Ezequiel

20 Qanchis kaq watapi, pisqa kaq killapi, chunka kaq p’unchaypin Israelmanta wakin umalliqkuna* Jehová Diosta tapukuq jamurqanku, ñaupaypin paykunaqa tiyaykurqanku. 2 Chayllamanmi Jehová Diosqa rimapayamuwarqan, paymi niwarqan: 3 “Runaq churin, Israelmanta umalliqkunata niy: Tukuy munayniyoq Señor Jehová Diosmi nin: ¿Noqata tapukuqchu jamushankichis? Noqa wiñaypaq kausaq Diosmi niykichis: Manan tapukusqaykichismanqa imatapas kutichisaykichischu,+ ninmi tukuy munayniyoq Señor Jehová Dios, nispa.

4 ”Runaq churin, ¿listoñachu kashanki chay runakunata juzganaykipaq? ¿Listoñachu kashanki paykunata juchachanaykipaq? Ñaupa taytankuq sinchi mana allinkuna ruwasqankuta willay.+ 5 Paykunata niy: Tukuy munayniyoq Señor Jehová Diosmi nin: Israel llaqtata ajllakushaspaymi,+ Jacobpa miraynin runakunata ajllakushaspaymi, makiyta oqarispa juj juramentota ruwarqani. Egiptopin paykunaman reqsichikurqani.+ Paykunatan nirqani: Noqan Diosniykichis Jehová Diosqa kani, nispa. 6 Chay p’unchaymi paykunaman jurarqani Egiptomanta orqomunaypaq, maskhapusqay jallp’aman apanaypaq, maypichus lechepas mielpas askha kan chayman apanaypaq.+ Chay jallp’aqa llapan jallp’amantapas aswan munaymi karqan. 7 Chay kutin paykunata nirqani: Sapankaykichis llapa millakunapaq kaqkunata wijch’upuychis, aman Egiptopi millakunapaq idolokunawanqa qhellichakunkichischu.+ Noqan Diosniykichis Jehová Diosqa kani,+ nispa.

8 ”Paykunan ichaqa noqa contra jatarirqanku, manan kasukuwarqankuchu. Manan millakunapaq kaqkunata wijch’upurqankuchu nitaqmi Egiptopi millakunapaq idolokunamantapas t’aqakurqankuchu.+ Chaymi noqaqa jurarqani colerayta paykunaman chayachimunaypaq, Egiptollapiraq phiñakuyniyta paykunaman kachaykamunaypaq. 9 Ichaqa sutiyraykun aguantakurqani, chhaynapi tiyasqanku nacionkunaq ñaupanpi sutiy ama qhellichasqa kananpaq.+ Egiptomanta orqomuspaymi, chay nacionkuna rikushaqtinmi paykunamanqa* reqsichikurqani.+ 10 Egiptomanta orqomuspataq ch’in ladoman paykunata pusarqani.+

11 ”Chaymantataq kamachikuyniykunata leyniykunatawan paykunaman qorqani,+ chhaynapi pipas kasukuqqa chaykunarayku kausashanallanpaq.+ 12 Qollarqanitaqmi samana p’unchaytapas+ paykunawan noqapiwan juj señal kananpaq,+ noqa Jehová Dios ch’uyanchaqninku kasqayta yachanankupaq.

13 ”Paykunan ichaqa ch’in pampapi noqa contra jatarirqanku.+ Manan kamachikuyniykunatapas ni leyniykunatapas kasukurqankuchu, chhaynapi mayqen kasukuqpas kausashanallanpaq. Samana p’unchay qosqaytapas qhellicharqankun. Chaymi noqaqa jurarqani k’araq phiñakuyniyta paykunaman chayachimunaypaq, ch’in pampapi ch’usaqman tukuchinaypaq.+ 14 Ichaqa sutiyraykun aguantakurqani, chhaynapi nacionkunaq ñaupanpi sutiy ama qhellichasqa kananpaq. Chay nacionkuna rikushaqtinmi noqaqa paykunata orqomurqani.+ 15 Chay ch’in pampapiqa, maypichus lechepas mielpas askha kan chayman mana pusanaypaqmi jurarqani,+ paykunaman qosqay jallp’aman mana chayachinaypaqmi jurarqani.+ Chay jallp’aqa llapan jallp’amantapas aswan munaymi karqan. 16 Paykunaqa manan kasukurqankuchu kamachikuy qosqaykunata, manan leykuna qosqayman jinachu kausarqanku, samana p’unchaytapas qhellicharqankun. Sonqonkupas millakunapaq idolokunaman k’askasqallan kasharqan.+

