Jeremías
8 Jehová Diosmi nin: “Chay tiempopin Judá reykunaq tullunta, autoridadkunaq tullunta, sacerdotekunaq tullunta, profetakunaq tullunta, Jerusalenpi tiyaq runakunaq tulluntapas sepulturamanta orqomunqaku. 2 Jinaspan intiq ñaupanpi, killaq ñaupanpi, janaq pachapi kaq llapa ch’askakunaq ñaupanpi* mast’arparinqaku, chaykunatan paykunaqa munakurqanku, servirqanku, qatikurqanku, maskharqanku, chaykunamanmi k’umuykurqankupas.+ Chay tullukunaqa manan oqarisqachu ni p’ampasqapaschu kanqa, jallp’apaqmi wanu jina kapunqa”,+ nispa.
3 Ejercitokunata kamachiq Jehová Diosmi nin: “Kay millay suyumanta puchuqkunata, maykunamanchus ch’eqechisqaypi mana wañuqkunaqa wañuytan mañakunqaku”, nispa.
4 Diosmi niwarqan: “Paykunamanmi khaynata willamunki:
Jehová Diosmi nin: ¿Manachu pipas urmaspa jujmanta sayarinman?
¿Manachu jujnin kutiriqtin jujnin kutirillanmantaq?
5 ¿Imaraykun kay Jerusalén llaqta, mana saqeyta munanchu mana kasukuq kayninta?
Q’otukuq kayninkutan mana saqeyta munankuchu,
manan kutirikamuwayta munankuchu.+
6 Makillan rimasqankuta uyarimusharqani, imayna rimasqankuqa manapunin allinchu kasharqan.
Manan pipas, ¿imatataq kaytari ruwaruni?,+ nirqanchu. Manan pipas mana allinkuna ruwasqanmanta pesapakurqanchu.
Sapankan askha runaq purisqan ñanta puriyta munanku, guerraman phawaq caballokuna jinan kanku.
7 Cigüeñaqa yachanmi jayk’aq maymanpas rinanta,
urpipas, khallwapas,* chiwakupas yachankun jayk’aq kutipunankuta.
Llaqtaymi ichaqa mana reparanchu Diosnin Jehová Diospa juicionta,+ nispa.
8 ¿Imaynataq niwaqchis: Yachaysapan kanchis,
Jehová Diospa yachachikuyninkunapas* noqanchiswanmi kashan, nispa?
Mana allinllapaqmi secretariokunaq qelqanantapas jap’inku.+
9 Yachayniyoqkunapas p’enqachisqan kapunku,+
sinchi mancharisqan kashanku, jap’isqataqmi kanqaku.
¡Qhawariychis!, paykunan Jehová Diospa siminta pisicharqanku,
¿maytaq yachayniyoq kasqankuri?
10 Chayraykun warminkutapas waj qharikunaman qopusaq,
jallp’ankutapas waj runakunamanmi qopusaq,+
juch’uypas jatunpas llapankun jujkunata engañaspa qhapaqyanku,+
profetakunapas sacerdotekunapas llapankun llullakuspa suwakunku.+
11 Llaqtaypa* k’irinkunatapas* patallantan jampipayanku.
¡Thaj kaypin kashanchis! ¡Thaj kaypin kashanchis!, nispanku.
Manataqmi thaj kayqa kanchu.+
12 ¿P’enqarikunkuchu millakunapaq kaqkunata ruwasqankumanta?
Manan chhikallantapas p’enqarikunkuchu,
manan yachankuchu imachus p’enqakuy kasqanta,+
chayraykun paykunapas jujkuna jina urmanqaku,
muchuchisqaywanmi paykunaqa urmanqaku,+ ninmi Jehová Dios.
13 Juñumuspaymi paykunata chinkachipusaq.
Uvas sach’apipas higos sach’apipas manan juj rurullapas qhepanqachu, raphinkunapas ch’akipunqan.
Imaymana qosqaytapas qechupusaqmi, ninmi Jehová Diosqa”, nispa.
14 Paykunataq ninku: “¿Imaraykun kaypi tiyashanchis?
Juñunakusunchis, jaku allin perqasqa llaqtakunaman chaypi wañumunanchispaq.+
Jehová Diosninchisqa wañuchiwasunchismi,
venenoyoq unutan ujachiwanchis,+
Jehová Dios contran juchallikurqanchis.
15 Thaj kausaytan suyakusharqanchis,
ichaqa manan ima allinpas kanchu,
qhaliyachisqa kaytan suyakusharqanchis,
ichaqa sinchi manchakuyllan kashan.+
16 Danmantapachan enemigoq caballonkunaq samaqesqan uyarikun,
orqo caballonkuna wijijijiqtinqa jallp’araqmi kuyurin,
paykunan suyuman jaykuspa lliuta chinkachinku,
llaqtatapas chaypi tiyaq runakunatapas lliutan ch’usaqyachinku”, nispa.
17 “Qhawariychis, mach’aqwaykunatan kachamushaykichis,
picakuq mana mansoyachina mach’aqwaykunatan kachamushaykichis,
chay mach’aqwaykunan kanisunkichis” ninmi Jehová Dios.
18 Llakikuyniyqa mana thaniqmi,
sonqoyqa sinchi k’irisqan kashan.
19 Llaqtaypa* yanapayta mañakusqanmi uyarikun,
karu llaqtamantaraqmi khaynata uyarikun:
“¿Manachu Jehová Dios Sionpi kashan?
¿Manachu reyninpas chaypi kashan?”, nispa.
Diosmi nin: “¿Imaraykun phiñachiwarqankichis thupasqa idoloykichiskunawan?
¿Imaraykun phiñachiwarqankichis waj llaqtayoq mana valeq dioskunata yupaychaspaykichis?”, nispa.
20 Llaqtaymi wajakullantaq: “Cosecha tiempopas pasapunñan, q’oñi tiempopas tukukapunñan,
¡noqanchismi ichaqa mana salvasqachu kanchis!”, nispa.
Sinchi mancharisqan kashani.
22 ¿Manachu Galaadpi ima jampillapas* kan?+
¿Manachu chaypi jampiq kan?+