1 Reyes

6 Egiptomanta Israel runakuna* lloqsimusqankumanta+ tawa pachaj pusaq chunka wata pasasqan qhepamanmi rey Salomonqa Jehová Diospa wasinta* ruwayta qallarirqan.+ Chay wasitan ruwayta qallarirqan tawa wataña kamachikushaqtin, ziv killapi*+ (chayqa karqan iskay kaq killan). 2 Khaynan karqan Jehová Diospaq Salomonpa templo ruwapusqanqa: Largonmanmi karqan soqta chunka codo,* anchontaq karqan iskay chunka codo, altontaq kinsa chunka codo.+ 3 Ch’uya cuartoman* jaykunapin karqan juj sala jina jatun punku.+ Chay jatun punkuq largonmi karqan temploq anchon jina iskay chunka codo, anchontaq karqan chunka codo.

4 Chay ruwachisqan temploq marcoyoq ventanankunan+ karqan ukhunman aswan jatun jawanmantaq juch’uylla. 5 Chay temploq muyuriqninpitaq perqata sayarichispa cuartokunata ruwarqan.+ Chay cuartokunaqa karqan ch’uya cuartoq* jinallataq aswan ukhupi kaq ch’uyay-ch’uya cuartoq* muyuriqninpin.+ 6 Temploq muyuriqninpi cuartokunaqa kinsa patan karqan. Uranpi muyuriq cuartokunan karqan pisqa codo anchoyoq, iskay pata muyuriq cuartokunataq soqta codo anchoyoq, kinsa pata muyuriq cuartokunataq qanchis codo anchoyoq. Chay kinsa pata cuartokunata ruwanankupaqqa chay wasi perqaq muyuriqninpin sapanka ladopi kinsa patata saqerqanku repisata jina, chay patamantaq vigakunata chakarqanku, chhaynapin temploq perqankunataqa mana t’oqorqankuchu.+

7 Diospa wasinta ruwanankupaqqa thupasqatañan rumikunata apamuqku,+ chaymi chay wasita ruwashaqtinkuqa mana martillowanpas, hachawanpas ni fierromanta ima herramientawanpas takarqankuchu, chhaynapin mana ima takasqankupas uyarikurqanchu. 8 Temploq muyuriqninpi pampa kaq cuartokunaman jaykunapaqmi paña ladopi* punku karqan.+ Iskay kaq pataman, kinsa kaq pataman seqanapaqtaq gradaskuna karqan. 9 Chhaynatan Salomonqa templota ruwashallarqan, jinaspa tukurqan.+ Temploq techontan ruwarqan cedro vigakunawan, cedro tablakunawan ima.+ 10 Salomonqa temploq muyuriqninpin kinsa pata cuartokunata ruwarqan.+ Chay cuartokunaqa sapankan pisqa codo sayayniyoq karqan. Chaykunaqa temploq perqanmanmi cedro maderawan chakasqa karqan.

11 Chay tiempopin Jehová Diosqa Salomonta nirqan: 12 “Sichus kamachisqayman jina purinki, chaninchayniykunata junt’anki, tukuy kamachikuyniykunata kasukunki, chayman jinataq kausankipas+ chayqa, papayki Davidman prometesqayman jinan kay ruwasqayki wasipi tiyasaq.+ 13 Chhaynapin Israel runakuna ukhupi tiyasaq,+ Israel llaqtaytaqa manan jayk’aqpas saqesaqchu”,+ nispa.

14 Salomonqa tukunankaman ruwashallarqan Diospa wasinta. 15 Temploq ukhu perqankunatan cedro maderakunawan muyuriqta k’askachirqan, pampamanta techokama. Temploq pampantataq enebro maderakunawan mast’arqan.+ 16 Chaymantapas templo ukhu k’uchupin ruwarqan iskay chunka codo largoyoq cuartota. Chay cuarto ukhutan muyuriqta pampamanta techokama cedro maderakunawan churarqan. Chhaynatan ruwarqan aswan ukhupi kaq ch’uyay-ch’uya cuartota.+ 17 Ch’uyay-ch’uya cuartoq ñaupanpitaq ch’uya cuarto*+ karqan, chay cuartoq largonmi karqan tawa chunka codo. 18 Templo ukhu perqakunapi kaq cedro maderakunaqa llapanmi adornokunayoq karqan. Wakinpin karqan calabazakuna+ wakinpitaq t’ikarishaq t’ikakuna.+ Templo ukhuqa llapanmi cedro maderawan k’askachisqa karqan, chaymi rumi perqaqa mana reparakurqanchu.