17 ”Chhaynaña kaqtinpas paykunataqa khuyapayarqanin, chaymi ch’inneqpi mana wañuchirqanichu nitaqmi ch’usaqyachirqanipaschu. 18 Chay ch’inneqpin paykunaq churinkunata nirqani:+ Aman taytaykichiskunaq kamachikuyninman jinaqa kausankichischu.+ Aman paykunaq yachachisqankutapas ruwankichischu, aman paykunaq millakunapaq idolonkuwanpas qhellichakunkichischu. 19 Noqan Diosniykichis Jehová Diosqa kani. Kamachisqayman jinan kausankichis, llapa leyniykunatan junt’ankichis.+ 20 Samana p’unchaykunatan waqaychankichis,+ chaykunan qankunawan rimanakusqaymanta juj señal kanqa. Chhaynapin qankunaqa yachankichis noqa Diosniykichis Jehová Dios kasqayta,+ nispa.

21 ”Churinkunan ichaqa noqa contra jatarirqanku.+ Manan kamachikuyniykunatapas ni leyniykunatapas kasukurqankuchu, chhaynapi mayqen kasukuqpas kausashanallanpaq. Samana p’unchaytapas qhellicharqankun. Chaymi noqaqa jurarqani colerayta paykunaman chayachimunaypaq, maypichus kasharqanku chay ch’in pampaman phiñakuyniyta kachaykamunaypaq.+ 22 Ichaqa aguantakurqanin,+ sutiyraykun jinalla karqani,+ chhaynapi nacionkunaq ñaupanpi sutiy ama qhellichasqa kananpaq. Chay nacionkuna rikushaqtinmi noqaqa paykunata orqomurqani. 23 Chaymantapas chay ch’inneqpin jurarqani paykunata lliu nacionkunaman ch’eqerichinaypaq, llapa llaqtakunaman apachipunaypaq.+ 24 Paykunaqa manan kamachisqaykunata kasukurqankuchu, manan leyniykunatapas junt’arqankuchu.+ Samana p’unchaytapas qhellichapurqankun, ñaupa taytankuq millakunapaq idolonkunamantaqmi k’askakurqankupas.+ 25 Jinatan saqerparirqani mana allin ruwaykunapi purinankupaq, mana allin kamachikuykunaman jina kausanankupaq; chay kamachikuykunaqa manan pimanpas kausayta qonmanchu.+ 26 Jinallatan qhawarqani phiwi* wawankuta ruphachispa qhellichakunankutapas, chhaynapi may llakisqa kanankupaq,+ noqa Jehová Dios kasqaytapas yachanankupaq.

27 ”Chayrayku, qan, runaq churin, Israel runakunata niy: Tukuy munayniyoq Señor Jehová Diosmi nin: Chhaynatan ñaupa taytaykichiskunaqa pisichawarqanku, sapa kutinmi saqewarqanku. 28 Noqan paykunataqa prometesqay jallp’aman pusarqani.+ Paykunataq jatun moqokunata rikuspa, k’allmasapa sach’akunata+ rikuspa chaykunapi sacrificiokunata jaywayta qallarirqanku, cheqnikusqay ofrendakunatan ruwayta qallarirqanku. Chaypin q’apaq ofrendankutapas vino ofrendankutapas jaywarqanku. 29 Jinan noqaqa paykunata tapurqani: ¿Ima ruwaqmi chay yupaychana pataman* rinkichis?, nispa. (Chaytaqa kunankamapas Yupaychana Pata nikushallanmi).+

30 ”Kunanqa chay Israel runakunatañataq niy: Tukuy munayniyoq Señor Jehová Diosmi nin: Qankunapas ñaupa taytaykichiskuna jinan qhellichakushankichis, paykuna jinan millakuna idolokunaq qhepanta purispa chaykunata adorashankichis.*+ 31 Qankunaqa kunan p’unchaykaman chay millakunapaq idolokunaman sacrificiokunata jaywashankichis, kunankaman wawaykichiskunatapas paykunapaq ruphachishankichis.+ Yau Israel runakuna, ¿chaykunata ruwashaspachu tapukusqaykichisman kutichinayta munashankichis?,+ nispa.

”Tukuy munayniyoq Señor Jehová Diosmi nin: Noqa wiñaypaq kausaq Diosmi jurani: Manan tapukusqaykichismanqa imatapas nisaqchu.+ 32 Qankunan nishankichis: Waj nacionkuna jina kasun, karu llaqtakunapi familiakuna jina k’aspita rumita yupaychasun,+ nispa. Manan jayk’aqpas chay yuyaykusqaykichisqa ruwakunqachu.

