2 Crónicas
9 Saba nacionmanta reinan+ uyarirqan Salomonqa allin yachayniyoq kapusqanta, chaymi payqa jamurqan sasa tapuykunawan Salomonpa yachayninta pruebaman churananpaq. Chay reinaqa ancha askha kamachikunantinmi Jerusalén llaqtaman chayamurqan. Paymi camellonkunapi apamurqan bálsamo aceiteta, askha qorita,+ ancha valorniyoq munay rumikunatawan. Chaymantataq Salomonpa kasqanman jaykuspa lliu tapuy munasqanta tapurqan.+ 2 Salomonmi ichaqa llapa tapusqanta kutichirqan, paypaqqa manan ima tapusqanpas sasa kutichiychu karqan.
3 Saba nacionmanta reinan repararqan Salomonqa allin yachayniyoqpuni kasqanta.+ Chaymantapas rikurqanmi ruwasqan wasita,+ 4 sumaq mijuykuna mijusqanta,+ kamachinkuna imaynachus mesapi tiyasqankuta, mijuna serviqkunata, chay mijuna serviqkuna imayna p’achasqachus kasqankuta, copa jaywaqkunata, copa jaywaqkuna imayna p’achasqachus kasqankuta, Jehová Diospa wasinpi sapa kutilla ruphachina sacrificiokuna jaywasqantapas.+ Tukuy chaykunata rikuspan chay reinaqa admirasqa chiriyarqanraq. 5 Chaymi rey Salomonta nirqan: “Lliu ruwasqaykimantapas allin yachayniyoq kasqaykimantapas llaqtaypi kashaspa uyarisqayqa cheqaqpunimá kasqa. 6 Nisqankutaqa manan noqaqa creerqanichu, kunanmi ichaqa ñawiywanpuni rikuspa chayraq creeni.+ Willawasqankuqa manamá imapaschu kasqa,+ qanqa ancha yachayniyoqpunimá kasqanki.+ 7 Qanwan kaq runaykikunapas kamachiykikunapas ancha kusisqachá kanku sapa p’unchay yachayniykita uyarispaqa. 8 ¡Jatunchasqa kachun Jehová Diosniykiqa! Jehová Diosniykin allinpaq qhawarispa trononpi tiyachirqasunki llaqtanta kamachinaykipaq. Payqa Israel llaqtantan munakun,+ chaymi wiñaypaq kausanankuta munaspa reyta churarqasunki, chhaynapi paykunata chanin kaywan allinta kamachinaykipaq”, nispa.
9 Jinan Saba nacionmanta reinaqa rey Salomonman qorqan pachaj iskay chunka talento* pesaq qorita,+ askha bálsamo aceiteta, ancha valorniyoq munay rumikunatawan. Saba nacionmanta reinaqa askhatapunin bálsamo aceiteta Salomonman apamurqan, chay qhepamanqa manan pipas chhaytukuy bálsamo aceitetaqa apamurqanñachu.+
10 Ofirmanta+ qorita apamuq Hirampa kamachinkunapas Salomonpa kamachinkunapas apamullarqankutaqmi sándalo maderakunata, ancha valorniyoq munay rumikunatapas.+ 11 Chay sándalo maderakunawanmi rey Salomonqa ruwarqan Jehová Diospa wasinpa escalerankunata+ reypa wasinpa* escalerankunatawan.+ Chaymantapas chay maderakunawanmi ruwallarqantaq takiqkunapaq arpakunata, cuerdayoq tocanakunatapas.+ Manan jayk’aqpas Judá jallp’apiqa chhayna maderakunata rikukurqanchu.
