Ezequiel
3 Chaymantataq payqa niwarqan: “Runaq churin, ñaupaykipi imachus kashan chayta mijuy, mijuy chay qelqa k’uyuta, chaymantataq Israel runakunata rimapayaq riy”,+ nispa.
2 Jinan noqaqa simiyta kicharirqani, paytaq chay qelqa k’uyuta mijuchiwarqan. 3 Jinaspa niwarqan: “Runaq churin, kay qelqa k’uyu qosqayta sajsanaykikama mijuy”, nispa. Jinan noqaqa mijuyta qallarirqani, simiypiqa miel misk’i jinaraqmi karqan.+
4 Chaymantan niwallarqantaq: “Runaq churin, Israel runakunaman riy, jinaspa rimasqaykunata willamuy. 5 Manan mana entiendechikuyta rimaq llaqtamanchu kachashayki, nitaq jujniray rimaq llaqtamanchu, aswanpas Israel runakunamanmi kachashayki. 6 Manan mana entiendeyta rimaq askha llaqtakunamanchu kachashayki, manan jujniray rimaq llaqtakunamanchu, nitaq mana yachasqayki simikunata rimaq llaqtakunamanchu kachashayki. Chay llaqtakunaman kachaykiman chayqa uyarisunkikumanmi.+ 7 Israel runakunan ichaqa mana uyarisunkikuchu, paykunaqa manan uyariyta munawankuchu.+ Israel runakunaqa llapankupas mana kasukuq k’ullu sonqokunan kanku.+ 8 Chaymi uyaykita paykunaq uyanta jina rumiyachini, mat’iykitapas paykunaq mat’inkuta jinan rumiyachini.+ 9 Diamante rumiman jinan mat’iykitaqa tukuchini, rumimantapas aswan ch’ilamanraqmi tukuchini.+ Aman paykunataqa manchakunkichu, aman uyankutapas manchakunkichu.+ Paykunaqa mana kasukuq k’ullu runakunan kanku”, nispa.
10 Payqa niwallarqantaqmi: “Runaq churin, llapa rimasqaykunata allinta uyariy, llapa chaykunata sonqoykipi waqaychay. 11 Apasqa llaqtamasiykikuna maypichus kashan chayman riy,+ paykunata rimapayamuy. Uyarikunqakuña manaña chaypas+ paykunata nimuy: Tukuy munayniyoq Señor Jehová Diosmi khaynata nin, nispa”.
12 Chaymantataq juj espíritu* maypichus kasqaymanta apawarqan,+ chayllamanmi qhepaymanta juj kunka manchakuytaraq nimurqan: “Jehová Diospa jatun kayninqa maypichus kasqanmanta alabasqa kachun”, nispa. 13 Chayllamanmi uyarikullarqantaq kausashaqkunaq rafranpa qhetunakusqan,+ ruedakunaq purisqan,+ juj manchakuy suenay ima. 14 Espiritun* noqataqa oqarispa apawarqan. Sonqo nanasqan phiñasqan rirqani, Jehová Diospa atiyninqa* mana tukurikuqmi noqapi kasharqan. 15 Chhaynapin noqaqa apasqa runakunaq kasqanman rirqani, paykunaqa Kebar mayuq+ qayllanpi kaq Tel-Abib llaqtapin kasharqanku, chaypin paykuna ukhupi qhepakurqani. Qanchis p’unchaymi may mancharisqa, admirasqa kasharqani.+
16 Qanchis p’unchay qhepamantaq, Jehová Diosqa khaynata niwarqan:
17 “Runaq churin, qantan churayki Israel llaqta qhawaqta.+ Rimasqayta uyarispan noqaq sutiypi paykunaman willamunki.+ 18 Mayqen mana allin ruwaqtapas, wañunkin niyman, qantaq ichaqa mana payta ninkichu mana allin ñanninta saqenanpaq, chhaynapi kausashanallanpaq+ chayqa, juchanraykun+ payqa wañunqa, yawarninmantan ichaqa cuentata mañasayki.+ 19 Ichaqa qanchus chay mana allin ruwaqta rimapayanki, manataq payqa mana allin ñanninta saqenqachu chayqa, juchanraykun payqa wañunqa, qanmi ichaqa kausayniykita libranki.+ 20 Juj chanin runachus chanin kausayninta saqespa mana allinkunata ruwanman chayqa, noqan payman misk’anata churasaq, jinan payqa wañunqa.+ Manachus payta rimapayarqanki chayqa, juchanraykun payqa wañunqa, chanin ruwaykuna ruwasqanpas manan yuyarisqachu kanqa, yawarninmantan ichaqa cuentata mañasayki.+ 21 Ichaqa qanchus chay chanin runata ama juchallikunanpaq nirqanki, paytaq uyarikuspa manaña juchallikurqanchu chayqa kausashallanqan,+ qanpas kausayniykitan libranki”, nispa.
22 Chaypi kashaqtiymi, Jehová Diospa atiynin* noqaman jamuwarqan, jinan payqa niwarqan: “Sayariy jinaspa jaqay pampaman riy, chaypin qanwan rimasaq”, nispa. 23 Jinan noqaqa sayarispa chay pampaman rirqani. Chaypin Jehová Diospa k’anchaynin kashasqa,+ chay k’anchayqa Kebar mayuq qayllanpi rikusqay k’anchay jinan kasqa.+ Chaymi uyanpamanta pampaman kumpakurqani. 24 Chayllamanmi Diospa espiritun noqaman junt’aykuwarqan, jinaspan sayarichiwarqan.+ Paytaq* noqawan rimaspa niwarqan:
“Phaway wasiykiman, chaypi wisq’akamuy. 25 Runaq churin, qantan waskhakunawan watasunkiku, chhaynapi ama jawaman lloqsinaykipaq nitaq paykunawanpas kanaykipaq. 26 Qalluykitan watasayki mana rimarinaykipaq, manan paykunata anyayta atinkichu. Paykunaqa mana kasukuq k’ullu runakunan kanku. 27 Qanwan rimaqtiymi ichaqa simiykita kichasaq, qantaq paykunata nimunki:+ Tukuy munayniyoq Señor Jehová Diosmi khaynata nin, nispa. Uyariyta munaqqa uyarikuchun,+ mana uyariyta munaqqa ama uyarichunchu. Paykunaqa mana kasukuq k’ullu runakunan kanku.+