Jeremías
52 Sedequiasqa+ iskay chunka jujniyoq watanpi kashaspan rey kapurqan, chunka jujniyoq watataqmi Jerusalén llaqtamanta kamachikurqan. Paypa mamanmi karqan Amutal,+ Lifná llaqtayoq Jeremiaspa ususin. 2 Sedequiasqa Jehoiaquin+ jinan Jehová Diospa cheqnisqan ruwaykunata ruwarqan. 3 Jehová Diosqa sinchi phiñasqan kasharqan Jerusalén llaqta runakunapaqpas Judá ayllu runakunapaqpas, chaymi paykunata ñaupanmanta wijch’upurqan.+ Qhepamantaq Sedequiasqa Babilonia rey contra jataripurqan.+ 4 Isqon wataña Sedequías kamachikushaqtinmi chunka kaq killapi chunka kaq p’unchaypi Babilonia rey Nabucodonosorqa llapa soldadokunantin Jerusalén llaqta contra maqanakuq jamurqan. Chay llaqtaman chayaspan karpakurqanku, jinan llaqtaq muyuriqninpi cercota jatarichirqanku llaqtaman jaykunankupaq.+ 5 Rey Sedequías chunka jujniyoq wata kamachikuyninkaman Jerusalén llaqtaqa cercasqalla kasharqan.
6 Tawa kaq killapi isqon kaq p’unchaypin+ ichaqa Jerusalén llaqtapi sinchi yarqay kasharqan, manañan suyupi tiyaq runakunapaq mijuy kapurqanñachu.+ 7 Chay p’unchaymi Jerusalén llaqta perqata thunimurqanku. Jinan Caldea soldadokuna llaqtata muyuykushaqtinku Jerusalén llaqta soldadokunaqa llapanku llaqtamanta tuta ayqekurqanku iskay pata perqaq punkunta, chay punkuqa reypa huertanpa ladonpin kasharqan. Arabá ladoman riq ñannintan ayqekurqanku.+ 8 Caldea soldadokunan ichaqa rey Sedequiasta+ qatipaspa Jericó ch’in pampapi ayparqanku, llapa soldadonkunataq ch’eqeripurqanku. 9 Jinan rey Sedequiasta jap’ispanku Amaj jallp’api Riblá llaqtaman aparqanku Babilonia reypa kasqanman, chaypin payqa juzgarqan. 10 Jinaspan Babilonia reyqa Sedequias rikushaqtin churinkunata wañuchirqan, chaymantapas llapa Judá autoridadkunatan Riblapi wañuchillarqantaq. 11 Chaymantataq Babilonia reyqa Sedequiaspa ñawinta orqorqan,+ jinaspan cobremanta cadenakunawan wataspa Babiloniaman aparqan, chaypin wañunankama presota wisq’arqan.
12 Babilonia rey Nabucodonosor chunka isqonniyoq wataña kamachikushaqtinmi Babilonia soldadokunaq umallin Nebuzaradanqa pisqa kaq killapi chunka kaq p’unchaypi Jerusalén llaqtaman jaykurqan, payqa Babilonia reypa yanapaqninmi karqan.+ 13 Paymi kanaykurqan Jehová Diospa wasinta,+ reypa wasinta,* Jerusalén llaqtapi kaq llapa wasikunata, jinallataq llapa jatun wasikunatapas. 14 Nebuzaradanwan kashaq llapa Caldea soldadokunataq Jerusalén llaqtaq muyuriqnin perqakunata thunipurqanku.+
15 Chaymantataq soldadokunaq umallin Nebuzaradanqa wakin wajcha* runakunata llaqtapi qhepaq runakunatapas apapurqan. Apapullarqantaqmi Babilonia reyta yanapaq Judá ayllu runakunata qhepaq allin artesanokunatapas.+ 16 Nishu wajcha runakunatan ichaqa saqerqan uvas chajrakunata llank’anankupaq, juj sasa llank’aykunatawan ruwanankupaq.+
17 Chaymantataq Caldea soldadokunaqa ñut’upurqanku Jehová Diospa wasinpa ñaupanpi kaq cobremanta columnakunata,+ unu apana carretakunata,+ cobremanta Jatun Qocha nisqa puruñatapas.*+ Chay cobretan Jehová Diospa wasinmanta Babilonia llaqtaman llapanta apapurqanku.+ 18 Apallarqankutaqmi cobremanta baldekunata, palakunata, jatun p’ukukunata,+ copakunata,+ mecha wañuchinakunatapas. Diospa templonpi kaq cobremanta serviciokunataqa llapantan apapurqanku. 19 Soldadokunaq umallin Nebuzaradanqa ch’uya qorimanta ch’uya qolqemanta p’ukukunata,+ sansa apanakunata, vino ofrenda jich’anapaq jatun p’ukukunata, uspha mankakunata, candelerokunata,+ copakunata, jatun p’ukukunata iman apapurqan.+ 20 Jehová Diospa wasinpaq rey Salomonpa ruwasqan iskaynin columnakunapas, Jatun Qocha nisqa puruñapas, chay puruñata tiyachinapaq chunka iskayniyoq torokunapas,+ unu apana carretakunapas cobremanta ruwasqan karqan. Chaykuna sinchi askha cobremanta ruwasqa kasqanraykun manaña pesarqankuchu.
