Deuteronomio

4 ”Kunanqa Israel runakuna, uyariychis qankunaman willasqay kamachikuy simikunata, leykunatapas, chaykunatan kasukunkichis, chhaynapin kausashallankichis,+ chhaynapin ñaupa taytaykichiskunaq Diosnin Jehová Diospa qonan jallp’amanpas jaykunkichis, chaytan jap’ikapunkichis. 2 Aman chay kamachikuykunamanqa imatapas yapankichischu, amataqmi chaymantaqa imatapas orqonkichischu.+ Aswanpas willasqayman jinan Jehová Diosniykichispa kamachikuyninkunataqa junt’ankichis.

3 ”Qankunaqa rikurqankichismi Peorpi Baalman riq runakunata imatachus Jehová Dios ruwarqan chaytaqa+ ¿riki? Paykunataqa llapankutan Jehová Diosniykichisqa qankuna ukhumanta chinkachirqan. 4 Jehová Diosman k’askakuqkunan ichaqa llapaykichis kaypi kausashaqlla kashankichis. 5 Noqaqa Jehová Diosniypa kamachiwasqanman jinan willarqaykichis paypa kamachikuyninkunataqa leyninkunatapas.+ Chaykunaman jinan kausankichis maypichus tiyankichis chay jallp’apiqa. 6 Chay kamachikuykunataqa llapantan allintapuni junt’ankichis.+ Chhaynapin chay kamachikuykunamanta uyariq waj llaqta runakunaqa yachanqaku qankunaqa yachayniyoq kasqaykichista,+ allin yuyayniyoq kasqaykichistapas.+ Ninqakutaq: Kay nación runakunaqa yachayniyoqmá, allin yuyayniyoqmá kasqaku,+ nispa. 7 Yachasqaykichis jina, ¿mayqen jatun naciontaq diosninkuna qayllallanpi kashan imaynan Jehová Diosninchisqa qayllallanchispi kashan jinata? Diosninchisqa sapa wajakuqtinchismi qayllaykamuwanchis.+ 8 ¿Mayqen jatun naciontaq kanman kamachikuyninkunapas, chaninchayninkunapas, kunan p’unchay willasqay llapan kay leykuna jina?+

9 ”Allintan qankuna kikiykichista qhawarikunkichis, paqtataq qonqawaqchis llapa imachus rikusqaykichista, paqtataq chaykuna sonqoykichismanta lloqsinman. Aman chaykunataqa wañunaykichis p’unchaykamapas qonqankichischu. Llapantan chaykunataqa willankichis wawaykichiskunamanpas nietoykichiskunamanpas.+ 10 Horeb orqopi Jehová Diosniykichispa ñaupanpi kashaqtiykichismi Jehová Diosqa niwarqan: Llaqtantin runakunata juñumuway simiyta uyariwanankupaq,+ chhaynapin paykunaqa wañunanku p’unchaykama manchakuwanqaku,+ llapa imachus nisqaytan wawankunamanpas yachachinqaku,+ nispa.

11 ”Jinan qankunaqa chay orqoq chakinman qayllaykuspa chaypi sayaykurqankichis, chay orqomantan nina lloqsimusharqan, janaq pachamanraqmi chay ninaqa chayasharqan. Laqhayaqmi* kasharqan, phuyukunapas junt’an kasharqan, yana phuyun junt’a kasharqan.+ 12 Chay nina ukhumantan Jehová Diosqa rimamurqan.+ Paypa kunkanqa uyarikusharqanmi ichaqa manan imapas rikukurqanchu;+ rimayllan uyarikusharqan.+ 13 Chaypin payqa rimanakuyninta willarqasunkichis.+ Chunka kamachikuykunatan+ qorqasunkichis kasukunaykichispaq. Chaytan payqa iskay p’alta rumikunapi qelqarqan.+ 14 Chay kutipin Jehová Diosqa niwarqan kamachikuyninkunata leyninkunatapas qankunaman willanaypaq. Chaykunaman jinan qankunaqa kausankichis jap’ikunaykichis jallp’aman jaykuspaqa.

