Malaquías

4 Ejercitokunata kamachiq Jehová Diosmi nin: “¡Qhawariychis! Ruphashaq horno jina p’unchaymi jamushan,+ chay p’unchaymi llapa jatunchakuqkuna, mana allin kaqta ruwaqkunapas ch’aki qora jina kanqaku. Chay p’unchaypin ruphasqa kanqaku, manataqmi saphinkupas ni juj raphillankupas puchunqachu. 2 Qankuna sutiyta manchakuqkunamanmi ichaqa chaninchay inti k’anchamusunkichis, k’anchayninmi qhaliyachisunkichis. Chaymi qankunaqa wirayachisqa malta toro jina saltaykachankichis”, nispa.

3 Ejercitokunata kamachiq Jehová Diosmi nin: “Chaykunata junt’achisqay p’unchaymi millay runakunata sarunkichis, paykunaqa chaki plantaykichispi jallp’a jinan kanqaku.

4 ”Yuyariychis kamachiy Moisesman qosqay leykunata, Horeb orqopi llapa Israel llaqtaman kasukunankupaq qosqay kamachikuykunata yachachikuykunatapas.+

5 ”¡Qhawariychis! Manaraq noqa Jehová Diospa jatun p’unchayniy, manchakunapaq p’unchayniy+ chayamushaqtinmi profeta Eliasta+ kachamusaykichis. 6 Paymi taytakunaq sonqonta wawakunaq sonqonman jina tukuchinqa,*+ wawakunaq sonqontataq taytakunaq sonqonman jina tukuchinqa,* chhaynapi jamuspa ama kay jallp’ata castigaspa chinkachinaypaq”, nispa.

(Kaypin hebreo, arameo rimaypi qelqasqa librokunaqa tukupun. Qatimuq librokunaqa griego rimaypin qelqakurqan).