Isaías
61 Tukuy munayniyoq Señor Jehová Diospa espiritunmi* noqapi kashan,+
Jehová Diosmi ajllawan llamp’u sonqokunaman allin willakuykunata willanaypaq.+
Paymi kachamuwan llakisqa sonqokunata jampinaypaq,
wisq’asqa kaqkunaman kacharichisqa kanankumanta willanaypaq,
presokunaq ñawinku kichasqa kananmanta willanaypaq,+
2 Jehová Diospa khuyapayanan watamanta willanaypaq,
Diospa vengakunan p’unchaymanta willanaypaq,+
llakipi tarikuqkunata kallpachanaypaq,+
3 Sionrayku waqaqkunata sumaqta qhawarinaypaq,
paykunaman uspha qonaymantaqa munay coronata qonaypaq,
sinchi llakikuy qonaymantaqa kusikuy aceiteta qonaypaq,
khuyay kayta qonaymantaqa jatunchay capata qonaypaq.
Paykunaqa chanin ruwaq jatun sach’akuna nisqan kanqaku,
Jehová Diospa plantankunan kanqaku,
chaykunawanmi payqa jatunchasqa kanqa.+
4 Paykunan raqay-raqay* wasikunata wajmanta sayarichinqaku,
unay tiempo ch’usaqyachisqa llaqtakunatan jatarichinqaku,+
llapa thunisqa llaqtakunatan sayarichinqaku,+
unayña thunisqa llaqtakunatan wajmanta perqanqaku.+
5 “Mana reqsisqaykichis runakunan jamuspa uywaykichista michipusunkichis,
waj llaqtayoq runakunan+ chajraykichista uvasniykichistapas llank’apusunkichis.+
6 Qankunaqa Jehová Diospa sacerdotenkuna nisqan kankichis,+
Diosninchispa kamachinkuna nisqan kankichis;
nacionkunaq kaqninkunawanmi kausankichis,+
chaykunamantan may kusisqa rimankichis.
7 P’enqaypi kanaykichismantaqa junt’a yapayuqtan bendicionta chaskinkichis.
Pisichasqa kananmantaqa imachus chaskisqanmantan llaqtayqa kusisqa qaparinqa.
Paykunaqa askha yapayoqtan jallp’ankupi bendicionta chaskinqaku.+
Kusikuyninkupas wiñay-wiñaypaqmi kanqa.+
8 Noqa Jehová Diosqa chanin kaq ruwaytan munakuni,+
suwakuyta mana chanin kaqta iman ichaqa cheqnikuni.+
Paykunamanqa chanintan pagonkuta qopusaq,
paykunawanmi wiñaypaq rimanakusaq.+
9 Paykunaq miraynin runakunaqa lliu nacionkunapin allin reqsisqa kanqaku,+
lliu llaqtakunapin llapa runaq reqsisqan kanqaku.
Paykunata rikuq runakunaqa,
Jehová Diospa bendecisqan runakunata jinan qhawarinqaku”.+
10 Jehová Diosraykun mayta kusikusaq.
Diosniyraykun may kusisqa kasaq.+
Paymi salvana p’achawan p’achachiwan,+
chanin ruway capawanmi p’istuykuwan.