19 Salomonqa aswan ukhupi kaq ch’uyay-ch’uya cuartotan+ allinta allicharqan Jehová Diospa rimanakuynin arcata chayman churananpaq.+ 20 Chay ch’uyay-ch’uya cuartoqa largonmanpas, anchonmanpas, altonmanpas iskay chunka codon karqan.+ Chay cuartotaqa ch’uya qoriwanmi lliuta forrarqan, altartataq cedro maderawan forrarqan.+ 21 Temploq ukhuntan Salomonqa ch’uya qoriwan lliuta forrarqan,+ qoriwan forrasqa ch’uyay-ch’uya cuartoq ñaupanmantaq qori cadenakunata churarqan.+ 22 Templo ukhutaqa lliutan qoriwan forrarqan. Aswan ukhupi kaq ch’uyay-ch’uya cuartoq qayllanpi kaq altartapas qoriwanmi forrarqan.+

23 Aswan ukhupi kaq ch’uyay-ch’uya cuartopin ruwarqan pino maderamanta iskay querubín angelkunata.+ Sapanka querubinkunaq sayayninmi karqan chunka codo.+ 24 Chay querubinkunaq sapanka rafranmi karqan pisqa codo, chaymi juj rafraq puntanmanta juj kaq rafraq puntankamaqa chunka codo karqan. 25 Juj kaq querubinpa sayayninpas chunka codon kallarqantaq. Iskaynin querubinkunaqa igual-llan karqanku sayayninpipas formanpipas. 26 Iskaynin querubinkunan chunka codo sayayniyoqkama karqanku. 27 Chay querubinkunatan+ aswan ukhupi kaq ch’uyay-ch’uya cuartoman churarqan. Chay querubinkunaq rafrankunaqa mast’arisqan kasharqan, jinan sapanka querubinpa jujnin rafranpa puntanqa perqaman tupasharqan, jujnin rafrankutaq chaupipi tupanakurqanku. 28 Salomonqa chay querubinkunatan qoriwan forrarqan.

29 Templopi kaq iskaynin cuartokunaq perqankunapin thuparqan querubinkunata,+ palmera sach’akunata,+ t’ikarishaq t’ikakunatawan.+ 30 Chay iskaynin cuartokunaq pampantataq qoriwan forrarqan. 31 Aswan ukhupi kaq ch’uyay-ch’uya cuartoman jaykunapaq iskayman kichakuq punkutapas pino maderamantan ruwarqan. Ruwallarqantaqmi punkuq ladonkunapi columnakunatapas, punku jap’iq k’aspikunatapas, pisqa kaq partenta jina.* 32 Ch’uyay-ch’uya cuartoman jaykuna iskayman kichakuq punkuqa pino maderamantan karqan. Chay punkupin thuparqan querubinkunata, palmera sach’akunata, t’ikarishaq t’ikakunatawan. Chaymantataq chay querubinkunata palmera sach’akunatawan qoriwan forrarqan. 33 Ch’uya cuartoman* jaykunapipas punku jap’iq k’aspikunatan pino maderamanta churarqan, tawa kaq partenta jina.* 34 Chay jaykunapin iskay punkukunata ruwachirqan enebro maderamanta. Sapanka punkutaq iskayman kichakuq karqan, punku jap’iq k’aspikunataq p’ujtu rumi patapi churasqa karqan, chhaynapi punku muyunanpaq.+ 35 Chay punkukunapitaq thupachirqan querubinkunata, palmera sach’akunata, t’ikarishaq t’ikakunatawan, chaymantataq chaykunata qoriwan forrarqan.

36 Salomonmi ukhu patioq+ muyuriq perqanta thupasqa rumikunawan kinsa patata perqachirqan, patanmantaq muyuriqta cedro vigakunawan churarqan.+

37 Tawa wataña Salomón kamachikushaqtinmi, ziv killapi* Jehová Diospa wasinpa cimentacionninkunata churarqanku.+ 38 Wasi ruwaytataq tukurqanku chunka jujniyoq wataña Salomón kamachikushaqtin, bul killapi* (chayqa pusaq kaq killan karqan). Chay wasitaqa planoq nisqanman jinapunin lliuta ruwarqanku.+ Chhaynapin Salomonqa qanchis watapi chay wasi ruwayta tukurqan.