Mateo
19 Chaykunata rimayta tukuspan Jesusqa Galileamanta ripurqan, Judea linderoman* rirqan, Jordán mayu chimpaman.+ 2 Ancha askha runakunataq payta qatikurqanku, jinaspa onqosqakunata qhaliyachirqan.
3 Wakin fariseokunan payman qayllaykuspa pruebaman churayta munaspa tapurqanku: “¿Atinmanchu juj runa esposanmanta imaraykullapas t’aqakapuyta?”,*+ nispa. 4 Jesustaq nirqan: “¿Manachu leerqankichis runata kamaqqa qallariymantapacha qharita warmitawan kamasqanta?+ 5 Paymi nirqan: Chayraykun qhariqa taytantapas mamantapas saqepunqa, jinaspa esposanman jujllachakapunqa,* iskayninkutaq juj aychalla kapunqaku,+ nispa. 6 Chhaynaqa manan iskayñachu kanku, aswanpas juj aychallañan. Chayrayku, Diospa jujllachasqantaqa* ama pipas t’aqachunchu”,+ nispa. 7 Paykunataq nirqanku: “Chhaynaqa, ¿imaraykutaq Moisesri kamachirqan pi runapas t’aqanakuy papelta qospa esposanmanta t’aqakapunanpaq?”,+ nispa. 8 Jinan Jesusqa nirqan: “Moisesqa k’ullu sonqo kasqaykichisraykun mana jark’arqasunkichischu esposaykichismanta t’aqakunaykichista,+ ichaqa manan chhaynachu qallariypiqa karqan.+ 9 Chayraykun niykichis: Pipas esposan qhelli juchaman* mana urmashaqtin paymanta t’aqakuspa* jujwan casarakunman chayqa, pantay juchamanmi urmashanman”,+ nispa.
10 Jinan discipulonkunaqa nirqanku: “Chhaynataq chayqa, yanqañachá kanman casarakuyqa”, nispa. 11 Jesustaq paykunata nirqan: “Manan lliuchu chayman jina ruwayta atinkuman, aswanpas pikunatachus Dios yanapan* chaykunallan.+ 12 Wakinmi mana casarakuyta atinkuchu mana allin nacesqankurayku,* wakintaq runakunaq capasqanrayku; jujkunataq mana casarakunkuchu janaq pacha gobiernorayku. Pipas chhayna kayta atiqqa kallachun”,+ nispa.
13 Chaymantataq runakunaqa wawakunata Jesusman apamurqanku makinta paykunaman churaykuspa Diosmanta mañapunanpaq, discipulokunan ichaqa paykunata phiñarikurqanku.+ 14 Jinan Jesusqa nirqan: “Jinalla wawakunaqa noqaman jamuchunku, ama jark’aychischu, janaq pacha gobiernoqa paykuna jina kaqkunapaqmi”,+ nispa. 15 Chay wawakunaman makinta churaykuspataq chaymanta ripurqan.
16 Juj waynan payman qayllaykuspa nirqan: “Yachachikuq, ¿ima allinkunatan ruwanay wiñay kausayta chaskinaypaq?”,+ nispa. 17 Jesustaq nirqan: “¿Imanaqtinmi noqata tapuwanki imachus allin kasqanmanta? Jujllan ninman imachus allin kasqantaqa.*+ Kausaytachus chaskiyta munanki chayqa, kamachikuykunatan tukuy tiempo kasukunayki”,+ nispa. 18 Paytaq nirqan: “¿Mayqen kamachikuykunata?”, nispa. Jinan Jesusqa nirqan: “Aman pitapas wañuchinkichu,+ aman jujwan pantankichu,+ aman suwakunkichu,+ aman pitapas yanqamanta tumpankichu,+ 19 tayta-mamaykitan sumaqta qhawarinki,+ runamasiykitapas qan kikiykita jinan munakunki”,+ nispa. 20 Chay waynataq nirqan: “Chaykunataqa llapantan junt’ashani, ¿imatawanraqtaq ruwanayri?”, nispa. 21 Jinan Jesusqa nirqan: “Dios serviyniykita allintapuni junt’ayta munanki chayqa, phaway kaqniykikunata vendemuy, chaytataq wajchakunaman qomuy, chhaynapin janaq pachapi qhapaq kayniyki kanqa;+ jinaspa qatikamuway”,+ nispa. 22 Chayta uyarispan chay waynaqa sinchi llakisqa ripurqan askha kaqniyoq kasqanrayku.+ 23 Chaymi Jesusqa discipulonkunata nirqan: “Cheqaqtan niykichis: Qhapaq runapaqqa sasapunin kanqa janaq pacha gobiernoman jaykuyqa.+ 24 Nillaykichistaqmi: Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”,+ nispa.
25 Chayta uyarispan discipulonkunaqa ancha admirasqa nirqanku: “Chhaynaqa, ¿pillañataq salvasqari kanman?”,+ nispa. 26 Jesustaq paykunata qhawaykuspa nirqan: “Runakunaqa manan atinkumanchu chay ruwaytaqa, Diospaqmi ichaqa tukuy imapas atikuqlla”,+ nispa.
27 Jinan Pedroqa nirqan: “Noqaykuqa tukuy imata saqespaykun qatikamushaykiku, ¿imataq noqaykupaqri kanqa?”,+ nispa. 28 Jesustaq paykunata nirqan: “Cheqaqtan niykichis: Tukuy imapas mosoqyachisqa kanan tiempopin runaq Churinqa qhapaq trononpi tiyaykunqa, chaypin qankuna qatikamuwaqniykunapas, chunka iskayniyoq tiyanakunapi tiyaykullankichistaq, jinaspa Israelpa chunka iskayniyoq ayllunkunata juzgankichis.+ 29 Pipas wasintapas, wayqenkunatapas, panankunatapas, taytantapas, mamantapas, wawankunatapas, jallp’ankunatapas sutiyrayku saqeqqa, pachaj kutitawanraqmi chaskinqa, wiñay kausaytaq herencian kanqa.+
30 ”Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku.+