2 Crónicas
33 Manasesqa+ chunka iskayniyoq watanpi kashaspan rey kapurqan, pisqa chunka pisqayoq watataq Jerusalenmanta kamachikurqan.+
2 Manasesqa Jehová Diospa cheqnisqan ruwaykunatan ruwarqan, imaynan chay jallp’amanta Jehová Diospa qarqosqan nacionkuna millakunapaq ruwaykunata ruwarqanku jinata.+ 3 Manasesqa papan Ezequiaspa thunisqan yupaychana patakunatan* jujmanta ruwallarqantaq.+ Payqa Baal idolokunapaqmi altarkunata ruwarqan, ruwallarqantaqmi yupaychanapaq sayashaq k’ullukunatapas.* Chaymantapas cielopi llapa ch’askakunamanmi k’umuykurqan, chaykunatataqmi servirqanpas.+ 4 Jehová Diosña nirqan: “Jerusalén llaqtapin sutiyqa wiñaypaq kanqa”,+ nispa chaypas Manasesqa Jehová Diospa wasinpin juj dioskunapaq altarkunata ruwarqan.+ 5 Chaymantapas Jehová Diospa wasinpa iskaynin pationpin altarkunata ruwarqan cielopi llapa ch’askakunata yupaychananpaq.+ 6 Manasesqa Hinón* wayq’opin+ wawankunata ninapi ruphachirqan.+ Payqa layqa ruwaykunatan ruwarqan,+ watuykunapin purirqan, suerte qhawaykunapin purirqan; wakin runakunatataq ajllarqan watuq kananpaq, wañusqakunata tapunanpaq ima.+ Payqa Jehová Diospa cheqnisqan ruwaykunatan sinchitapuni ruwarqan, chhaynapi Diosta phiñachinanpaq.
7 Chaymantapas Manasesqa ruwasqan sayashaq k’ullutan Diospa wasinman apaykurqan.+ Chay wasimantan Diosqa Davidtapas churin Salomontapas nirqan: “Kay wasiypin, kay Jerusalén llaqtapin sutiyqa wiñaypaq kanqa.+ Chay llaqtatan noqaqa Israelpi kaq llapa ayllukunamanta ajllakurqani. 8 Sichus Israel runakuna lliu nisqaykunata makilla kasukunqaku, kamachiy Moisesman qosqay kamachikuykunatapas leykunatapas kasukunqaku chayqa, ñaupa taytankuman qosqay jallp’allapipunin tiyanqaku, manan chaymanta qarqosaqchu”, nispa. 9 Manasesmi ichaqa Judá ayllu runakunatapas Jerusalén llaqtapi tiyaq runakunatapas juchallichirqan, chhaynapin paykunaqa chay jallp’amanta Jehová Diospa wijch’usqan nacionkunaq ruwasqankumantapas aswan mana allintaraq ruwarqanku.+
10 Jehová Diosmi ichaqa Manasestapas llaqtantapas sapa kuti rimapayarqan payman kutirikunankupaq, paykunan ichaqa mana kasukurqankuchu.+ 11 Chaymi Jehová Diosqa Asiria reypa soldadonkunaq umallinkunata Judá ayllu contra kachamurqan. Jinan chay umallikunaqa Manasesta jap’irqanku, jinaspa Babilonia llaqtaman aparqanku ganchokunawan jap’ichispa, cobremanta iskay cadenakunawan wataspa. 12 Chhayna sasachakuypi tarikuspan Manasesqa ñaupa taytankunaq Diosninpa ñaupanpi khuyayta rogakuspa juch’uyaykukurqan, jinaspa sonqomanta Jehová Diospa yanapayninta mañakurqan. 13 Manasesqa mañakushallarqanmi rogakushallarqanmi, chaymi Diosqa khuyapayarqan, jinan mañakusqanta uyarispa Jerusalén llaqtaman kutichimpurqan, chhaynapi Judá ayllu runakunata kamachishanallanpaq.+ Chayraqmi Manasesqa allinta yacharqan Jehová Diosllapuni cheqaq Diosqa kasqanta.+
14 Chay qhepamantaq Manasesqa Davidpa Llaqtan nisqaq jawanpi juj perqata altota sayarichirqan+ Guihon+ pujyuq inti jaykuy ladonpi. Chay perqaqa Challwa Punku+ nisqakaman chayarqan, chaymantataq Ofelkama+ muyurqan. Chaymantapas Judá ayllupi kaq allin perqasqa llapa llaqtakunapin soldadokunaq umallinkunata churarqan. 15 Jehová Diospa wasinman apaykusqan idolotapas waj dioskunatapas lliutan Diospa wasinmanta orqospa wijch’urqan.+ Chaymantapas lliutan thunirqan Jehová Diospa wasinpa ladonpi ruwasqan altarkunatapas+ Jerusalén llaqtapi ruwasqan altarkunatapas, chaykunatataq llaqta jawaman wijch’uchimurqan. 16 Chaymantataq Jehová Diospa altarninta allicharqan,+ jinaspa chay patapi Diosman jaywayta qallarirqan sumaq kausay sacrificiokunata,+ graciasta qonapaq sacrificiokunatawan.+ Judá ayllu runakunatataq nirqan Israelpa Diosnin Jehová Diosllata servinankupaq. 17 Chaywanpas Judá ayllu runakunaqa yupaychana patakunapin sacrificiokunata jaywashallarqanku, ichaqa Jehová Diosllamanmi jaywarqanku.
18 Manasespa wakin ruwasqankunapas, Diosninmanta mañakusqanpas, Israelpa Diosnin Jehová Diospa rantinpi profetakunaq* rimapayasqanpas lliumi qelqasqa kashan Israel reykunamanta willaq libropi. 19 Chaymantapas Diospa rikuchisqanta willaqnin runakunaq qelqasqanpin qelqasqa kashan: Diosmanta mañakusqan,+ Diospa uyarisqan, juchallikusqan,+ manaraq Diosman kutirikushaspa maykunapichus yupaychana patakunata ruwasqan,+ yupaychanapaq sayashaq k’ullukuna ruwasqan, idolokunata ruwasqanpas. 20 Chaymantataq Manasesqa ñaupa taytankuna jina wañukapurqan, jinan p’ampapurqanku wasinpa ladonpi. Chay qhepamantaq churin Amón paypa rantinpi rey kapurqan.+
21 Amonqa+ iskay chunka iskayniyoq watanpi kashaspan Judá ayllupi rey kapurqan, iskay watataqmi Jerusalén llaqtamanta kamachikurqan.+ 22 Amonqa taytan Manasés jinan Jehová Diospa cheqnisqan ruwaykunata ruwarqan.+ Chaymantapas taytan Manasespa ruwasqan idolokunamanmi sacrificiokunata jaywarqan,+ paykunatataq yupaycharqanpas. 23 Amonqa manan taytan Manasés jinachu+ k’umuykukuspa Jehová Diosman kutirikurqan,+ aswanpas payqa astawanraqmi juchallikurqan. 24 Chaymantataq kamachinkuna pay contra jatarirqanku,+ jinaspa wasinpi wañuchipurqanku. 25 Judá ayllu runakunan ichaqa rey Amón contra jatariq runakunata lliuta wañuchipurqanku,+ jinaspa churin Josiasta+ paypa rantinpi reyta churarqanku.