Ezequiel
31 Chunka jujniyoq watapin, kinsa kaq killapi, killa qallariy p’unchaypi jujmanta Jehová Diosqa rimapayamuwarqan, paymi niwarqan: 2 “Runaq churin, Egipto rey faraonta llapa runankunatawan niy:+
¿Piwanmi qanpa ancha jatun kasqaykita tupanachiyman?
3 Juj Asiria runan karqan, Líbano orqo munay cedro sach’an karqan,
chay sach’aqa munay k’allmasapallañan karqan, allin llanthuq sach’a jinan karqan;
jatuntapunin wiñarqan, umanpas phuyukamaraqmi chayarqan.
4 Unun paytaqa jatunta wiñachirqan,
jallp’a ukhupi unukunan jatunman tukuchirqan.
Maypichus plantasqa kasharqan chaynintan unu puriq,
mayukunan chaypi llapa sach’akunata qarpaq.
5 Chay unukunawanmi payqa llapa sach’akunamantapas aswan jatunta wiñarqan.
K’allmankunapas askhan wiñamurqan, jatuntan mast’arikurqan;
askha unu chayninta purisqanwanmi jatunta wiñarqan.
6 Llapa altonta phalaq animalkunan ramankunapi q’esachakurqan,
campopi llapa salqa animalkunan k’allmankunaq uranpi wacharqan,
llapa nacionkunan llanthunpi tiyarqan.
7 Saphinkunaqa askha unuq kasqankaman chayarqan,
chaywanmi chay sach’aqa may jatun, may munay karqan;
k’allmankunapas askhan karqan.
8 Manan Diospa huertanpi mayqen cedropas+ chaymanqa igualarqanchu,
manan mayqen enebro sach’apas pay jina k’allmakunayoqqa karqanchu,
manan mayqen plátano nisqa sach’apas* pay jina ramakunayoqqa karqanchu,
manapunin Diospa huertanpi mayqen sach’apas chay sach’a jina munayqa karqanchu.
9 May munaymanpunin paytaqa tukuchirqani, k’allmasapamanmi tukuchirqani,
Diospa Edén huertanpi sach’akunapas llapankun paytaqa envidiakuqku, nispa.
10 ”Chayraykun tukuy munayniyoq Señor Jehová Diosqa nin: Chhayna jatun kasqanwanmi, umanpas phuyukamaraq chayasqanwanmi payqa jatunchakuqman tukupurqan. 11 Chaymi noqaqa nacionkunata atiyniyoq kamachiqman payta entregasaq.+ Chay kamachiqmi pay contra jatarinqa. Noqaqa millay kasqanraykun cheqnikusaq payta. 12 Waj llaqtayoq runakunan, nacionkunamanta mana khuyapayakuq runakunan payta wit’upunqaku jinaspa orqo patakunapi wijch’urparinqaku. K’allmankunaqa wayq’okunapin wijch’urayanqa, ramankunapas chay llaqtapi unuq purisqankunapin wisñirayanqa.+ Llapa llaqtakunan paypa llanthunmanta ripunqaku, saqerparinqakun paytaqa. 13 Llapa alton phalaq animalkunan k’ullunkunapi tiyanqaku, campopi llapa salqa animalkunataq k’allmankuna ukhupi tiyanqaku.+ 14 Chaykunaqa kanqa mayqen sach’apas ama pay jina wiñananpaqmi, mayqen qarpasqa sach’apas ama nishu jatunta wiñananpaqmi, ama phuyukama chayananpaqmi. Paykunaqa llapankun wañunqaku, llapankun jallp’aq sonqoman jaykunqaku; aya p’ampanamanmi jaykunqaku, maypichus runakuna kashan chay t’oqomanmi uraykunqaku, nispa.
15 ”Tukuy munayniyoq Señor Jehová Diosmi nillantaq: Sepulturaman* jaykusqan p’unchaymi noqaqa llakikuyta waqayta jatarichisaq. Chaypachan chinkay-chinkay unukunata llut’asaq, mayukunatan jark’asaq. Payraykun llapa Líbano wichayta tutayachisaq, chhaynapin llapa sach’akuna ch’akipunqa. 16 Kumpakuqtinmi, Sepulturaman jaykuqtinmi, jujkunawan kuska t’oqoman uraykuqtinmi nacionkunata chhafchirisaq. Jinan jallp’a ukhupi unu ch’onqaq sach’akunaqa kallpachasqa kanqaku; Edenpi llapa sach’akunan,+ Libanopi allin kaq sach’akunan kallpachasqa kanqaku. 17 Ichaqa paykunapas paywan kuskan Sepulturaman jaykunqaku, maypichus espadawan wañuchisqakuna kashanku chaymanmi jaykunqaku.+ Payta yanapaqkunapas llanthunpi kaqkunapas chaymanmi jaykunqaku,+ nispa.
18 ”¿Edenpi mayqen sach’an ancha jatun kayniykiman, munay kayniykimanpas igualanman?+ Manaña igualankumanchu chaypas Edenpi sach’akuna jinan qanqa jallp’aq sonqoman jaykunki. Qhari kaynin qaracha mana kuchusqakunawan kuskan, espadawan wañuchisqakunawan kuskan wijch’urayanki. Chhaynapin tarikunqa faraonpas llapa runankunapas, ninmi tukuy munayniyoq Señor Jehová Dios”, nispa.