Isaías
58 Diosmi niwan: “¡Kunkayoqta wajakuy, ama upallaspa qapariy!
Waqraq tocayninta jina wajakuy.
Noqa contra sayarisqanta llaqtayman willamuy,+
Jacobpa mirayninman juchankunata rikuchimuy.
2 Paykunaqa p’unchay-p’unchaysi maskhawanku,
ñanniykunatas reqsiyta munashanku,
chanin ruwaq nación jinaraqsi maskhashawanku,
Diosninkuq kamachisqanta mana saqeq jinaraqsi purishanku.+
Paykunaqa Dios sonqopas kankuman jinaraqmi rimanku,+
chaninta imatapas ruwanaytan munanku, ninkun:
3 Noqaykuqa ayunashaykun, ¿imaraykutaq chaytari mana qhawarimunkichu?+
Juchaykumantapas maytan pesapakushayku, ¿imaraykun chaytapas mana reparankichu?,+ nispa.
Ayunasqaykichis p’unchayqa munasqallaykichistan qankunaqa ruwankichis,
llank’aqniykichiskunatapas sinchitan sarunchankichis.+
4 Ayunoykichisqa maqanakuypin discutiypin* tukun,
qankunaqa mana khuyapayaspan* pitapas saqmankichis.
Chhaynatataq ayunashankichis chayqa, ¿imaynapitaq janaq pachapiri kunkaykichis uyarikunman?
5 Arí, ayunasqaykichis p’unchayqa pesapakunkichismi,
t’otora jinan k’umurayankichis,
qhasqa p’achawan churakuspan uspha patapi kumparayankichis.
Ichaqa, ¿chhayna ayunanaykichistachu noqa munayman?
¿Diosniykichis Jehová Dios chaywan kusikuymanchu?
6 Manan. Noqaqa khayna ayunanaykichistan munani:
Ñak’arichiq cadenakunata kacharipuychis,
yugoq waskhankunata paskapuychis,+
ñak’arichisqa kaqkunata kacharipuychis,+
llapa yugokunata p’akipuychis.
7 Yarqasqakunamanpas t’antaykichista qoykuychis,+
mana wasiyoqkunatapas wajchakunatapas sumaqta chaskiychis,
mana p’achayoqkunatapas p’achachiychis,+
familiaykichistapas sumaqta qhawariychis.
8 Chaytachus ruwanki chayqa, pacha illarimuy jinaraqmi k’ancharinki,+
ratullan qhaliyapunki.
Chanin kayniykipas ñaupaykitan purinqa,
Diosniyki Jehová Diospa jatun kaynintaq qhepaykita jamunqa.+
9 Wajakuqtiykipas Jehová Diosniykiqa uyarimusunkin;
yanapayta mañakuqtiykin nimusunki: ¡Kaypin kashani!, nispa.
Ñak’arichiq yugotachus wijch’upunki,
amañachus pitapas t’oqsinki,* nitaq millaytachu rimanki,+
10 qanman gustaq mijunatachus yarqasqaman qonki,+
ñak’ariqmanchus imachus faltasqanta qonki chayqa,
k’anchayniykiqa tuta ukhupi jinan k’ancharinqa,
11 Diosniyki Jehová Diosqa tukuy tiempon pusasunki,
ch’aki pampakunapipas ima munasqaykitan qosunki,+
tulluykikunatapas allin kallpayoqmanmi tukuchinqa,
allin qarpasqa huerta jinan kanki,+
mana ch’akiq pujyu jinan kanki.
12 Qanraykun raqay-raqaykunapas* jujmanta perqasqa kanqa,+
qanmi ñaupa runakunaq cimentacionninta jujmanta churanki.+
Thunisqakunata jatarichiq nisqan kanki,+ ñankunata allichaq nisqan kanki,
chay ñan patakunapin jujmanta tiyapunqaku.
13 Qanchus samana p’unchayta respetanki,
chay ch’uya p’unchayniyta respetaspachus munayniyki maskhayta saqenki,+
chay p’unchaymantachus may gustowan rimanki,
Jehová Diosniykiq ch’uya p’unchayninta jinachus qhawarinki,
may jatun p’unchayta jinachus qhawarinki,+
munayniyki maskhanaykimantaqa chay p’unchaytachus waqaychanki,
manataq yanqa rimaykunatapas rimankichu chayqa,
14 Diosniyki Jehová Diosmi kusikuyniyki kanqa,
orqo patakunantan phawachisayki.+
Ñaupa taytayki Jacobpa chaskisqan herenciamantan mijuchisayki,+
noqa Diosniyki Jehová Diosmi chayta nini”, nispa.