2 Samuel
10 Tiempowanmi Anmón runakunaq+ reyninqa wañupurqan, jinan wawan Anún kamachikuyta qallarirqan.+ 2 Chaymi Davidqa nirqan: “Najás khuyapayawasqanraykun noqapas wawan Anunta khuyapayasaq”,* nispa. Jinan Davidqa kamachinkunata kacharqan papan wañupusqanmanta Anunta kallpachamunankupaq. Davidpa kamachinkuna Anmón runakunaq jallp’anman chayaqtinkun ichaqa, 3 Anmón runakunaq autoridadninkuna rey Anunta nirqanku: “Papayta jatunchananpaqmi Davidqa kamachinkunata noqaman kachamushawan kallpachawananpaq nishankipaschá. Payqa llaqtanchista qhawaqtan kamachinkunata kachamushan, chhaynapi atipawananchispaq”, nispa. 4 Chaymi Anunqa Davidpa kamachinkunaq sunkhanta kuskanta rutururqan,+ p’achankutataq sikipatanmanta urayman kuchurparirqan, chaymantataq kacharparipurqan. 5 Kamachinkunata millayta pisichasqankuta yacharuspan rey Davidqa runankunata kacharqan: “Jericó+ llaqtallapiraq qhepakamuychis sunkhaykichis wiñanankama, chaymantaña jampunkichis”, nispa nimunankupaq.
6 Tiempowanmi Anmón runakunaqa repararqanku David paykunata cheqnikusqanta. Jinan Anmón runakunaqa wakin runakunata kacharqanku soldadokunata contratamunankupaq. Bej-Reofmanta+ Zobamantawanmi+ iskay chunka waranqa Siria soldadokunata contratamurqanku. Istofmantataq* chunka iskayniyoq waranqa soldadokunata contratamurqanku. Chaymantapas Macá+ reyta waranqa soldadokunatawanmi contratamurqanku.+ 7 Chayta yacharuspan Davidqa Joabta kacharqan llapa soldadokunatawan. Paykunawan kuskatan kachallarqantaq aswan kallpasapa soldadokunatapas.+ 8 Anmón runakunataq llaqta punkuman lloqsimuspanku maqanakunankupaq filapi listo kasharqanku. Zobamanta Rehofmanta Siria soldadokunataq, Istofmanta* Macamanta soldadokunawan juj ladopi llaqta jawapi kasharqanku.
9 Joabmi rikurqan ñaupanta qhepanta paywan maqanakunankupaq soldadokuna jamushaqta, chaymi ajllarqan aswan allin Israel soldadokunata. Chay soldadokunatataq Siria soldadokunawan maqanakunankupaq listota filapi churarqan.+ 10 Wakin soldadokunata umallinanpaqtaq wayqen Abisaita+ churarqan, chhaynapi Anmón runakunawan+ maqanakunankupaq. 11 Jinan Joabqa Abisaita nirqan: “Siria soldadokuna atipashawanqaku chayqa qan yanapawanki, qanta Anmón soldadokuna atipashasunki chaytaq noqa yanapasayki. 12 Chhaynaqa, llaqtanchisrayku Diosninchispa llaqtankunarayku ama manchakuspa maqanakusun,+ Jehová Diosmi yanapawasun”,+ nispa.
13 Jinan Joabqa soldadonkunapiwan Siria soldadokunawan maqanakuq rirqanku, Siria soldadokunan ichaqa ayqekurqanku.+ 14 Chayta rikuspan Anmón runakunaqa Abisaimanta ayqekuspa llaqta ukhuman jaykurqanku. Joabqa manañan Anmón runakunata qatiparqanñachu, aswanmi Jerusalenman kutipurqan.
15 Israel runakunawan atipachikusqankuraykun Siria soldadokunaqa jujmanta juñukullarqankutaq.+ 16 Jinan Adadezerqa+ Éufrates mayu+ ladopi kashaq Siria soldadokunata wajachimurqan, jinan paykunaqa Sobac umallinkuwan kuska Elanman jamurqanku. Sobacqa Adadezerpa soldadonkunaq umallinmi karqan.
17 Chayta willaruqtinku jinan Davidqa Israelmanta llapa soldadokunata juñurqan, jinaspa Jordán mayuta chimpaspa Elanman chayarqan. Jinan Siria soldadokunaqa filapi churakurqanku Davidwan maqanakunankupaq, chaymantataq maqanakuyta qallarirqanku.+ 18 Siria soldadokunan ichaqa Israel soldadokunamanta ayqekurqanku. Chaypin Davidqa wañuchirqan qanchis pachaj carreta manejaqkunata, tawa chunka waranqa caballopi sillaykusqa Siria soldadokunata. Wañuchillarqantaqmi Siria soldadokunaq umallin Sobactapas.+ 19 Israel runakunawan atipachikusqankuraykun Adadezerpa kamachinpi kaq reykunaqa Israel runakunawan thajpi kausapunankupaq rimanakurqanku, chhaynapin Israel runakunaq kamachin kapurqanku.+ Chaymantapachan Siria runakunaqa Anmón runakunata yanapayta manchakapurqanku.