Éxodo
20 Chaymantataq Diosqa kamachikuykunata qorqan,+ nirqanmi:
2 “Noqan Jehová Diosniyki kani, noqan Egiptopi esclavo kasqaykimanta orqomurqayki.+ 3 Aman noqamanta waj diosniykiqa kanqachu.+
4 ”Aman ima idolotapas ni ima imagentapas* ruwakunkichu, janaq pachapi kaqman rijch’akuqtapas, kay pachapi kaqman rijch’akuqtapas, ni unu ukhupi kaqman rijch’akuqtapas.+ 5 Aman chaykunaman k’umuykunkichu, amallataqmi aysachikunkichu chaykuna serviymanqa.+ Noqa Jehová Diosniykiqa noqallata yupaychawanankutan munani.+ Cheqnikuwaqniy taytakunataqa castigasaqmi juchankumanta. Chay castigoqa chayanqan wawankunaman, nietonkunaman, nietonkunaq wawankunamanpas. 6 Munakuwaqniykunaman, kamachisqaykunata kasukuqkunamanmi+ ichaqa waranqa-waranqa miraykama mana tukukuq munakuyta* rikuchishallani.
7 ”Aman noqa Jehová Diosniykiq sutiytaqa yanqapaq oqarinkichu.+ Noqa Jehová Diosqa castigasaqmi pipas sutiyta yanqapaq oqariqtaqa.+
8 ”Samana p’unchayqa noqapaq t’aqasqa p’unchaymi, chay p’unchaytaqa waqaychankin.+ 9 Soqta p’unchayllan llank’anki, soqta p’unchayllan ima ruwanaykitapas ruwanki.+ 10 Qanchis kaq p’unchayqa noqa Jehová Diosniykipaq t’aqasqa p’unchaymi. Chay p’unchayqa aman imapipas llank’ankichu. Aman qhari wawaykipas, warmi wawaykipas, qhari kamachiykipas ni warmi kamachiykipas llank’anqachu. Amallataqmi uywaykipas ni llaqtaykipi tiyaq forastero runapas llank’anqachu.+ 11 Noqa Jehová Diosqa soqta p’unchaypin kamarqani janaq pachata, kay pachata, lamar-qochata, chaykunapi tukuy ima kaqkunatapas, qanchis kaq p’unchaytaq samarqani.+ Chayraykun noqa Jehová Diosqa qanchis kaq p’unchayman bendicionniyta churarqani, jinaspa t’aqarqani.
12 ”Tayta-mamaykitan sumaqta qhawarinki,+ chhaynapin noqa Jehová Diosniykiq qonay jallp’api unayta kausanki.+
13 ”Aman pitapas wañuchinkichu.+
15 ”Aman suwakunkichu.+
16 ”Aman runamasiykimantaqa llullakuspa testigankichu.+
17 ”Aman runamasiykiq wasinta munapayankichu. Aman runamasiykiq warminta,+ qhari kamachinta, warmi kamachinta, toronta, asnonta, ni imantapas munapayankichu”,+ nispa.
18 Llapa Israel runakunan uyarisharqanku phuyukunapi t’ojayta, oveja waqra tocayta ima. Rikusharqankun llifllikiytapas orqoq q’osñirisqantapas. Chaykunata uyarispa rikuspa iman Israel runakunaqa khatatatayta* qallarirqanku, karullapin sayaykurqankupas.+ 19 Chaymi Moisesta nirqanku: “Qanlla aswan rimapayawayku, noqaykuqa uyarisaykikun. Dios ichaqa ama noqaykuwan rimachunchu, mana chayqa wañuykumanpas”,+ nispa. 20 Moisesmi ichaqa paykunata nirqan: “Ama manchakuychischu. Pruebaman churaqmi Diosqa jamushan,+ chhaynapi payta manchakunaykichispaq mana juchapakunaykichispaqwan”,+ nispa. 21 Israel runakunaqa karullapin qhepakurqanku. Moisesmi ichaqa yana phuyuman qayllaykurqan, maypichus Dios kasharqan chayman.+
22 Jehová Diosmi Moisesta nirqan: “Israel runakunata nimuy, Diosmi nin: Qankuna kikiykichismi rikushankichis imaynatachus janaq pachamanta rimapayamushaykichis chayta.+ 23 Aman qolqemanta qorimanta dioskunatapas ruwakunkichischu. Aman juj dioskunataqa adorankichischu.+ 24 Jallp’amantan juj altarta ruwapuwankichis. Chaypin ovejaykichiskunata, wakaykichiskunatawan ruphachina ofrendakunata, sumaq kausay sacrificiokunata jina jaywamuwankichis. Maypichus sutiyta yuyarichisaq+ chayman jamuspan noqaqa bendecisaykichis. 25 Rumi altartachus ruwapuwankichis chayqa, aman thupankichischu chay rumikunataqa.+ Cincelwanpas imawanpas thupankichis chayqa, manapunin noqaqa chaskisaykichischu. 26 Chaymantapas noqapaq altarta ruwaspaqa aman pata-pata seqanayoqtachu ruwankichis chhaynapi qhari kayniykichis ama rikukunanpaq, nispa.