2 Crónicas
1 Davidpa churin Salomonpa kamachikuyninqa pisi-pisimantan allin tajyasqa kapurqan. Salomontaqa Jehová Diosmi yanaparqan, chaymi payqa allin reqsisqa aswan atiyniyoq kapurqan.+
2 Salomonmi llapa Israel runakunata wajachirqan: Waranqa runakunaq umallinkunata, pachaj runakunaq umallinkunata, juezkunata, familiapi umallikunata, Israelpi kaq llapa umallikunatawan. 3 Chaymantataq Salomonqa llapa Israel runakunapiwan rirqanku Gabaonpi+ kaq Dios yupaychana patata,* chay patapin kasharqan Diospa karpanqa. Chay karpataqa Jehová Diospa kamachin Moisesmi ruwarqan ch’inneq pampapi kashaspa. 4 Diospa rimanakuynin arcatan* ichaqa Quiryaj-Jearin+ llaqtamanta Jerusalén llaqtaman Davidqa aparqanña, chaypin Davidqa juj karpata ruwachirqan rimanakuy arcapaq.+ 5 Uripa churin Bezalelpa+ ruwasqan cobremanta altartaq+ Jehová Diospa karpanpa ñaupanpi kasharqan, chay altarpa ñaupanpin Salomonpas llapa runakunapas Diosmanta mañakuqku.* Uriqa Hurpa churinmi karqan. 6 Chaymantataq Salomonqa Gabaonpi kaq Dios yupaychana patapi Jehová Diosman jaywarqan waranqa ruphachina ofrendakunata. Chay ofrendakunatan jaywarqan cobremanta altar patapi.+
7 Chay tutan Diosqa Salomonman mosqoyninpi rijurirqan, jinan nirqan: “Ima munasqaykitapas qosaykin, mañakullaway”,+ nispa. 8 Jinan Salomonqa Diosta nirqan: “Diosníy, qanqa mana tukukuq jatun munakuyniykitan papay Davidman rikuchirqanki,+ kunantaq paypa rantinpi reyta churawanki.+ 9 Chayrayku Jehová Diosníy, papay Davidman prometesqaykita llapanta junt’ay.+ Qanmi khaytukuy runakunata kamachinaypaq churawanki, kay runakunaqa kay pachapi ñut’u jallp’a jinaraqmi askhallaña kanku.+ 10 Chayrayku Diosníy, yachaytawan allin yuyayniyoq kaytawan qoykuway+ kay llaqtaykita allinta juzganaypaq. Kay llaqtaykipi runakunaqa sinchi askhapunin, manan pipas payllamantaqa juzgayta atinmanchu”,+ nispa.
11 Jinan Diosqa Salomonta nirqan: “Qanqa manan qhapaq kaytachu, imaymanayoq kaytachu, jatunchasqa kaytachu, enemigoykikunaq wañunantachu, unay tiempo kausaytapaschu mañakuwarqanki, aswanmi kay llaqtayta juzganaykipaq sonqomanta mañakuwarqanki yachayta allin yuyayniyoq kaytawan.+ 12 Chayraykun qosayki yachaytapas allin yuyayniyoq kaytapas; chaymantapas qollasaykitaqmi qhapaq kayta, imaymanayoq kayta, jatunchasqa kaytapas. Tukuy chaykunataqa manan ñaupaq reykunaqa chaskirqankuchu nitaq qanman qatiq reykunapas chaskinqakuchu”,+ nispa.
13 Chaymantataq Salomonqa Gabaonpi+ kaq yupaychana patamanta, Diospa karpanpa ñaupanmanta Jerusalén llaqtaman kutimpurqan, chay llaqtamantan payqa Israel runakunata kamachirqan. 14 Salomonqa askhatan carretakunatapas caballokunatapas* juñushallarqan. Carretankunan karqan waranqa tawa pachaj, caballonkunataq* karqan chunka iskayniyoq waranqa.+ Chaykunatan waqaycharqan carreta waqaychana llaqtakunapi,+ wakintataq waqaycharqan Jerusalén llaqtapi, reypa qayllanpi.+ 15 Jerusalenpin rey Salomonqa qolqetapas qoritapas rumita jinaraq askhata juñurqan,+ cedro maderakunatapas Sefelá ladopi sicómoro sach’akunata jinaraqmi askhata juñurqan.+ 16 Salomonpaqqa Egiptomantan caballokunata apamurqanku.+ Reypa comerciantenkunaqa tropantintan caballokunata rantimuqku* jayk’achus valesqanman jina.+ 17 Egiptomanta apamusqanku carretakunaqa sapankan soqta pachaj qolqe valerqan, sapanka caballotaq pachaj pisqa chunka qolqe valerqan, chaykunatataq vendeqku Siria reykunaman Het runakunaq reyninkunaman ima.