2 Crónicas
15 Diospa espiritunmi Odejpa churin Azariasman junt’aykurqan. 2 Jinan Azariasqa Asawan tupaq rirqan, jinaspa nirqan: “¡Judá ayllu runakuna, Benjamín ayllu runakuna, qanpas Asá! ¡Uyariwaychis! Sichus Jehová Diosta mana saqenkichischu chayqa, paypas manan saqesunkichischu.+ Maskhankichis chaypas tarinkichismi.+ Sichus saqepunkichis chayqa paypas saqepusunkichismi.+ 3 Unay tiempon Israel runakunaqa Diosta saqepurqanku, sacerdotekunaq yachachisqantapas manan chaskirqankuchu, Diospa kamachikuyninkunatapas manan kasukurqankuchu.+ 4 Ichaqa sasachakuykunapi tarikuspan Israelpa Diosnin Jehová Diosman kutirikurqanku, jinan Diosqa paykunawan tarichikurqan.+ 5 Chay tiempokunapiqa sinchi sasachakuykunapin chay runakunaqa tiyarqanku, chaymi mana pipas thajqa maytapas riyta atirqanchu. 6 Juj nacionmi juj nación contra maqanakurqan, juj llaqtataq juj llaqta contra maqanakurqan. Diospa munayninpin chay sasachakuykunaqa karqan, chaymi Diosqa jinallata qhawarqan chhayna llakikuykunapi tarikunankuta.+ 7 Qankuna ichaqa kallpachakuychis, ama pisi kallpayaychischu,+ allinkuna ruwasqaykichismantaqa Diosmi kutichipusunkichis”, nispa.
8 Jinan Asaqa profeta Azariaspa nisqanta uyarispa, profeta Odejpa profetizasqanta uyarispa kallpachakurqan millakunapaq idolokunata lliuta thuninanpaq, jinan Judá ayllupi, Benjamín ayllupi, Efraín orqo-orqopi kaq llaqtakunapipas chay idolokunata lliuta thunirqan.+ Chay orqopin payqa wakin llaqtakunata Israel runakunamanta qechurqan. Chaymantapas Asaqa Jehová Diospa wasinpa ñaupanpi kaq Jehová Diospa altarnintan allicharqan.+ 9 Chaymantataq Asaqa juñurqan llapa Judá ayllu runakunata, Benjamín ayllu runakunata, jinallataq Efraín ayllumanta, Manasés ayllumanta, Simeón ayllumanta jamuq runakunatapas.+ Chay runakunaqa Asawan Jehová Dios kashasqanta reparaspan Israelmanta askha jampurqanku jinaspa Judá ayllupi tiyapurqanku. 10 Chay runakunatan Asaqa Jerusalén llaqtapi juñurqan, chunka pisqayoq wataña kamachikushaspa, kinsa kaq killapi. 11 Chay p’unchaymi Jehová Diosman sacrificiopi jaywarqanku qanchis pachaj torokunata, qanchis waranqa ovejakunatawan. Chay uywakunatan paykunaqa apamurqanku guerrapi atipamuspa. 12 Chaymantataq paykunaqa prometekurqanku ñaupa taytankuq Diosnin Jehová Diosta tukuy sonqowan tukuy almawan* maskhanankupaq.+ 13 Pipas Israelpa Diosnin Jehová Diosta mana maskhaqmi ichaqa wañunan karqan, jatunña juch’uyña kaqtinpas, warmiña qhariña kaqtinpas.+ 14 Jinan paykunaqa chaykunata junt’anankupaq alto kunkawan Jehová Diosman jurarqanku, chaymantapas kusisqan qaparirqanku, trompetakunatapas waqrakunatapas tocarqanku. 15 Llapa Judá ayllu runakunaqa tukuy sonqowan jurasqankumantan ancha kusisqa kasharqanku. Jinan paykunaqa tukuy sonqomanta Jehová Diosta maskharqanku, Diostaq paykunawan tarichikurqan.+ Chaymi Diosqa paykunata thajpi kausachirqan.+
16 Chaymantapas rey Asaqa Macá+ abuelantan reina kasqanmanta qarqopurqan millakuna idolota ruwasqanrayku, chay idolotan payqa ruwarqan sayashaq k’ulluta* yupaychanapaq.+ Chay idolotan Asaqa ñut’uta chhallurqan, jinaspa Cedrón wayq’opi+ kanaykurqan. 17 Yupaychana patakunatan*+ ichaqa Israelmanta mana chinkachirqanchu,+ chaywanpas Asaqa wañupunan p’unchaykaman tukuy sonqowan Diosta servirqan.+ 18 Chaymantapas Diospa wasinmanmi apamurqan qolqeta, qorita, imaymana serviciokunatawan.+ Chaykunatan paypas papanpas ñaupaqpi Diospaq t’aqarqanku. 19 Chhaynapin rey Asá kinsa chunka pisqayoq wata kamachikunankama Judá ayllupi mana guerra karqanchu.+