21 Sapanka columnaq sayayninmi karqan chunka pusaqniyoq codo,* muyuriqnintaq karqan chunka iskayniyoq codo,+ phatuntaq* karqan tawa dedo,* chay columnakunaqa ch’usaq sonqoyoqmi karqan. 22 Columnakunaq umanpa sayaynintaq pisqa codo karqan.+ Chay columnakunaq umanpas, muyuriqninpi kaq mallakunapas, granadakunapas llapanmi cobremanta ruwasqa karqan. Chay columnakunaqa iskayninpas igual-llan karqan, granadakunapas igual-llan karqan. 23 Muyuriqninpin isqon chunka soqtayoq granadakuna karqan, mallaq muyuriqninpiqa pachaj granadakunan llapanpiqa karqan.+
24 Soldadokunaq umallin Nebuzaradanqa apapullarqantaqmi uma sacerdote Serayata,+ payman qatiq sacerdote Sofoniasta,+ punku qhawaq kinsantin runakunatapas.+ 25 Chaymantapas Jerusalén llaqtamantan apallarqantaq reypa palacionpi kaq soldadokunaq umallinta, reyta yuyaychaq qanchis runakunata, soldadokunaq umallinpa secretarionta ima, paymi runakunata guerrapaq suyupi wajachiq. Apallarqantaqmi suyumanta qhepaq soqta chunka común runakunatapas, paykunaqa Jerusalén llaqtapiraqmi kasharqanku. 26 Paykunatan Babilonia soldadokunaq umallin Nebuzaradanqa aparqan Riblá llaqtaman, Babilonia reyman. 27 Babilonia reytaq paykunata wañuchipurqan Amaj jallp’api, Riblá llaqtapi.+ Chhaynatan Judá ayllu runakunataqa jallp’ankumanta apapurqanku.+
28 Nabucodonosorqa qanchis wata kamachikushaspan 3023 judío runakunata aparqan.+
29 Nabucodonosor chunka pusaqniyoq wata kamachikushaqtintaq+ 832 runakuna Jerusalenmanta apasqa karqanku.
30 Iskay chunka kinsayoq wata Nabucodonosor kamachikushaqtintaq soldadokunaq umallin Nebuzaradán 745 judío runakunata aparqan.+
Llapanpiqa 4600 runakunan apasqa karqanku.
31 Judá ayllu rey Joaquín kinsa chunka qanchisniyoq wataña Babiloniapi preso kashaqtinmi,+ Babilonia rey Evil-Merodacqa kamachikuyta qallarirqan, jinan chunka iskayniyoq killapi iskay chunka pisqayoq p’unchaypi Judá rey Joaquinta kacharipurqan.+ 32 Evil-Merodacqa sumaqtan qhawarirqan Joaquintaqa, Babilonia llaqtaman apasqa wakin reykunamantapas aswan allinpaqmi qhawarirqan. 33 Jinan Joaquinqa preso p’achanta ch’utikapuspa mosoq p’achawan churakurqan, chaymantapas payqa wañupunan p’unchaykaman reypa mesanpi mijurqan. 34 Sapa p’unchaymi Babilonia reyqa payman mijunata qorqan, wañupunan p’unchaykaman qoshallarqan.