Isaías
28 ¡Ay imaraqchá kanqa Efrainpi machasqa runakunaq coronanmanta!*+
Paykunaqa llaqtankutan qhawarinku orqo patapi munay t’ika coronata jina,
ichaqa naq’epunqan, ch’akipunqan chay coronankuqa.
2 Jehová Diosmi kachamunqa juj allin kallpasapa runata.
Chay runaqa rayo t’ojay jinan, chijchi para jinan, sinchi wayra jinan,
payqa sinchi wayrayoq manchakuy para jinan;
paymi chay coronata tukuy kallpanwan pampaman ch’aqenqa.
3 Efrainpi machaq runakunaq coronanqa,
alabakuq coronankuqa sarunchasqan kanqa.+
4 Munay kayninpas t’ika jinan naq’epunqa,
wayq’oq uman orqopi t’ika jinan ch’akipunqa,
ñaupaq poqoq higos jinan kanqa,
chay higostaqa rikuruspa jinan pipas mijun.
5 Chay p’unchaymi ejercitokunata kamachiq Jehová Diosqa puchuq llaqtanpaq k’ancharishaq corona jina, munay t’ika corona jina kanqa.+ 6 Paymi juezkunata yuyaychanqa chaninta juzganankupaq. Llaqta punkupi sayaqkunamanmi kallpata qonqa llaqtata allinta cuidanankupaq.+
7 Paykunan ichaqa mana allinta imatapas ruwanku,
machanan, ujanan paykunata kinray-kinrayta purichin.
Machachikuq ujanakunaq causanpin
sacerdotekunapas profetakunapas mana allinta ruwanku,
vinon paykunaq yuyayninta tutayachin,
alcoholmi paykunaq umantaqa apakachan,
chaykunaq causanpin mana chaninta juzganku.+
8 Mesankupas aqtupakusqankuwanmi junt’a kashan,
sinchi millaypunin kashan, manan maypas limpio kanchu.
9 ¿Pikunatan yachachikunqa?
¿Pikunamanmi kay willakuykunata willakunqa?
¿Chayraq januk’asqa wawakunamanchu?
¿Chayraq ñuñumanta p’itisqa wawakunamanchu?
10 Qankunan nishankichis:
“Juj kamachiyñataq, waj kamachiyñataq,
juj medina waskhañataq, waj medina waskhañataq,*+
juj chhikanta kaypi juj chhikanta jaqaypi”, nispa.
11 Qallun watasqa jina rimaq runakunawanmi kay llaqta runakunata rimapayanqa mana yachasqanku simipi.+ 12 Juj kutinmi payqa nirqan: “Kaypi samarikuychis, sayk’usqakuna samarikuychis, kayqa samakunapaqmi”, nispa. Paykunan ichaqa mana uyarikurqankuchu.+ 13 Chaymi paykunapaqqa Jehová Diospa nisqanqa khayna kanqa:
“Juj kamachiyñataq, waj kamachiyñataq,
juj medina waskhañataq, waj medina washañataq,+
juj chhikanta kaypi juj chhikanta jaqaypi”, nisqa.
Chhaynapi purisqankupi qhepaman kumpakunankupaq,
chhaynapi trampaman urmanankupaq, ñut’usqa kanankupaq.+
14 Yau yanqa thautiqkuna, Jehová Diospa siminta uyariychis,
Jerusalenpi kamachikuqkuna, payta uyariychis.
15 Qankunan nishankichis:
Lloqllaña qonqay phawarimunman chaypas,
manan chayqa aypawanqakuchu.
Llullakuymi noqaykuq wasiykuqa,
engañon noqaykuq pakakunaykuqa”,+ nispa.
16 Chaymi tukuy munayniyoq Señor Jehová Diosqa nin:
“Sionpin allin probasqa rumita cimentacionta jina churani,+
Pipas chaypi iñiqqa manan mancharikunqachu.+
Pakakunaykichis llullakuytaqa chijchin thantapunqa,
llapa pakakunaykichistan unu apapunqa.
18 Wañuywan rimanakusqaykichispas yanqan kanqa,
Lloqlla qonqay chayamuqtinmi lliu p’ampasqa kankichis.
19 Sapa chayamuqtinmi pichasqa kankichis,+
chayqa sapa tutamantanmi chayamunqa,
sapa p’unchaymi, sapa tutan chayamunqa.
Manchakuyllan paykunataqa reparachinqa”,* nispa.
20 Puñunaqa nishu juch’uymi chaypi chutarikunapaq,
qatanapas juch’uyllan k’uyukunapaq.
21 Jehová Diosqa Perazin orqopi jinan sayarinqa,
Gabaón wayq’o pampapi jinan rijch’arinqa.+
Imachus ruwanantan junt’anqa,
musphanapaq mana reqsisqa ruwaykunatan ruwanqa.+
22 Ama pitapas asipayaychischu,+
cadenaykichismi astawan mat’ikunman.
Ejercitokunata kamachiq tukuy munayniyoq Señor Jehová Diostan uyarini,
payqa ñan rimanña kay jallp’a tukuchinanmanta.+
23 Yau qankuna, uyariwaychis,
tukuy yuyayta churaychis imachus nisqayman.
24 Chajra llank’aqqa manamá sapa p’unchaychu yapuspalla* kan,
manamá sapa p’unchaychu jallp’ata ñut’uspalla kan.+
25 ¿Manachu payqa jallp’ata ñut’uyta tukuspa,
yana cominosta común cominostawan t’akan?
¿Manachu payqa trigota, mijo nisqata, cebadata ima t’akan?
¿Manachu payqa chajraq cantonkunaman espelta nisqa trigota t’akan?+
27 Yana cominosqa manan fierro kiruyoq sarunawanchu saruchikun,+
juj cominostapas manan saruna carretawanchu saruchikun.
Aswanmi yana cominosqa ñañu k’aspiwan q’asukun,*
juj cominospas q’asuna k’aspillawanmi p’anakun.
28 Pipas t’anta ruwanapaq mijuyta eraspaqa manan jak’u kanankamachu eran;
manan pipas jayk’aqpas chaytaqa ruwanmanchu.+
Carretata aysaq caballowanña saruchin chaypas,
manan payqa polvo kanankamachu saruchin.+
29 Kay simikunaqa ejercitokunata kamachiq Jehová Diosmantan jamun.
Paypa yuyaychayninqa may munaypunin,
paypa yachayninqa may jatunpunin.+