Jeremías
15 Jehová Diosmi niwarqan: “Moisesña, Samuelña jamuwanman chaypas, manan kay llaqtataqa khuyapayaymanchu.+ Ñaupaymanta jatarichunku. Ripuchunku. 2 Sichus nisunkiku: ¿Maytataq risaqkuri?, nispa chayqa, qanmi ninki: Jehová Diosmi khaynata nin:
¡Onqoywan wañunan kaqqa, onqoywan wañumuchun!
¡Espadawan wañunan kaqqa, espadawan wañumuchun!+
¡Yarqaywan wañunan kaqqa, yarqaywan wañumuchun!
¡Preso apasqa kanan kaqqa, preso apasqa kachun!,+ nispa.
3 ”Kay tawa ñak’ariykunatan* chayachimusaq:+ Espadatan chayachimusaq wañuchisqa kanankupaq, alqokunatan kachamusaq ayankuta apanankupaq, phalaq animalkunatataq cuerponkuta mijunankupaq, pampan puriq animalkunatataq puchuqta chinkachinankupaq,+ ninmi Jehová Dios. 4 Ezequiaspa churin Judá rey Manasespa juchanmantan, Jerusalenpi imachus ruwasqanmantan+ llapa suyukunaq mancharikunanman tukuchisaq.+
5 Jerusalén llaqta, ¿pin qanta khuyapayasunki?
¿Pin qanta llakipayasunki?
¿Pin qanmanta tapurikunqa?
6 Noqatan qanqa saqerpariwarqanki, ninmi Jehová Dios.+
Qhepanchawaspaykin* noqamanta karunchakurqanki.+
Makiytan qan contra jaywarisaq, jinaspan ñut’usayki.+
Sayk’uniñan sapa kuti qanta khuyapayaspa.
7 Wayrachinawanmi suyuq punkunkunapi wayrarparichisaykichis.*
Mana wawayoqtan saqesaykichis.+
Llaqtaytan thunichisaq, paykunaqa manan ñanninku saqeyta munankuchu.+
8 Viudakunapas lamar-qocha aqo jinaraqmi kanqaku.
Kuskan p’unchaytan ch’usaqyachiqta paykunaman kachamusaq,
mamakuna contran, waynakuna contran kachamusaq.
Qonqayllan yuyayninkuta chinkachisaq, manchakuywanmi atipachisaq.
9 Qanchis wawayoq warmin yuyayninta chinkachikushan,
ñak’aytan samapakushan,
p’unchayllaraq kashaqtinmi inti jaykupun,
p’enqasqan, pisichasqan chay warmiqa kashan.*
Paykunamanta puchuqkunataqa enemigonkumanmi qopusaq,
espadamanmi entregapusaq, ninmi Jehová Dios”,+ nispa.
10 ¡Imaraqmi noqamanta, mamalláy imapaqmi wachakuwarqanki!+
Ch’aqway ukhullapin, kay suyu runakunawan maqanakuyllapin kashani.
Manan imatapas mañarqanichu nitaqmi mañakurqanipaschu,
ichaqa llapallankun ñakashawanku.
11 Jehová Diosmi nirqan: “Yanapasaykipunin,
noqan enemigomanta pakaykusayki,
sinchi nanay tiempopin, sinchi llakikuy tiempopin pakaykusayki.
12 ¿Pipas fierrota, wichay lado fierrota cobretapas ñut’uyta atinmanchu?
13 Kaqniykikunatan, valorniyoq cosasniykikunatan apakapunqaku,+
mana imallapaqmi apakapunqaku,
llaqtaykikunapi imaymana jucha ruwasqaykimantan apakapunqaku.
14 Enemigoykikunamanmi entregaykusaq,
mana reqsisqa jallp’amanmi apakapunqaku.+
Phiñakuyniymi nina jinaraq raurarishan,
qankuna contran raurarishan”,+ nispa.
15 Diosníy Jehová, qanqa yachankiñan.
Yuyariykuway, qhawarimuway.
Enemigoykunamanta vengakuy.+
Ancha pacienciakuq* kasqaykirayku ama wañunayta munaychu.
Yuyariy qanrayku khayna k’amiwasqanku aguantasqayta.+
16 Simiykikunan tarisqa karqan, chaytan noqaqa mijupurqani,+
simiykikunan anchatapuni sonqoyta kusichiwarqan,
ejercitokunata kamachiq Jehová Dios, noqaqa sutiykitan apani.
17 Manan kusikuyllata maskhaqkunawanqa tiyaykunichu,
manan paykunawanqa kusikunichu.+
Noqaqa atiyniyoq makiykipin kashani, chaymi sapallay tiyaykuni,
noqapas qan jinan mana allin ruwaqkunapaq phiñasqa kashani.+
18 ¿Imaraykun nanayniy mana thaniq, k’iriypas mana jampiy atina?
Manapunin qhaliyanchu.
¿Mana confiana ch’akirapuq pujyumanchu noqapaq tukupunki?
19 Chayraykun Jehová Dios khaynata nin:
“Kutimuwanki chayqa kallpachasaykin,
ñaupaypin sayachisayki.
Allin kaqta mana allin kaqmanta t’aqanki chayqa,
noqaq rantiypi rimaqmi kanki.*
Paykunan qanman kutimusunkiku,
qanmi ichaqa mana paykunaman kutirinaykichu kanqa”, nispa.
20 “Cobremanta perqata jinan kay llaqtaq contranpi churayki.+
Paykunaqa qan contran maqanakunqaku, ichaqa manan atipasunkikuchu,+
noqan qanwan kashani salvanaypaq libranaypaqpas” ninmi Jehová Dios.
21 “Noqan millay runakunaq makinmanta librasayki,
mana khuyapayakuqkunaq makinmantan kacharichisayki” ninmi Diosqa.