Deuteronomio

14 ”Qankunaqa Jehová Diosniykichispa wawankunan kankichis. Aman pipas wañuqtinqa cuerpoykichista kuchukunkichischu,+ aman cejasniykichistapas* k’isukunkichischu.+ 2 Qankunaqa Jehová Diosniykichispa ch’uya llaqtanmi kankichis.+ Kay pachapi llapa llaqtakuna ukhumantan Jehová Diosqa qankunata ajllakurqasunkichis llaqtan kanaykichispaq, munakusqan llaqta kanaykichispaq.+

3 ”Aman mijunkichischu Diospa millakusqan kaqkunataqa.+ 4 Kay animalkunallatan mijunkichis:+ torota, ovejata, cabrata, 5 tarukata, gacela tarukata, corzo tarukata, antílope tarukata, monte cabrata, purun ovejata, orqokunapi tiyaq salqa ovejata ima. 6 Chhayna p’alqa phapatuyoq khastuq* animalkunataqa mijullawaqchismi. 7 Ichaqa aman wakin animalkunataqa mijunkichischu khastuqña kanman chaypas, p’alqa phapatuyoqña kanman chaypas. Chaykunan kaykuna: camello, liebre qowi,* damán qowi ima. Chaykunaqa khastuqña kanku chaypas, manan p’alqa phapatuyoqchu kanku, chaymi qhelli qankunapaqqa kanqa.+ 8 Aman khuchitapas mijunkichischu, khuchiqa p’alqa phapatuyoqña chaypas manan khastunchu. Chayqa qhellin qankunapaqqa kanqa. Aman chay animalkunataqa mijunkichischu, aman wañusqatapas tupaykunkichischu.

9 ”Lamar-qochapipas, mayukunapipas, may unupipas tiyaq challwakunamantaqa pharpayoq sarphayoq* kaqkunallatan mijunkichis.+ 10 Ichaqa aman mijunkichischu mana pharpayoq mana sarphayoq challwataqa. Chaykunaqa qhellin qankunapaqqa kanqa.

11 ”Phalaq animalkunamanta ch’uya kaqkunataqa mijullawaqchismi. 12 Kaykunatan ichaqa ama mijunkichischu: ankata, qocha ankata, suwiq’arata,*+ 13 puka wamanta,* yana wamanta, ni ima clase wamantapas. 14 Amallataqmi mijunkichischu ima clase cuervotapas,* 15 avestruztapas, jukutapas,* qellwatapas, ima clase k’illichutapas, 16 juch’uy jukutapas, ninriyoq jukutapas, cisnetapas, 17 pelicanotapas, condortapas, qocha cuervotapas, 18 cigüeñatapas, ima clase mayu sunsutapas, abubillatapas, ni masutapas.* 19 Aman mijunkichischu askhanpi puriq rafrayoq kurukunatapas, chaykunaqa qhellin qankunapaqqa kanqa. 20 Mayqen phalaq animaltapas phalaq kurukunatapas ch’uya kaqtinqa mijullankichismi.

21 ”Aman ima wañusqa animaltapas mijunkichischu.+ Munaspaqa llaqtaykichispi tiyaq waj llaqtayoq runamanmi chaytaqa qopunkichis, payqa atinmanmi chaykuna mijuyta. Munaspaqa vendewaqchismi waj llaqtayoq runamanpas. Qankunan ichaqa ama mijunkichischu, qankunaqa Jehová Diospa ch’uya llaqtanmi kankichis.

”Aman uña cabrataqa mamanpa lechenpi t’impuchinkichischu.+

22 ”Sapa watanmi chajraykichispa rurusqanmanta chunka kaq parteta t’aqankichis.+ 23 Maytachá Jehová Diosniykichis ajllakunqa sutin jatunchasqa kananpaq chaypin paypa ñaupanpi mijunkichis+ trigoykichismanta, mosoq vinoykichismanta, aceiteykichismanta t’aqasqaykichis chunka kaq parteta. Chaypin mijullankichistaq ñaupaq wachay wakaykichistapas ñaupaq wachay ovejaykichistapas. Chayta ruwaspan yachankichis tukuy tiempo Jehová Diosniykichis manchakuyta.+

24 ”Jehová Diosniykichis sutin jatunchasqa kananpaq ajllakusqan llaqta+ tiyasqaykichis llaqtamanta karupi kanman, cosecha oqarisqaykichispas Jehová Diospa bendicionninwan sinchi askha kanman, manataq chayta apayta atiwaqchischu chayqa, 25 vendenkichismi chaykunata, jinaspa chay qolqe apaykusqa rinkichis may llaqtatachá Jehová Diosniykichis ajllakunqa chayman. 26 Chay qolqewanmi rantinkichis tukuy ima munasqaykichista: wakata, ovejata, cabrata, vinota chhayna tomanakunata, tukuy ima munasqaykichistapas. Chaypin Jehová Diosniykichispa ñaupanpi chaykunata mijunkichis qankunapas wasiykichispi kaqkunapas, llapaykichismi kusisqa chaypi kankichis.+ 27 Amapunin qonqankichischu Leví runataqa,+ paykunaqa manan ima herenciatapas qankuna ukhupiqa chaskirqankuchu.+

28 ”Sapa kinsa watan chay watapi mijuy oqarisqaykichismanta chunka kaq parteta llaqtaykichis ukhupi juñunkichis.+ 29 Chaytan Leví runakunaqa mijunqaku sajsanankukama, paykunaqa manan ima herenciatapas qankuna ukhupiqa chaskirqankuchu. Chaymantapas qankuna ukhupi tiyaq waj llaqtayoqkunapas, mana taytayoqkunapas, viudakunapas jamuspan sajsanankukama mijunqaku.+ Chhaynapin Jehová Diosniykichisqa tukuy ima llank’asqaykichisman bendicionninta churamunqa.+