Juan
16 Jesusqa nillarqantaqmi: “Chaykunataqa nishaykichis ama saqerpariwanaykichispaqmi.* 2 Sinagogamantan qarqosqa kankichis.+ Tiempon chayamushan, chaypachan runakunaqa qankunata wañuchispa+ piensanqaku Diosta servishanankupaq. 3 Chaytan paykunaqa ruwanqaku Taytaytapas noqatapas mana reqsiwasqankurayku.+ 4 Chaykunataqa nishaykichis chaykuna pasananpaq tiempo chayamuqtin chay nisqayta yuyarinaykichispaqmi.+
”Qankunawan kashasqayraykun chaykunataqa mana qallariymantapachachu nirqaykichis. 5 Kunanmi ichaqa kachamuwaqniyman ripusaq.+ ¿Manachu mayqennillaykichispas tapuriwankichis: ¿Maytataq rinkiri?, nispa? 6 Qankunaqa chaykunata nisqaywanmi sonqoykichispi sinchi llakisqa kashankichis ¿riki?+ 7 Ichaqa cheqaqtan niykichis: Allinniykichispaqmi noqaqa ripusaq; manachus ripuyman chayqa, manan yanapaqqa+ jamunmanchu, ripuspaymi ichaqa noqa chay yanapaqta kachamusaykichis. 8 Chay yanapaqmi chayamuspa kay pacha runakunaman sut’ita rikuchinqa imachus jucha chayta, imachus chanin kay chayta, imachus Diospa juzgaynin chaytawan. 9 Ñaupaqtan rikuchinqa imachus jucha chayta,+ paykuna noqapi mana iñisqankurayku.+ 10 Chaymantataq rikuchinqa imachus chanin kay chayta, janaq pacha Taytaman ripusqayrayku. Qankunaqa manañan rikuwankichisñachu. 11 Chaymantapas rikuchillanqataqmi imachus Diospa juzgaynin chaytapas, kay pachata kamachiq juzgasqaña kasqanrayku.+
12 ”Imaymanakunaraqmi qankunaman ninay kashan, ichaqa sasa entiendeyraqmi kunanqa kasunkichisman. 13 Chay yanapaqmi ichaqa chayamuspa pusasunkichis, chhaynapi cheqaq kaqta llapanta entiendenaykichispaq, chay yanapaqqa cheqaq kaqta sut’iman orqoq espiritun;*+ payqa manan payllamantachu rimanqa, aswanpas Diosmanta imachus uyarisqanman jinan rimanqa, qhepa tiempoman imakunachus kanqa chaytapas willasunkichismi.+ 14 Paymi noqamanta imachus chaskisqanta qankunaman willasunkichis,+ chhaynapin jatunchawanqa.+ 15 Taytayqa tukuy imaymana yachasqantan noqaman willawan.+ Chaymi niykichis: Noqamanta imachus chaskisqantan espirituqa willasunkichis, nispa. 16 Juj chhikanmantaqa manañan rikuwankichisñachu,+ chaymantapas juj chhikanmantaqa rikuwallankichismi”, nispa.
17 Jinan discipulonkunaqa ninakurqanku: “¿Imaninantataq nishawanchis: Juj chhikanmantaqa manañan rikuwankichisñachu, chaymantapas juj chhikanmantaqa rikuwallankichismi janaq pacha Taytaman ripusqayrayku, nisqanwanri?”, nispa. 18 Chaymantapas paykunaqa ninakushallarqankutaqmi: “¿Imaninantataq nishan: Juj chhikanmanta, nisqanwanri? Manan entiendekunchu imamantachus rimasqanqa”, nispanku. 19 Jinan Jesusqa tapukuy munasqankuta reparaspa paykunata nirqan: “¿Juj chhikanmantaqa manañan rikuwankichisñachu, chaymantapas juj chhikanmantaqa rikuwallankichismi, nispa nisqaymantachu tapunakushankichis? 20 Cheqaqtapunin niykichis: Qankunaqa waqankichismi, llakikuymantan qaparinkichis, kay pacha runakunataq kusikunqaku; qankunaqa sinchi llakisqan kashankichis, ichaqa llakikuyniykichismi kusikuyman tukupunqa.+ 21 Warmiqa sinchitan nanachikun onqokunan hora chayamuqtinqa ¿riki?, onqokusqan qhepamanmi ichaqa manaña ñak’arisqantapas yuyarinchu nacemuq wawanta rikusqanrayku. 22 Chhaynallataqmi qankunapas kunanqa sinchi llakikuypi kashankichis, jujmanta qankunawan tupaqtiymi ichaqa sonqoykichisraq kusikuymanta llanllarinqa,+ manataqmi pipas chay kusikuyniykichistaqa qechusunkichischu. 23 Chay p’unchayqa manañan imatapas qankunaqa tapuwankichisñachu. Cheqaqtapunin niykichis: Janaq pacha Taytamanta sutiypi imatapas mañakuqtiykichisqa+ qosunkichismi payqa.+ 24 Qankunaqa manan imatapas sutiypiqa mañakunkichisraqchu ¿riki? Mañakuychis, chaskinkichismi, chhaynapi ancha kusisqa kanaykichispaq.
25 ”Chaykunataqa rijch’anachiykunata, tupanachiykunata churaspan rimapayashaykichis, ichaqa tiempon chayamunqa manaña rijch’anachiykunawanchu rimapayanaypaq, chaypiqa sut’intan janaq pacha Taytamanta willasaykichis. 26 Chay p’unchayqa qankunañan janaq pacha Taytamanta sutiypi mañakunkichis; chaywanqa “manañan noqachu qankunapaq mañapusaykichis” ninaytan nishani. 27 Noqata munakuwasqaykichisrayku,+ janaq pacha Taytaq sutinpi jamusqayta creesqaykichisrayku+ iman janaq pacha Taytaqa qankunata munakusunkichis. 28 Noqaqa janaq pacha Taytaq sutinpin kay pachaman jamurqani, kunanmi ichaqa kay pachata saqespa janaq pacha Taytaman kutipushani”,+ nispa.
29 Discipulonkunataq payta nirqanku: “Señor, kunanqa entiendenapaq jinan rimashanki, manataqmi rijch’anachiykunata churaspañachu. 30 Kunanqa yachaykun tukuy imaymana yachasqaykita, qanqa manan pipas tapunasuykitaraqchu suyanki, yachankiñan imachus piensasqankutapas. Chaypin reparayku Diosmanta jamusqaykita”, nispa. 31 Jinan Jesusqa paykunata nirqan: “¿Cheqaqtapunichu kunanqa creenkichis? 32 Ñan hora chayamushanña, kaypiñataqmi kashanpas, chaypin qankunaqa ch’eqerichisqa kankichis, sapankan wasiykichisman ripunkichis, noqatataq sapallayta saqerpariwankichis.+ Ichaqa manan sapallaychu kashani, janaq pacha Taytaqa noqawanmi kashan.+ 33 Chaykunataqa nishaykichis noqarayku thaj kanaykichispaqmi.+ Kay pachapiqa imaymana sasachakuykunapin* tarikunkichis, ichaqa, ¡kallpachakuychis!, noqaqa ñan atipaniña kay pachata”,+ nispa.