1 Corintios

8 Kunanqa idolokunaman jaywasqa mijunamanta+ tapumuwasqaykichismantan qelqamusaykichis: Llapanchismi yachanchis chaykunamantaqa+ ¿riki? Ichaqa, yachayqa umatan oqarichin, munakuymi ichaqa runata kallpachan.+ 2 Pipas “yachanin” ninmanña chaypas, manaraqmi allintapuniraqchu yachan. 3 Pipas Diosta munakuqqa Diospa reqsisqanmi.

4 Kunanqa rimasun idolokunaman jaywasqa mijuna mijuymanta. Yachasqanchis jina, idoloqa manan imapaschu+ kay pachapiqa, chaymantapas jujllan Diosninchisqa.+ 5 Ichaqa janaq pachapipas kay pachapipas askhan kan dios nisqakunaqa,+ arí, askhatan ninku dios nispa, señor nispapas. 6 Noqanchispaqmi ichaqa juj Dioslla kan,+ paymi Taytanchis,+ paymantan tukuy imapas paqarimun, paypaqtaqmi kanchispas.+ Señorninchispas ch’ullallan, payqa Jesucriston; paywanmi tukuy imapas ruwasqa kashan,+ noqanchispas payraykun kausashanchis.

7 Ichaqa manan llapankuchu yachanku chaykunamanta;+ chaymi wakinqa ñaupaqpi ídolo adoraq kasqankurayku wakin mijunata qhawarinku idoloman jaywasqata jina,+ chhaynapitaq chayta mijuspaqa pisi kallpa concienciankuta qhellichanku.+ 8 Manan mijunachu Diosmanqa asuykachiwasun;+ manan mijuspachu allinqa kasun, manallataqmi mana mijuspachu mana allinqa kasun.+ 9 Chaywanpas, allinta cuidakuychis, qankunaqa atinkichisña ima munasqaykichistapas ajllakuyta chaypas, paqtataq chay ajllakusqaykichiswan pisi kallpayoqkunata urmachiwaqchis.+ 10 Yau allin yachaq runa, juj pisi kallpayoq runachus rikusunkiman ídolo adorana wasipi tiyaykuspa mijushaqta chayqa, ¿manachu paytaqa conciencian kallpachanqa idolokunaman jaywasqa mijunakunatawanraq mijunanpaq? 11 Chayta ruwaqtiykiqa qanpa yachayniyki jawan pisi kallpa iñiqmasiykiq iñiynin ñut’usqa kapunqa; payraykumá riki Cristoqa wañurqanpas.+ 12 Chhaynata ruwaspa iñiqmasiykichispa contranpi juchallikuspaqa paykunaq pisi kallpa concienciantan k’irishankichis,+ chhaynapitaq Cristoq contranpi juchallikushankichis. 13 Chayrayku, ima mijunapas iñiqmasiyta urmachinman chayqa, manañan jayk’aqpas aychata mijusaqchu, chhaynapi iñiqmasiyta mana urmachinaypaq.+