1 Pedro
1 Jesucristoq apostolnin*+ noqa Pedron qelqamushaykichis qankuna Ponto, Galacia, Capadocia,+ Asia, Bitinia ladokunapi ch’eqerisqa kaqkunaman, arí, qankuna forastero jina kausaq ajllasqa kaqkunaman. 2 Qankunataqa Taytanchis Diosmi ñaupaqmantaña yachasqanman jina ajllarqasunkichis,+ santo espirituwantaq ch’uyancharqasunkichispas,+ chhaynapi kasukuq kanaykichispaq, Jesucristoq yawarninwan ch’aqchusqa kanaykichispaqwan.+
Qankunaman yapasqa kachun Diospa ancha sumaq sonqo kaynin thaj kayninpas.
3 Jatunchasqa kachun Señorninchis Jesucristoq Taytan Diosqa, paymi ancha khuyapayakuq kayninpi wajmanta nacechimuwarqanchis,+ chhaynapi Jesucristoq kausarimpusqanwan+ mana kuyuriq suyakuyniyoq kananchispaq,+ 4 mana jayk’aq ismuyta atiq, mana ima qhelliyoq, mana jayk’aq tukukuq herenciata chaskinanchispaqwan.+ Chayqa janaq pachapin qankunapaq waqaychasqa kashan,+ 5 arí, qankuna iñisqaykichisrayku Diospa atiyninwan cuidasqa kaqkunapaq; payqa cuidashasunkichis salvasqa kanaykichispaqmi, chay salvacionqa tukukuy tiempopin rikukunqa. 6 Chaychá qankunaqa anchata kusikushankichis, jinaña juj ratu imaymana pruebakunaq ñit’isqan kashankichis chaypas;+ ichaqa kananpunin karqan chaykunaqa, 7 chhaynapi iñiyniykichis+ allin probasqa kaqtin Jesucristoq rijurimunan tiempopi alabasqa, jatunchasqa, respetasqa kanaykichispaq;+ chaymantapas allin probasqa iñiyqa qorimantapas astawanraqmi valen; qoriqa ninawan ch’uyayachisqa kaspapas chinkapullanmi. 8 Qankunaqa manaña jayk’aqpas Cristota* rikurqankichischu chaypas, munakunkichismi paytaqa ¿riki? Manaña kunanpas rikunkichischu chaypas, iñishankichismi paypiqa, anchatataqmi kusikushankichispas mana rimay atina ancha jatun kusikuywanraq ¿riki? 9 Iñiyniykichisrayku salvasqa kanaykichista+ allinta yachaspachá chhaynaqa kashankichis.
10 Qankunapaq kaq Diospa ancha sumaq sonqo kayninmanta willaq profetakunapas maytapunin yachayta munarqanku chay salvacionmantaqa, chaymi tapukurqanku maskharqanku ima.+ 11 Paykunaqa allintan estudiarqanku paykunapi kaq santo espirituq willasqan jayk’aqchus ima tiempopichus Cristopi junt’akunan karqan chayta,+ chay espiritun ñaupaqmantaña willarqan imaynatachus Cristo ñak’arinan karqan chayta,+ chay qhepaman imayna jatunchasqachus kanan karqan chaytawan. 12 Ichaqa Diosmi paykunamanqa reparachirqan kamachi jina imachus willasqankuqa mana paykunapaqchu kasqanta, aswanpas qankunapaq kasqanta; chay willasqankutan allin willakuykunata willaqkunaqa qankunaman willarqasunkichis janaq pachamanta jamuq santo espirituq atiyninwan.+ Angelkunapas chaykunataqa yachaytapunin munashanku.
13 Chayrayku yuyayniykichista preparaychis llank’anaykichispaq,+ allin yuyaywantaq tukuy imatapas ruwaychis,+ tukuy sonqowan suyakuychis Diospa ancha sumaq sonqo kaynintapas, chaytan qankunaqa chaskinkichis Jesucristo rijurimuqtin. 14 Kasukuq wawakunataq kankichis chayqa, amaña imaynan Diosta manaraq reqsishaspa munasqaykichisman jina kausarqankichis chhaynatañachu kausaychis, 15 aswanpas wajasuqniykichis ch’uya Dios jina tukuy imapipas ch’uyatapuni kausaychis.+ 16 Simin qelqapipunin nin: “Ch’uyan kanaykichis, noqapas ch’uya kasqayrayku”,+ nispa.
17 Mana pimanpas sayapakuspa sapankaq imachus ruwasqanman jina juzgaq Tayta Diostataq wajakunkichis chayqa,+ payta manchakuspa kausaychis+ kay pachapi forastero jina kausashanaykichiskamaqa. 18 Yachasqaykichis jina, qankunaqa manan ismuq qolqewanchu ni qoriwanchu ñaupa taytaykichismanta chaskisqaykichis mana valeq kausaymantaqa librasqa karqankichis,+ 19 aswanmi qankunaqa mana imanasqa ch’uya cordero jina+ Cristoq ancha valeq yawarninwan+ librasqa karqankichis. 20 Payqa manaraq runakuna kay pachapi mirayta* qallarishaqtinmi+ ajllasqa karqan, ichaqa qankunaraykun kay tukukuy p’unchaykunapi rijurimurqan.+ 21 Payraykun qankunaqa Diospipas creenkichis,+ chay Diosmi paytaqa wañusqamanta kausarichimurqan+ jinaspa jatuncharqan,+ chhaynapi qankunaqa chay Diospi iñinaykichispaq paypi suyakunaykichispaqwan.
22 Kunanqa ñataq cheqaq willakuyta kasukuspa ch’uyanchakunkichisña, chhaynapitaq wayqe-panantin jinaña ch’uya sonqowan kausashankichis+ chayqa, tukuy sonqowanpuni qankunaqa munanakuychis.+ 23 Qankunaqa wajmantan nacemurqankichis,+ ichaqa manan ismuq mujumantachu, aswanmi wiñaypaq kausaq Diospa siminpa yanapayninwan+ mana jayk’aq ismuyta atiq mujumanta+ nacemurqankichis. 24 “Llapa runapas campopi qora jinallan, sumaq rijch’ayninpas t’ika jinallan. Qoraqa naq’epuspan ch’akipun, t’ikakunapas urmapullanmi. 25 Jehová* Diospa rimasqanmi ichaqa wiñaypaq”,+ chay “rimasqanmi” qankunamanqa allin willakuykuna jina willasqa karqan.+