33 ”Tukuy munayniyoq Señor Jehová Diosmi nin: Noqa wiñaypaq kausaq Diosmi jurani: Qankunatan kamachisaykichis ancha jatun atiyniywan kallpasapa makiywan, k’araq phiñakuyniytan qankunaman jich’aykamusaykichis.+ 34 Ancha jatun atiyniywanmi kallpasapa makiywanmi maykunamanchus ch’eqechisqa karqankichis chay llaqtakunamanta orqomusaykichis, k’araq phiñakuyniyta chayachimuspan chay nacionkunamanta juñumusaykichis.+ 35 Llaqtakunapi ch’in ladokunamanmi apasaykichis, chaypin qankunawan juicioman jaykusaq, uya-uyapuran rimasun.+

36 ”Imaynan ñaupa taytaykichiskunawan Egiptopi kaq ch’in ladopi juicioman jaykurqani, chhaynatan qankunawanpas juicioman jaykusaq, ninmi tukuy munayniyoq Señor Jehová Dios. 37 Oveja michiq jinan k’aspiypa uranta pasachisaykichis,+ rimanakuytan junt’achisaykichis. 38 Mana kasukuq k’ullu runakunatataq, noqa contra sayariqkunatataq qankunamanta t’aqasaq.+ Maypichus waj llaqtayoq jina tiyashanku chay llaqtamantan orqomusaq, ichaqa manan Israel llaqtamanqa jaykunqakuchu.+ Chhaynapin qankunaqa yachankichis noqa Jehová Dios kasqayta.

39 ”Yau Israel runakuna, tukuy munayniyoq Señor Jehová Diosmi khaynata nin: Ripuychis, chay millakunapaq idoloykichiskunata servimuychis.+ Ichaqa kayta yachaychis, manaña uyarikunkichischu chaypas qankunaqa manañan ch’uya sutiyta qhellichankichisñachu, manañan jayk’aqpas sacrificioykichiskunawan ni millakunapaq idoloykichiskunawanpas qhellichankichisñachu,+ nispa.

40 ”Tukuy munayniyoq Señor Jehová Diosmi nillantaq: Israelpi kaq juj jatun orqopin,+ ch’uya orqoypin Israel runakunaqa serviwanqaku, llapa Israel llaqtantinmi serviwanqaku.+ Chaypin qankunawan kusisqa kasaq; qankunamantan mañasaykichis llapa ch’uya ofrendakunata, imaymana ofrendakunata, ñaupaq kaq ofrendakunatawan.+ 41 Chay ofrendakunaq sumaq q’apayninraykun may kusisqa qankunata juj llaqtakunamanta orqomusaykichis, maykunapichus ch’eqerisqa kashankichis chaykunamantan juñumusaykichis.+ Chhaynapin llapa nacionkuna rikushaqtin qankuna ukhupi ch’uyanchasqa kasaq,+ nispa.

42 ”Israel jallp’aman pusapuqtiymi+ qankunaqa yachankichis noqa Jehová Dios kasqayta.+ Chay jallp’atan noqaqa ñaupa taytaykichiskunaman qonaypaq jurarqani. 43 Chaypin qankunaqa yuyarinkichis llapa mana allinkuna ruwasqaykichista, imaymanakunawan qhellichakusqaykichista.+ Chaykunata yuyarispan qankunallataq millakunkichis* llapa chay mana allinkuna ruwasqaykichismanta.+ 44 Yau Israel runakuna, sutiyraykun noqaqa chaykunata ruwasaq,+ manan noqaqa qankunaq mana allinkuna ruwasqaykichisman jinachu ni millaykuna ruwasqaykichisman jinachu ruwasaq, chhaynapin yachankichis noqa Jehová Dios kasqayta, ninmi tukuy munayniyoq Señor Jehová Dios”, nispa.

45 Jujmantan Jehová Diosqa rimapayawarqan, paymi niwarqan: 46 “Runaq churin, uray ladota qhawarispa chay lado contra rimay, uray ladopi sach’akuna contra profetizay. 47 Chay sach’akunata niy: Jehová Diospa nisqanta uyariy. Tukuy munayniyoq Señor Jehová Diosmi nin: Ninatan qan contra jap’ichisaq,+ chay ninan llapa sach’aykikunata ruphapunqa, llapantan ch’akitapas q’omertapas ruphapunqa. Chay ninaqa manan wañunqachu,+ llapa uyakunatan ruphanqa uray ladomanta wichay ladokama. 48 Llapa runakunan rikunqaku noqa Jehová Dios chay ninata mana wañuspa raurananpaq jap’ichisqayta,+ nispa”.

49 Noqataq nirqani: “¡Ay tukuy munayniyoq Señor Jehová Dios! ¡Sasa entiendey rijch’anachiykunallatan kay runaqa riman!, nispan noqamanta nishanku”, nispa.