Deuteronomio
9 ”Uyariway Israel llaqta, Jordán mayuta chimpanayki patapiñan kashanki,+ chay mayuta chimpaspan chinkachinki qanmanta aswan kallpayoq jatun nacionkunata,+ muyuriqninpi jatun perqakunayoq llaqtakunata,+ 2 qanmanta aswan kallpasapa, aswan jatun runakunata, Anacpa churinkunata.+ Yachasqayki jina paykunamantan rimanku: ¿Pitaq Anacpa churinkunatari atipanman?, nispa ¿riki? 3 Aman kayta qonqankichu, Jehová Diosniykin ñaupaykita chimpanqa.+ Payqa lliuta ruphaq nina jinan,+ paymi llapa chay nacionkunata ñut’unqa. Jehová Diosniykiqa promesa ruwasqanman jinan chay llaqtakunata qanman k’umuchinqa, chhaynapin chay runakunataqa ratulla atipanki chinkachinki ima.+
4 ”Jehová Diosniykichis ñaupaykichismanta chay nacionkunata chinkachiqtinqa, aman sonqoykichispi ninkichischu: Chanin runakuna kasqanchisraykun Jehová Diosqa kay jallp’aman pusamushawanchis jap’ikapunanchispaq,+ nispaqa. Jehová Diosqa millay mana chanin kasqankuraykun chay runakunataqa chinkachinqa.+ 5 Chay jallp’amanqa jaykunkichis manan chanin runakuna kasqaykichisraykuchu ni ch’uya sonqo kasqaykichisraykuchu. Jehová Diosqa chay nacionkunataqa chinkachinqa millay runakuna kasqankuraykun,+ chaywanmi Jehová Diosqa ñaupa taytaykichis Abrahanman,+ Isaacman,+ Jacobmanwan+ promesa ruwasqanta junt’anqa. 6 Chhaynaqa allinta yachaychis, manan chanin runakuna kasqaykichisraykuchu Jehová Diosqa chay munay jallp’ataqa qosunkichis. Qankunaqa mana kasukuq k’ullu runakunan kankichis.+
7 ”Aman jayk’aqpas qonqankichischu imaynatachus ch’inneq ladopi Jehová Diosniykichista phiñachirqankichis chaytaqa.+ Egipto llaqtamanta lloqsimusqaykichis p’unchaymantapachan qankunaqa Jehová Dios contra sayarirqankichis.+ 8 Horeb orqopipas Jehová Diostaqa sinchitan phiñachirqankichis, chaymi Jehová Diosqa qankunapaq sinchi phiñasqa kasharqan, chinkachipuytaraqmi munasharqasunkichis.+ 9 Horeb orqota p’alta rumikunata chaskiq rishaspayqa,+ Jehová Dios qankunawan rimanakusqan+ rumikunata chaskiq rishaspayqa tawa chunka p’unchayta tawa chunka tutatawanmi chay orqopi kamurqani+ mana imata mijuspa mana imata ujaspa. 10 Chaypin Jehová Diosqa qomuwarqan dedonwan qelqasqa iskay p’alta rumikunata. Orqoq chakinpi juñunasqa kashaqtiykichis nina ukhumanta rimamusqan simikunatan Jehová Diosqa chay rumikunapi qelqasqa.+ 11 Tawa chunka p’unchay tawa chunka tuta tukuqtinñan Jehová Diosqa chay rimanakuy p’alta rumikunataqa qomuwarqan. 12 Chayta qowaspan Jehová Diosqa niwarqan: Usqhaylla uraykuy, Egiptomanta pusamusqayki llaqtaykiqa mana allintan ruwashan.+ Manañan paykunaqa reqsichisqay ñanpiñachu purinku. Juj idolotan ruwarukunku,+ nispa. 13 Chaymantan Jehová Diosqa niwallarqantaq: Kay llaqta runakunaqa mana kasukuq sinchi k’ullu runakunan kanku.+ 14 Jinata kay runakunata chinkachisaq, amaña kay pachapipas yuyarisqachu kachunku. Aswanpas qanmanta juj aswan jatun nacionta, aswan kallpasapa nacionta sayarichisaq,+ nispa.