12 Rey Salomonqa Saba nacionmanta reinamanmi tukuy munasqanta, llapa mañakusqanta qorqan. Jinaspapas Salomonqa reinaq apamusqanmantapas mastaraqmi* qorqan. Chay qhepamanmi Saba nacionmanta reinaqa kamachinkunapiwan llaqtanman kutipurqan.+
13 Rey Salomonqa sapa watan chaskiq yaqa iskay chunka kinsayoq waranqa kilo* qorita.+ 14 Chaymantapas Salomonmanmi qorita qolqeta apamullarqankutaq negocio ruwaqkuna, waj ladomanta comerciantekuna, jinallataq Arabia ladopi kaq llapa reykuna, Israelpi kamachikuqkunapas.+
15 Rey Salomonqa iskay pachaj jark’apakuna jatun escudokunatan ruwarqan juj metalwan mezclasqa qorimanta+ (sapanka escudotan bañarqan yaqa qanchis kilo* mezclasqa qoriwan).+ 16 Ruwallarqantaqmi kinsa pachaj jark’apakuna juch’uy escudokunatapas* juj metalwan mezclasqa qorimanta (chay escudokunatapas sapankatan bañarqan yaqa iskay kilo* qoriwan). Chay escudokunatan rey Salomonqa churarqan Líbano Sach’a-sach’a nisqa wasiman.+
17 Chaymantapas rey Salomonqa tiyanan tronotan marfilmanta ruwarqan chaytataq ch’uya qoriwan forrarqan.+ 18 Tronoq kasqanman chayanapaqqa soqta gradaskunan karqan, chay tronoman k’askasqataq karqan chaki saruna. Tronoqa iskaynin ladonpi maki samachinayoqmi karqan, sapanka ladonpitaq juj leonpa rijch’aynin kasharqan.+ 19 Sapanka grada patapin iskay leonkuna kasharqan,+ juj paña ladopi jujtaq lloq’e ladopi, llapanpiqa chunka iskayniyoqmi karqan. Manan mayqen reypas chhayna tronoyoqqa karqanchu. 20 Rey Salomonpa copankunapas qorimanta ruwasqan karqan, Líbano Sach’a-sach’a nisqa wasipi kaq serviciokunapas llapanmi ch’uya qorimanta ruwasqa karqan. Salomonpa tiemponpiqa mana valorniyoqmi qolqeqa karqan,+ chaymi Salomonqa mana imatapas qolqemantaqa ruwarqanchu. 21 Hirampa+ kamachinkunan Salomonpa barconkunata Tarsisman+ apaqku. Chay barcokunapin sapa kinsa wata apamuqku qorita, qolqeta, marfilta,+ monokunata, pavo realkunatawan.
22 Rey Salomonqa pachantinpi reykunamantapas aswan qhapaqmi aswan yachayniyoqmi karqan.+ 23 Chaymi reykunaqa pachantinpi llaqtakunamanta paywan tupaq jamurqanku, chhaynapi Diospa qosqan yachayninta uyarinankupaq.+ 24 Chay runakunan sapa wata apamuqku qorimanta qolqemanta regalokunata, p’achakunata,+ armakunata, bálsamo aceitekunata, caballokunata, mulakunata ima. 25 Salomonpa caballonkunata waqaychananmi karqan tawa waranqaman t’aqasqa, chaypin carretakunata aysaq caballonkunata waqaychaq, caballonkunaqa* chunka iskayniyoq waranqan karqan.+ Chaykunatan waqaycharqan carreta waqaychana llaqtakunapi, wakintataq waqaycharqan Jerusalén llaqtapi, reypa qayllanpi.+ 26 Salomonqa lliu llaqtakunatan kamachirqan Éufrates mayumanta Filistea runakunaq tiyasqan jallp’akama, uray ladomantaq Egiptowan linderokama.*+ 27 Jerusalenpin rey Salomonqa rumita jinaraq qolqeta askhata juñurqan, cedro maderatapas Sefelá ladopi sicómoro sach’akunata jinaraqmi askhata juñurqan.+ 28 Chaymantapas caballokunatan Salomonpaq apamuqku Egiptomanta+ jinallataq llapa nacionkunamantapas.
29 Salomonpa ruwasqanmanta wakin willakuykunan+ llapallan qelqasqa kashan profeta Natanpa qelqasqanpi,+ Siló llaqtayoq profeta Aiyaq+ qelqasqanpi, jinallataq Idó profetaq+ Diospa rikuchisqanta qelqasqanpi. Idó profetaqa Nebajpa churin Jeroboanwan+ imachus pasanantan profetizarqan. 30 Salomonqa tawa chunka watan Jerusalenmanta lliu Israel llaqtata kamachirqan. 31 Chaymantataq Salomonqa ñaupa taytankuna jina wañukapurqan, jinaspa Davidpa Llaqtan nisqapi p’ampapurqanku.+ Chay qhepamantaq churin Rehoboam kamachikuyta qallarirqan.+