Isaías
7 Judá ayllupi Jotanpa churin Ajaz kamachikushaqtinmi+ (Jotanqa Uziaspa churinmi karqan), Siria rey Rezinwan Israel rey Pecawan+ (Pecaqa Remaliaspa churinmi karqan) Jerusalén contra maqanakuq jamurqanku, ichaqa manan chay llaqtata jap’ikapuyta atirqankuchu.+ 2 Davidpa familianmanta kamachiqmanmi willamurqanku: “Siria runakunan Efraín* runakunawan qan contra juñukunku”, nispa.
Jinan rey Ajazpas llapa runankunapas manchakuymanta khatatatarqanku,* imaynan sach’apas wayra wayramuqtin chhafchikun jinataraq.
3 Jinan Jehová Diosqa Isaiasta nirqan: “Ama jinachu kay, churiyki Sear-Jasufwan* riychis Ajazwan tupaq,+ paywanmi tupanki jawa kaq estanqueman jaykuq yarqhaq* ladonpi,+ chayqa kashan p’acha t’aqsaqkunaq purinan ñanpin. 4 Paytan ninki: Allinta cuidakuy, ama manchakuychu, ama khatatataychu. Amataq pisi kallpayaychu Siria rey Rezinpa phiñakusqanwan, Remaliaspa churin phiñakusqanwanpas,+ paykunaqa iskay q’osñishaq llant’a jinallan kanku. 5 Siria runakuna, Efraín runakuna, Remaliaspa churin iman, qan contra jatarinankupaq rimanakunkuña. Paykunan nishanku: 6 Jaku Judá ayllu contra risun, paykunata ñut’umusun, jallp’ankutapas jap’ikampusun, jinaspa Tabelpa churinta chaypi reyta churamusun,+ nispa.
7 ”Tukuy munayniyoq Señor Jehová Diosmi nin:
Paykunaq yuyaykusqankuqa manapunin junt’akunqachu.
8 Damasco llaqtaqa Siriaq umanmi,
Rezintaq Damasco llaqtaq reynin.
Soqta chunka pisqayoq watallapin Efraín nacionqa lliu thunisqa kanqa,
chay llaqtaqa chinkachisqan kanqa.+
Manachus tukuy sonqo iñinkichis chayqa,
manan allin tajyasqachu kankichis, nispa”.
10 Jehová Diosmi Ajazta nillarqantaq: 11 “Jehová Diosniykimanta juj señalta mañakuy.+ Maypiña chay señalta ruwananta munanki chaypas ruwapusunkin, Sepultura* ukhupiña, janaq pachapiña munanki chaypas ruwapusunkin”, nispa. 12 Ajaztaq nirqan: “Manan imatapas mañakusaqchu manataqmi Jehová Diostapas pruebaman churasaqchu”, nispa.
13 Jinan Isaiasqa nirqan: “Davidpa miraynin runakuna, ama jinachu kaychis uyariwaychis. ¿Manachu runakunaq paciencianta tukuspa sayk’unkichis? ¿Kunanqa Diospa pacienciantañataqchu tukuyta munashankichis?+ 14 Jehová Diosqa kay señaltan qosunkichis. ¡Qhawariychis! Juj sipasmi onqoq rijurinqa, paymi juj qhari wawata onqokunqa,+ Emanuel* nispataq sutichanqa.+ 15 Chay wawaqa allin kaqta mana allin kaqta reparasqan tiempopaqqa ñan mijunqaña mantequillatawan miel misk’itawan. 16 Chay wawa manaraq mana allin kaqta reparashaqtinmi, allin kaqta manaraq ajllakushaqtinmi, manchakusqayki iskaynin reykunaq jallp’anqa wijch’usqa kanqa.+ 17 Ajaz, Jehová Diosmi qan contra, llaqtayki contra, taytaykiq wasin contra ima jatarinqa; chay pasasqanqa manan jayk’aqpas pasarqanchu Judá ayllumanta Efraín t’aqakusqanmantapachaqa.+ Paymi Asiria reyta qan contra kachamusunki.+
18 ”Chay p’unchaymi Jehová Diosqa silbaspa wajanqa Egipto llaqtapi kaq ch’uspikunata, chay ch’uspikunan Nilo mayuq cantonmantaraq jamunqaku, wajallanqataqmi Asiria runakunaq jallp’anpi kaq abejakunatapas. 19 Paykunan jamuspa tiyaykunqaku wayq’okunapi, qaqa k’ajtukunapi, kiska-kiska ukhukunapi, uywakunaq maypichus unu ujananpi ima.
20 ”Chay p’unchaymi Éufrates mayu ladomanta alquilasqa navajawan, Asiria reywan+ Jehová Diosqa umata k’isunqa, k’isullanqataqmi chakanpi pelonkunatapas, chay navajaqa sunkhantawanmi apapunqa.
21 ”Chay p’unchaypin juj runa, juj malta wakawan iskay ovejawan imalla qhepakunqa. 22 Lecheqa askhapunin kanqa, jinan chay runaqa mantequillata mijunqa, chay jallp’api llapa qhepakuqkunapas mantequillata mieltawanmi mijunqaku.
23 ”Chay p’unchaypin waranqa qolqepaq valeq waranqa uvas sach’akunaqa kiskayoq sach’akunalla mana allin qorakunalla kapunqa. 24 Chayman riqkunaqa flechana arcokunayoqmi, flechakunayoqmi rinqaku; chay llaqtamanqa kiskakuna mana allin qorakuna iman junt’aykunqa. 25 Mana allin qorakunawan kiskakunawan junt’a kasqanraykun ñaupaqpi limpiasqanku orqokunamanpas manaña qayllaykunkichu. Chay orqokunaqa waka michinan kapunqa, ovejaq sarusqanmi kapunqa”, nispa.