Juan
15 Jesusqa nillarqantaqmi: “Noqan cheqaq uvas sach’aqa kani, Taytaytaq chajra llank’aq. 2 Noqapi kaq llapa mana ruruq k’allmakunataqa paymi wit’upunqa, llapa ruruqtataq kuchupaspa limpianqa, chhaynapi astawan rurunanpaq.+ 3 Qankunaqa limpiasqañan kashankichis qankunaman rimapayasqay simiwan.+ 4 Noqallawanpuni jujllachasqa kaychis, jinan noqapas qankunawan jujllachasqa kashasaq. Imaynan uvas k’allmaqa mana kikillanmantaqa rurunmanchu, aswanpas sach’api kaspalla, chhaynallataqmi qankunapas mana ruruyta atiwaqchischu manachus noqawan jujllachasqa kankichis chayqa.+ 5 Noqan uvas sach’aqa kani, qankunataq k’allmakuna kankichis. Pipas noqallapi kanqa chayqa, noqapas paywanmi kashasaq, chhaynapitaq askhata rurunqa.+ Noqamanta t’aqasqaqa manan imatapas ruwayta atiwaqchischu. 6 Pipas mana noqallapichu kanqa chayqa, wit’usqa k’allma jinan wijch’usqa kanqa, jinaspa ch’akipunqa. Chhayna k’allmakunataqa juñuspan ninaman wijch’uykunku, chaypitaq ruphasqa kapun. 7 Sichus noqallawanpuni kankichis, simiykunapas qankunallapi kashanqa chayqa, tukuy ima mañakusqaykichismi ruwasqa kanqa.+ 8 Sichus askhata rurunkichis, rikuchinkichistaq discipuloykuna kasqaykichistapas chayqa,+ Taytaymi jatunchasqa kanqa. 9 Imaynan Taytayqa noqata munakuwan,+ chhaynatan noqapas qankunataqa munakuykichis; chhaynaqa qankunapas munakuynillaypi kashaychis. 10 Kamachikuyniykunatachus kasukunkichis chayqa, munakuynillaypin kankichis, imaynan noqapas Taytaypa kamachikuyninkunata kasukuspa munakuynillanpi kashani jinata.
11 ”Chaykunataqa nishaykichis noqa jina kusikunaykichispaqmi; aswan kusisqaraq kanaykichispaqwanmi.+ 12 Kaymi kamachikuyniyqa: Jujkuna-jujkunawanmi munanakunkichis, imaynan noqapas qankunata munakuykichis jinata.+ 13 Amigonkunarayku vidanta* qoqmi aswan munakuqqa,+ chaymanta aswan munakuqqa manan kanchu. 14 Kamachikuyniykunatachus kasukunkichis chayqa, amigoykunan kankichis.+ 15 Noqaqa manañan kamachi runakuna niykichisñachu, kamachiqa manan yachanchu patronninpa imachus ruwasqantaqa, noqan ichaqa Taytaymanta tukuy imaymana uyarisqayta qankunaman willaykichis, chaymi amigoykuna niykichis. 16 Manan qankunachu ajllawarqankichis, aswanpas noqan qankunata ajllakurqaykichis rurushanallaykichispaq, rurusqaykichispas wiñaypaq kananpaq; chhaynapin janaq pacha Taytaqa sutiypi imatapas mañakuqtiykichisqa qosunkichis.+
17 ”Chaykunatan kamachiykichis jujkuna-jujkunawan munanakunaykichispaq.+ 18 Kay pacha runakunachus cheqnikusunkichis chayqa, yuyariychis qankunamanta ñaupaqtaraq noqata cheqnikuwasqankuta.+ 19 Kay pacha runakuna jinachus kawaqchis chayqa, paykunaqa munakusunkichismanchá kaqninkutaqa. Qankunan ichaqa mana kay pacha runakuna jinachu kankichis+ noqa qankunata kay pachamanta ajllakusqayrayku, chaymi paykunaqa cheqnikusunkichis.+ 20 Aman qonqankichischu “kamachiqa manan patronninmantaqa kuraqchu” nispa qankunaman nisqayta. Noqatataq qatikachawarqanku chayqa, qankunatapas qatikachallasunkichistaqmi;+ simiytachus kasukurqanku chayqa, simiykichistapas kasukullanqakutaqmi. 21 Sutiy jawan llapa chaykunataqa ruwasunkichis, pichus kachamuwarqan chayta mana reqsisqankurayku.+ 22 Manachus noqa jamuyman karqan, manataqchus paykunata rimapayayman karqan chayqa, manan juchayoqchu kankuman karqan;+ kunanmi ichaqa manaña ninkumanchu: Manan juchayoqchu kani, nispaqa.+ 23 Noqata cheqnikuwaqqa Taytaytapas cheqnikullantaqmi.+ 24 Manachus paykunaq ñaupanpi mana piqpa ruwasqan ruwaykunata ruwayman karqan chayqa, manan juchayoqchu kankuman karqan,+ kunanmi ichaqa rikunkuña, chaywanpas cheqniwankun noqatapas Taytaytapas. 25 Chaykunan ichaqa pasarqan kamachikuy simipi “yanqapas qasin cheqnikuwarqanku”+ nispa qelqasqa junt’akunanpaq. 26 Janaq pacha Taytamantan qankunaman juj yanapaqta kachamusaq, chayqa cheqaq kaqta sut’iman orqoq espiritun,+ janaq pacha Taytamantataq jamunpas, chaymi chayamuspa noqamanta willanqa;+ 27 qankunapas noqamantaqa willanaykichismi,+ qallariymantapacha noqawan kasqaykichisrayku”, nispa.