Jeremías
9 ¡May allinchá kanman umay unu pujyu kanman chayqa!
¡May kusachá kanman ñawiymanta unu phawamunman chayqa!+
Chhayna kaqtinqa llaqtamasiykunaq wañupusqanmantan tuta-p’unchay waqayman.
2 ¡May allinchá kanman ch’inneqpi alojakuna wasi kanman chayqa!
Chhayna kaqtinqa llaqtayta saqespan ripuyman,
paykunaqa llapallankun jujwan pantaqkuna kanku,+
llapallankun traicionerokuna kanku.
3 Qallunkuqa flechana jinan listollaña kashan llullakuspa rimanankupaq,
manan sut’illanta rimay kanchu,
llullakuyllan kay suyupiqa junt’a kashan.+
“Mana allinkunallatan ruwashanku, manan noqataqa kasukuwankuchu”+ ninmi Jehová Dios.
4 “Llapallanku runamasinkumanta cuidakuchunku,
ama wayqenkupipas confiachunkuchu.
5 Llapallankun runamasinkuta q’otunku,
manan pipas sut’illantaqa rimanchu.
Qallunkumanmi llullakuyta yachachinku,+
sayk’unankukaman mana allinkunata ruwashanku.
6 Q’otunakuy ukhupin kausashanki.
Q’otunakuypi purisqankuraykun paykunaqa mana reqsiyta munawarqankuchu” ninmi Jehová Dios.
7 Ejercitokunata kamachiq Jehová Diosmi nin:
8 Qallunqa wañuchiq flecha jinan, llullakuspan riman,
simillanmi runamasintaqa thaj kaymanta rimapayan,
sonqon ukhupin ichaqa mana allinta ruwananpaq yuyaykushan”, nispa.
9 “¿Manachu chaykunamanta cuentata mañanay?
¿Manachu chhayna nacionmanta vengakunay?”+ ninmi Jehová Dios.
10 “Orqokunaq imayna kashasqanmantan khuyayta waqasaq,
ch’inneqpi pastokunamantan llaki takita takisaq,
pastokunatan lliuta kanaykapunku, manan pipas chayninta purinñachu,
manañan uywakunaq waqasqanpas uyarikunñachu.
Phalaq animalkunapas ripunkun, uywakunapas ayqekapunkun.+
11 Jerusalentan rumi montonman tukuchipusaq,+
monte alqokunaq tiyananmanmi tukuchipusaq,+
Judá llaqtakunatan purunyachipusaq,
mana piqpa tiyananmanmi tukuchipusaq.+
12 ¿Pin allin yachayniyoq kanman kaykunata entiendenanpaq?
¿Pimanmi Jehová Dios kaykunata willarqan jujkunaman willananpaq?
¿Imaraykun kay jallp’a wañusqa jina kashan?
¿Imaraykun kay jallp’a ruphasqa ch’aki pampa jina kashan?
¿Imaraykun mana pipas chayninta purinñachu?” ninmi Diosqa.
13 Jehová Diosmi nin: “Paykunaman qosqay kamachikuykunatan* pisicharqanku, manan chayman jinachu kausarqanku, manan simiyta kasukurqankuchu. 14 Aswanpas k’ulluchakuspan sonqonkuq munasqanman jina purirqanku,+ taytanku jinan Baal idolokunata qatikurqanku.+ 15 Chayraykun ejercitokunata kamachiq Jehová Diosqa, Israelpa Diosninqa khaynata nin: Ajenjotan kay runakunaman mijuchisaq, venenoyoq unutan ujachisaq.+ 16 Mana reqsisqanku nacionkunamanmi paykunata ch’eqechisaq, manan ni taytankupas chay nacionkunataqa reqsirqankuchu,+ enemigonkuwanmi paykunata qatipachisaq ch’usaqyachisqa kanankukama,+ nispa.
17 Ejercitokunata kamachiq Jehová Diosmi nin:
Allin yuyaywan imatapas ruwaychis,
llaki takita takiq warmikunata wajachimuychis,+
allin takiy yachaq warmikunata wajachimuychis.
18 Usqhaylla jamuchunku llaki takita takipuwananchispaq,
chay takikunarayku ñawinchisman weqe junt’aykuchun,
ñawinchismanta weqe phawamuchun.+
19 Sionmantapachan khaynata waqamushanku:+
¡Imaraqmi khaynapi tarikunchis, ch’usaqyachisqan kapunchis!
¡P’enqaypin tarikunchis!
Llaqtanchismantan qarqompuwanchis, wasinchiskunatan thunipunku,+ nispa.
20 Warmikuna, Jehová Diosniykichispa siminta uyariychis.
Ninriykichis Diosniykichispa rimasqanta uyarichun.
Ususiykichiskunaman kay llaki takita yachachiychis,
qankunapura warmikuna kay llaki takita yachachinakuychis.+
21 Wañuymi wasinchisman ventananta jaykumun,
allin perqasqa torrenchiskunamanmi phawaykamun
callekunapi kaq wawakunata apakapunanpaq,
plazakunapi kaq waynakunata apakapunanpaq,+ nispa.
22 Kayta willamuy: Jehová Diosmi khaynata nin:
Campopin runakunaq ayan jallp’apaq wanu jina wijch’usqa kanqa,
rutuqkunaq qhepanpi trigo rutusqa jinan kanqa,
manan pipas oqariqninku kanqachu,+ nispa”.
23 “Yachayniyoqqa ama yachayniyoq kasqanmanta alabakuchunchu,+
atiyniyoqqa ama atiyniyoq kasqanmanta alabakuchunchu,
qhapaqqa ama qhapaq kasqanmanta alabakuchunchu”+ ninmi Jehová Dios.
24 “Pipas alabakuspaqa kaykunamanta alabakuchun:
Noqata reqsiwasqanmanta alabakuchun,+
noqa Jehová Dios kasqayta yachasqanmanta alabakuchun.
Noqaqa mana tukukuq munakuyta* rikuchiqmi kani,
kay jallp’api chanin kaqta, allin kaqta ruwaqmi kani,+
chaykunan noqataqa kusichiwan”+ ninmi Jehová Dios.
25 Jehová Diosmi nin: “Qhawariychis, cuenta mañanay p’unchayqa chayamushanñan. Llapa qhari kayninkupi señalasqa kayta cuerpollankupi rikuchiqkunamantan cuentata mañasaq.+ 26 Egipto runakunamantapas,+ Judá runakunamantapas,+ Edom runakunamantapas,+ Anmón runakunamantapas,+ Moab runakunamantapas,+ ninri pata chujchanku rutusqa ch’inneqpi tiyaq runakunamantapas cuentatan mañasaq.+ Llapa chay nacionkunapas llapa Israelpa mirayninkunapas sonqonkupiqa manan señalasqachu kanku”,+ nispa.