Mateo
8 Orqomanta Jesús uraykamuqtinqa ancha askha runakunan payta qatikurqanku. 2 Chayllamanmi lepra* onqoyniyoq runa jamurqan, payman k’umuykuspataq nirqan: “Señor, munanki chayqa, atinkin qhaliyachiwayta”,+ nispa. 3 Chaymi Jesusqa makinta jaywarispa llamiykurqan,* jinaspa nirqan: “Arí, munanin, qhali kapuy”,+ nispa. Jinan chay runaqa kaq ratu qhaliyapurqan.+ 4 Chaymantataq Jesusqa nirqan: “Aman pimanpas willankichu,+ aswanpas sacerdoteman rispa qhawachikamuy,+ Moisespa kamachikusqanman jinataq ofrendaykita jaywamuy,+ chhaynapi onqoyniykimanta qhaliyapusqaykita yachanankupaq”, nispa.
5 Capernaún llaqtaman jaykuqtinmi ejercitopi capitán* jamurqan, jinaspa valekurqan:+ 6 “Wiraqocha, kamachiymi wasipi sinchita onqospa ñak’arishan, manan jatariytapas atinchu”, nispa. 7 Jesustaq nirqan: “Chayman chayaspayña qhaliyachisaq”, nispa. 8 Ejercitopi capitantaq nirqan: “Wiraqocha, noqaqa manan wasiypi qanta chaskinaypaq jinachu kani, aswanpas rimarillay, kamachiyqa qhaliyapullanqan. 9 Noqapas kamachina runan kani, kamachinitaqmi soldadokunatapas, jujnintan nini phaway nispa, jinan rin; jujnintataq nini jamuy nispa, jinan jamun; kamachiytapas nini kayta ruway nispa, jinan ruwan”, nispa. 10 Chayta uyarispan Jesusqa anchata admirakurqan, jinan qhepan riqkunata nirqan: “Cheqaqtan niykichis: Manan Israelpiqa pitapas khaynaniraq iñiyniyoq runataqa tarirqanichu.+ 11 Ichaqa niykichismi: Askhan inti lloqsimuy ladomanta inti jaykuy ladomantawan jamunqaku, jinaspa janaq pacha gobiernopi Abrahanwan, Isaacwan, Jacobpiwan mesapi tiyaykunqaku.+ 12 Janaq pacha gobiernoq wawankunan ichaqa tutayaq jawaman wijch’usqa kanqaku. Chaypin paykunaqa waqanqaku, mana imanakuyta atispankutaq kirunkutaraq k’achachachinqaku,+ nispa”. 13 Chaymantataq Jesusqa ejercitopi capitanta nirqan: “Kutipuy wasiykiman, imaynachus iñiyniyki kasqanman jina qanpaq ruwasqa kachun”,+ nispa. Chay kamachintaq kaq ratu qhaliyapurqan.+
14 Pedroq wasinman jaykuspan Jesusqa rikurqan Pedroq suegranta+ fiebre onqoywan puñunapi kashaqta.+ 15 Chaymi Jesusqa makinta llamiykurqan,+ fiebretaq thanipurqan, jinan chay warmiqa jatarispa paykunata atiendeyta qallarirqan. 16 Ch’isintataq payman pusamurqanku supaykunaq junt’aykusqan askha runakunata, Jesustaq juj rimayllapi chay espiritukunata qarqorqan, llapan onqosqakunatapas qhaliyachirqan. 17 Chhaynapin junt’akurqan profeta Isaiaspa nisqan, paymi nirqan: “Paymi onqoyninchiskunataqa apapurqan, paymi nanayninchiskunatapas q’epipurqan”,+ nispa.
18 Jesusqa muyuriqninpi askha runakunata rikuspan discipulonkunata kamachirqan qocha chimpaman chimpanankupaq.+ 19 Chayllamanmi kamachikuy simita yachachiq runa payman qayllaykuspa nirqan: “Yachachikuq, maytaña riqtiykipas qatikusaykin”,+ nispa. 20 Jesustaq nirqan: “Atoqkunapas t’oqoyoqmi, phalaq animalkunapas q’esayoqmi, runaq Churinpan* ichaqa mana kanchu umanta maypi samaykachinallanpas”,+ nispa. 21 Jinan jujnin discipulon nirqan: “Señor, taytaytaraq ñaupaqta p’amparamusaq”,+ nispa. 22 Jesustaq nirqan: “Qanqa tukuy tiempo qatikamuway, wañusqakunaña wañupuqninkutaqa p’ampashachunku”,+ nispa.
23 Boteman Jesús seqaqtintaq discipulonkunaqa paywan rirqanku.+ 24 Chayllamanmi qochapi sinchi wayra jatarirqan, jinan unuqa sinchita aytikuspa boteta millp’usharqanña; Jesusmi ichaqa puñusharqan.+ 25 Discipulonkunataq qayllaykuspa rijch’achirqanku: “¡Señor, salvawayku, chinkaykushanchisñan!”, nispa. 26 Jesustaq paykunata nirqan: “Pisi iñiyniyoq runakuna, ¿imaraykun sinchi mancharisqa kashankichis?”,+ nispa. Jinan payqa sayarispa wayratawan qochatawan phiñarikurqan, chhaynapin thaj kapurqan.+ 27 Paykunataq admirasqa nirqanku: “¿Pitaq kay runari, chaytaq wayrapas qochapas kasunri?”, nispa.
28 Qocha chimpapi Gádara runakunaq llaqtanman Jesús chayaqtintaq, supaykunaq junt’aykusqan iskay runakuna panteonmanta lloqsimuspa payman jamurqanku,+ paykunaqa manchakuy runakunan karqanku, chaymi mana pipas chay ñanninta puriyta munaqchu. 29 Paykunan qaparirqanku: “Diospa Churin, ¿iman noqaykuwan ruwanayki?+ ¿Manaraq tiempopichu+ ñak’arichiqniyku jamushanki?”,+ nispa. 30 Paykunamanta karu chimpapitaq askhallaña khuchikuna mijusharqanku.+ 31 Chaymi chay supaykunaqa rogakurqanku: “Qarqowankiku chayqa, jaqay khuchikunaman qarqowayku”,+ nispa. 32 Jesustaq nirqan: “¡Phaway riychis!”, nispa. Jinan paykunaqa chay runakunamanta lloqsispa khuchikunaman jaykurqanku, chay khuchikunataq phawarispa llapanku qochaman urmaykurqanku,* unuwan jeq’epaspataq wañurqanku. 33 Khuchi michiqkunataq ayqekuspa llaqtaman rirqanku, chaypin lliuta willakurqanku, imachus chay supayniyoq runakunawan pasarqan chaytapas willakurqankun. 34 Jinan llaqtantin runakuna lloqsimurqanku Jesuswan tupaq, paywan tupaspataq valekurqanku llaqtankumanta ripunanpaq.+