15 ”Jinan noqaqa chay orqopi nina raurashallaqtinraq+ iskaynin rimanakuy p’alta rumikunata aparikuspa uraykampurqani.+ 16 Qankunata qhawarimunaypaqtaq Jehová Dios contra juchallikushasqankichis. ¡Juj idolota ruwaykukusqankichis! Manaraq imapin qankunaqa Jehová Diospa reqsichisqan ñanmanta pantapusqankichis.+ 17 Jinan noqaqa apaykamusqay iskaynin p’alta rumikunata qankunaq ñaupaykichispi pampaman ch’aqespa ñut’urqani.+ 18 Chaymantataq ñaupaq ruwasqayta jina tawa chunka p’unchayta tawa chunka tutatawan Jehová Diospa ñaupanpi qonqoriykukuspa pampaman k’umuykurqani. Chay kutipipas manan imatapas mijurqanichu ni ujarqanipaschu.+ Jehová Diospa ñaupanpi juchallikusqaykichisraykun, payta phiñachisqaykichisraykun noqaqa chaykunata ruwarqani. 19 Jehová Diosqa sinchi phiñasqan qankunawan kasharqan,+ chinkachinasuykichis patapiñan kasharqan, chaywanmi noqaqa sinchi manchasqa kasharqani. Ichaqa chay kutipipas uyariwarqanmi Jehová Diosqa imachus mañakusqayta.+
20 ”Aaronpaqpas sinchi phiñasqan Jehová Diosqa kasharqan, ñan wañuchipunanña kasharqan,+ chaymi chay kutipiqa paypaqwan mañapurqani. 21 Ruwasqaykichis torillota jap’ispataq+ ninapi ruphachipurqani. Ñut’uy-ñut’utan kutarqani, chaytataq orqomanta jaykumuq unuman jich’aykapurqani.+
22 ”Chaykuna qhepamanqa Taberapipas,+ Masá+ nisqapipas, Quibroj-Atavá+ ladopipas phiñachirqankichismi Jehová Diostaqa. 23 Cadés-Barneamanta+ kachaspa Jehová Dios: Chay jallp’aman rispa chayta jap’ikampuychis, qankunamanmi chayta qopuykichis, nispa niqtinpas, wajmantan qankunaqa Jehová Dios contra sayarirqankichis,+ manan paypiqa confiarqankichischu,+ nitaq kasukurqankichispaschu. 24 Qankunaqa reqsisqay p’unchaymantapachapas chhayna mana kasukuq k’ullupunin karqankichis Jehová Dioswanqa.
25 ”Chhaynatan noqaqa tawa chunka p’unchayta tawa chunka tutatawan+ Jehová Diospa ñaupanpi qonqoriykukuspa pampakama k’umuykurqani. Chaytaqa ruwarqani Jehová Dios chinkachiyta munasqasuykichisraykun. 26 Chaypin Jehová Diosta tukuy sonqoywan rogakurqani: Tukuy munayniyoq Señorníy Jehová, amayá llaqtaykitaqa chinkachiychu; ajllakusqayki llaqtamá riki kashan chay llaqtaqa,+ kallpaykiwan atiyniykiwan imamá riki paykunataqa Egiptomanta orqomushanki.+ 27 Yuyariy serviqniyki Abrahanta, Isaacta, Jacobta.+ Amayá phiñakuychu kay runakunaq mana kasukuq kasqankumantaqa ni mana allin ruwasqankumantapas, ama kasuychu jucha ruwasqankutapas.+ 28 Mana chayqa orqomuwasqaykiku llaqtapi runakunachá ninkuman: Jehovaqa manachá atirqanchu prometesqan jallp’aman chay runakuna pusayta. Cheqnikurqanchá paykunataqa, chaychá ch’inneqpi wañuchinanpaq pusarqan,+ nispa. 29 Chay llaqtaqa llaqtaykin, ajllakusqayki llaqtan.+ Paykunatan qanqa jatun atiyniykiwan kallpaykiwan orqomurqanki,+ nispay.