15 ”Horeb orqopi nina ukhumanta Jehová Dios rimamushaqtinqa manan imatapas rikurqankichischu. Aswanpas kunkallantan uyarirqankichis ¿riki? Chhaynataq karqan chayqa, allintan qankuna kikiykichista cuidakunkichis, 16 chaytaq ima thupasqa idolotapas ima rijch’aytapas ruwakuwaqchis. Amapunin imatapas ruwakunkichischu qhariman rijch’akuqtapas ni warmiman rijch’akuqtapas.+ 17 Amataqmi ruwakunkichischu kay pachapi animalkunaman rijch’akuqtapas, phalaq animalkunaman rijch’akuqtapas,+ 18 pampan suchuq animalkunaman rijch’akuqtapas, ni unu ukhupi challwakunaman rijch’akuqtapas.+ 19 Janaq pachata qhawarispachus chaypi imaymanata rikunkichis chayqa, intitachus, killatachus, ch’askakunatachus rikunkichis chayqa, aman chaykuna serviymanqa aysachikunkichischu, aman chaykunamanqa k’umuykunkichischu.+ Jehová Diosmi chaykunataqa kamarqan kay pacha runakunapaq. 20 Jehová Diosmi qankunataqa orqomurqasunkichis, paymi fierro unuyachina hornomanta orqomurqasunkichis, arí, Egiptomantan orqomurqasunkichis paypa llaqtan kanaykichispaq.+ Kunanqa ñan llaqtanña kankichis.

21 ”Jehová Diosqa qankunaq causaykichispin noqawan phiñakurqan,+ chaymi payqa jurarqan ama Jordán mayuta chimpanaypaq, ama Jehová Diosniykichispa qonasuykichis munay jallp’amanpas jaykunaypaq.+ 22 Noqaqa kayllapin wañupusaq, manan chimpasaqchu Jordán mayutaqa.+ Qankunan ichaqa chay mayuta chimpaspa llapa chay jallp’akunata jap’ikampunkichis. 23 Amapunin Jehová Dios qankunawan rimanakusqantaqa qonqankichischu.+ Aman Jehová Diospa prohibisqan ima thupasqa idolotapas ruwakunkichischu.+ 24 Jehová Diosniykichisqa lliuta ruphaq nina jinan,+ payllata adoranatan munan.+

25 ”Chay jallp’api unaytaña kausashaspachus, wawakunayoq nietokunayoq kaspachus mana allin ruwayman jaykunkichis, thupasqa imaymana rijch’ayniyoq idolokunatachus+ ruwakunkichis, chhaynapitaq Jehová Diosniykichispa ñaupanpi mana allinta ruwankichis, phiñachinkichis ima chayqa,+ 26 kunanmi kay pachata janaq pachatawan kay nisqaymanta testigo kanankupaq churani: Manaraq imapin chinkachisqa kankichis. Manan unaychu kankichis maymanchus rishankichis chay Jordán mayu chimpapiqa, llapaykichismi chinkachisqa kankichis.+ 27 Jehová Diosmi lliu llaqtakunaman ch’eqerichisunkichis.+ May nacionkunamanchus Jehová Dios apachirqasunkichis chay nacionkunapiqa wakinnillaykichismi kausankichis.+ 28 Chay llaqtakunapin qankunaqa runaq ruwasqan dioskunata servinkichis. K’aspimanta ruwasqa, rumimanta ruwasqa+ mana uyariq, mana rikuq, mana mijuq, mana muskhiq idolokunatan servinkichis.

29 ”Chay llaqtapichus Diosniykichis Jehová Diosta maskhankichis chayqa tarinkichismi.+ Ichaqa tukuy sonqowan tukuy almawanmi* maskhanaykichis.+ 30 Jamuq tiempopin imaymana sasachakuykunapi tarikuspa, llapa kay willasqaykuna pasaqtin Jehová Diosniykichisman kutimunkichis, jinan yachankichis paypa simin uyarikuyta.+ 31 Jehová Diosniykichisqa khuyapayakuq Diosmi.+ Payqa manan saqerparisunkichischu, manan ch’usaqyachisunkichischu, manan qonqanqachu ñaupa taytaykichiskunawan juraspa rimanakusqantapas.+

