1 Crónicas
10 Filistea runakunan Israel runakunawan maqanakusharqanku, Israel runakunan ichaqa Filistea runakunamanta ayqekurqanku, jinan Israel runakunaqa Guilboa orqopi askha wañurqanku.+ 2 Filistea runakunaqa cercallantan qatipasharqanku Saultapas churinkunatapas. Jinan Jonatanta, Abinadabta, Malki-Shuatawan+ wañuchirqanku. Paykunaqa Saulpa churinkunan karqanku. 3 Filistea runakunaqa astawanraqmi Saúl contra maqanakurqanku, flechaqkunataq+ payta rikuruspa flechawan ayparachispa k’irirqanku. 4 Jinan Saulqa arma apaysiqninta nirqan: “Espadaykiwan wañuchiway, manan munanichu chay Diosta mana serviq* runakuna ñak’arichiwanankuta”,+ nispa. Arma apaysiqninmi ichaqa sinchi manchasqa kasqanrayku mana wañuchiyta munarqanchu. Chaymi Saulqa espadanta jap’ispa pay kikin wañuchikurqan.+ 5 Saulpa wañupusqanta rikuspan arma apaysiqninpas espadanta jap’ispa pay kikin wañuchikullarqantaq. 6 Chhaynapin Saulqa kinsantin churinkunapiwan wañupurqan. Wasinpi kaqkunapas paywan kuskan chaypi wañupurqanku.+ 7 Wayq’o uraypi tiyaq llapa Israel runakunan yacharurqanku Saulpas churinkunapas wañupusqankuta, chaymantapas rikullarqankutaqmi Israel soldadokunapas ayqekusqankuta. Chaykunata yachaspan paykunaqa llaqtankuta saqespa ayqekapurqanku. Chay qhepamantaq Filistea runakunaqa chay llaqtakunata jap’ikapurqanku.
8 Qhepantin p’unchaytaq Filistea runakunaqa wañusqakunamanta valorniyoq cosaskunata qechumuq rirqanku, jinan Guilboa orqopi+ Saultapas churinkunatapas wañusqata tarirqanku. 9 Saulta tarispataq p’achanta ch’utirqanku, umantapas qhorurqanku, armankunatapas ch’utirqanku. Chay pasasqantataq llapa Filistea runakunaman chayta willachimurqanku. Willachimullarqankutaqmi idolokunata yupaychananku wasikunapipas.*+ 10 Chaymantataq Saulpa armankunata diosninkuq wasinman churarqanku, umantataq Dagonpa* templonpi warkurqanku.+
11 Galaadpi tarikuq Jabés+ runakunan yacharurqanku Filistea runakuna Saulta imatachus ruwasqankuta.+ 12 Chaymi llapa soldadokuna rispanku Saulpa ayanta churinkunaq ayantawan Jabés llaqtaman apapurqanku, jinaspa tullunkunata Jabés llaqtapi kaq jatun sach’a k’uchupi p’ampapurqanku.+ Chaymantataq qanchis p’unchayta ayunarqanku.
13 Chhaynatan Saulqa wañurqan Jehová Diospaq mana junt’aq sonqochu kasqanrayku. Payqa manan Jehová Diospa kamachikuyninta kasukurqanchu,+ jinaspapas wañusqakunata tapuqmanmi rirqan+ 14 Jehová Diosta tapunanmantaqa. Chaymi Diosqa Saulta wañuchirqan, jinaspa Jesepa churin Davidta paypa rantinpi rey kananpaq churarqan.+