noqapas yachanin,
noqapas qankuna jinan kani.
3 Noqaqa tukuy atiyniyoq Dioswanmi rimayta munani,
Diospa ñaupanpin defiendekuyta munani.+
4 Qankunan ichaqa mana allinta qhawarichishawankichis,
qankunaqa mana valeq doctorkunan kankichis.+
5 Ch’inlla kawaqchis chayqa allinchá kanman,
yachayniyoq kasqaykichistachá rikuchiwaqchis.+
6 Ama jinachu kaychis, uyariwaychis rimasqayta,
makilla uyariychis simiypa rimasqanta.
7 ¿Imaraykun Diospa sutinpi mana chaninta rimankichis?
¿Imaraykun Diospa sutinpi llullakuspa rimankichis?
8 ¿Diospa ladonmantachu kunanqa kashankichis?
¿Cheqaq Diostachu defiendeyta munashankichis?
9 Sonqoykichista Dios t’aqwiqtin, ¿tarinmanchu allinkunata?+
¿Runata jinachu Diosta engañawaqchis?
10 Pakallapiña pimanpas sayapakuwaqchis chaypas,+
Diosqa anyasunkichismanmi chaykunamanta.
11 Ancha jatun kasqanta reparaspan mancharikuwaqchis,
manchakuymantan khatatatawaqchis.*
12 Yachaysapa jina rimasqaykichisqa uspha jinan,
defiendekunaykichispaq rimasqaykichisqa jark’apakuna t’uru escudo jinan.
13 Ch’inlla kaychis, noqañataq rimasaq.
¡Imapas pasawachun, noqaqa rimasaqmi!
14 ¿Imaraykutaq noqari wañuy pataman churakuni?
¿Imaraykun vidayta wañuyman jaywashani?
15 Dios wañuchiwanmanña chaypas payllatan suyakusaq,+
paypa ñaupanpin defiendekusaq.
17 Makilla uyariychis rimasqayta,
allinta uyariychis imachus nisqayta.
18 Ñan yuyaykuniña imayna rimanayta,
noqaqa allintan yachani mana juchayoq kasqayta.
19 ¿Pin kunan noqawan rimanqa?
¡Wañupuymanchá mana imatapas rimaspaqa!
20 Diosníy, kay iskaykunallatan mañakuyki,*
chhaynapin mana qanmanta pakakusaqchu:
21 Amaña khaynata ñak’arichiwaychu,
amaña khaynata manchachiwaychu.+
22 Diosníy, rimarimuy, noqataq kutichimusayki;
mana jinataq noqa rimarimusaq, qantaq kutichimuwanki.
23 ¿Iman juchay? ¿Imapin pantarqani?
Juchay kan chayqa sut’ita reparachiway,
pantarqani chayqa niway.
24 ¿Imaraykun uyaykitapas manaña kutirimuwankichu?+
¿Imaraykun enemigoykita jina rikuwanki?+
25 Noqaqa wayraq apasqan raphi jinallan kani, ¿imaraykun qatikachawanki?
Noqaqa ch’aki pasto jinallan kani, ¿imaraykun manchachiwanki?
26 Imaymanamantan juchachashawanki,
wayna kashaspay juchallikusqaykunamantaraqmi ñak’arichishawanki.
27 Chakiytapas cepopin* jap’ichinki,
qhawamushallankin ima ruwasqaytapas,
sarusqaytapas mana chinkachispan qhawashallanki.
28 Runaqa ismusqa jinan khakurikapun,
thutaq tukusqan p’acha jinan ñut’urikapun.