32 ”Ñaupa tiempokunamanta tapupakuychis, manaraq kay pachapi nacesqaykichis tiempokunata t’aqwiriychis, Dios runakunata kay pachapi kamasqan tiempokunata t’aqwiychis, llapa kay pachapi maskhaychis. ¿Jayk’aqllapas karqanchu kay rikusqaykichis jina jatun ruwaykuna? ¿Jayk’aqllapas chayta uyarikurqanchu?+ 33 ¿Jayk’aqllapas juj llaqta qankuna jina Diospa kunkanta nina ukhumanta uyarirqanchu? Qankunaqa uyarirqankichismi chaywanpas kausashallankichismi.+ 34 ¿Jayk’aqllapas Dios juj llaqtata juj nación ukhumanta orqomurqanchu? ¿Ima llaqtatan señalkunawan, milagrokunawan,+ guerrawan,+ atiywan,+ kallpawan, manchakuy ruwaykunawan ima+ juj nacionmanta orqomurqan? Qankunallapaqmi Jehová Diosqa chayta ruwarqan Egipto llaqtapi. 35 Qankunallan chaykunataqa rikurqankichis, chhaynapi Jehová Dioslla cheqaq Dios kasqanta yachanaykichispaq.+ Manan paymantaqa juj Diosqa kanchu.+ 36 Payqa janaq pachamantapachan rimapayamurqasunkichis, chaymantapachan anyamurqasunkichis, kay pachapitaq jatun ninanta rikuchirqasunkichis, chay nina ukhumantan rimamurqan.+

37 ”Payqa munakurqanmi ñaupa taytaykichiskunata, chaymi miraynin runakunata ajllakurqan,+ paymi Egiptomantaqa atiyninwan orqomurqasunkichis, qankunawanmi payqa kasharqan. 38 Chaymantapas Diosqa chinkachinñan qankunamanta aswan jatun nacionkunata, kallpasapa nacionkunata, paykunaq jallp’ankutataq qankunaman qoshasunkichis.+ 39 Kunan kayta allinta yachay, sonqoykipi chayta allinta waqaychay: Jehová Diosllan cheqaq Diosqa. Manan jujqa kanchu+ janaq pachapipas ni kay pachapipas.+ 40 Kay willasqay kamachikuyninkunata leyninkunatawanmi kasukunkichis, chhaynapin qankunapas wawaykichiskunapas allillan kankichis, Jehová Diosniykichispa qonasuykichis jallp’apipas unayta kausankichis”,+ nispa.

41 Chay tiempopin Moisesqa Jordán mayuq inti lloqsimuy ladonpi kinsa llaqtakunata ajllarqan.+ 42 Chay llaqtakunan karqan mana cheqnikushaspa runamasinta qonqay wañuchiq runa+ pakakunanpaq; chaymanmi payqa ayqekunan karqan mana wañuchisqa kananpaq.+ 43 Jujninmi karqan ch’inneq pata pampapi Bézer llaqta,+ chaymi karqan Rubén ayllu runakunapaq; juj kaqtaq karqan Galaadpi Ramoj llaqta,+ chaymi karqan Gad ayllu runakunapaq; juj kaqtaq karqan Basanpi Golán llaqta,+ chaymi karqan Manasés ayllu runakunapaq.+

44 Moisesmi kay kamachikuy simikunata+ qorqan Israel runakunaman. 45 Kay yuyarichiykunata,* kamachikuykunata leykunatawanmi Moisesqa qorqan Israel runakunaman Egiptomanta lloqsimusqanku qhepaman.+ 46 Chaykunatan qorqan Jordán mayu qayllapi Bej-Peorpa chimpan wayq’opi.+ Chayqa kasharqan Esbonpi+ tiyaq amorreo runakunaq reynin Sehonpa kamachisqan jallp’apin. Chay reytan Moiseswan Israel runakunapiwanqa atiparqanku Egiptomanta lloqsimusqanku qhepaman,+ 47 jinaspan llapa jallp’anta jap’ikapurqanku. Jap’ikapurqankun Basanpi rey Ogpa+ jallp’antapas. Chay iskaynin reykunaqa Jordán mayuq inti lloqsimuy ladonpin kamachikurqanku. 48 Jallp’ankun karqan Arnón wayq’o patapi Aroer llaqtamanta+ Siyón orqokama, chay orqotan nikullantaq Hermón orqo+ nispa. 49 Jallp’ankun kallarqantaq llapa Arabapas, chayqa Jordán mayuq inti lloqsimuy ladonpin kashan; chaymi karqan Pisgá orqoq+ uranpi Arabá qochakama.*