Zacarías
13 ”Chay p’unchaymi juj pozo kichasqa kanqa Davidpa mirayninpas Jerusalenpi tiyaqkunapas juchankumanta, ima qhellimantapas ch’uyanchasqa kanankupaq”.+
2 Ejercitokunata kamachiq Jehová Diosmi nin: “Chay p’unchaymi suyupi idolokunata ch’usaqyachipusaq,+ manañan yuyarisqañachu kanqaku. Suyumantan profetakunata chinkachipusaq,+ millakusqay ruwaykunaman tanqaqkunatapas chinkachipusaqmi. 3 Sichus juj runa jujmanta profetizanman chayqa, churiyaqnin taytanmi wachakuqnin mamanmi ninqa: Qanqa Jehová Diospa sutinpi llullakuspa rimasqaykimantan wañunki, nispa. Kikin tayta-mamanmi profetizasqanmanta espadawan winaspa wañuchinqa.+
4 ”Chay p’unchaymi profetakunaqa rijuriykuna rikusqankuta willaspa p’enqakunqaku, manañan pelomanta ruwasqa profeta p’achawan churakuspa+ jujkunata engañanqakuñachu. 5 Aswanpas sapankankun paykunaqa ninqaku: Manan profetachu kani, chajra llank’aq runallan kani, noqataqa wayna kashaqtiymi juj runa kamachin kanaypaq rantikuwarqan, nispa. 6 Sichus pipas tapunqa: ¿Imaraykun cuerpoyki* k’irisqa kashan?, nispa chayqa, khaynatan kutichinqa: Amigoykunaq wasinpin chayta ruwaruwanku, nispa”.
7 Ejercitokunata kamachiq Jehová Diosmi nin:
“Espada, michiqniy contra sayariy,+ compañeroy contra jatariy.
Michiqta k’iriy,+ t’aqamanta ovejakunataq ch’eqechisqa kachun.+
Pisipaq qhawarisqakunata wanachinaypaqmi makiyta jaywarisaq”, nispa.
8 Jehová Diosmi nin:
“Llapa suyuntinpin kinsa t’aqamanta iskay t’aqa wañuchisqa kanqa,
juj t’aqallañan qhepanqa.
Paykunan sutiymanta wajakamuwanqaku,
noqataq uyarimusaq.
Noqan nisaq: Paykunaqa llaqtaymi,+ nispa.
Paykunataq ninqaku: Jehová Diosqa Diosniykun, nispa”.