Ezequiel

6 Jujmantan Jehová Diosqa rimapayamuwarqan, paymi niwarqan: 2 “Runaq churin, Israelpi orqokunaman uyaykita kutiriy, paykuna contra rimay. 3 Paykunata niy: Israel orqokuna, tukuy munayniyoq Señor Jehová Diospa imachus nisqanta uyariychis. Tukuy munayniyoq Señor Jehová Diosmi orqokunata, moqokunata, mayukunata, wayq’okunatawan khaynata nin: ¡Uyariwaychis! Qankuna contran juj espadata kachamusaq, llapa yupaychana patakunatan* thunisaq. 4 Altarniykichiskunatan thunisaq, incienso q’apachina altarniykichiskunatan ñut’usaq,+ wañuqniykichiskunatan millakuna idoloykichiskunaq* ñaupanman wijch’usaq.+ 5 Israelpi wañusqakunatan millakuna idolonkuq ñaupanman wijch’usaq, tulluykichiskunatataq altarniykichiskunaq muyuriqninman wisñisaq.+ 6 Llapa tiyasqaykichis llaqtakunan thunisqa kanqa,+ yupaychana patakunapas thunisqan, purunyachisqan kanqa;+ altarniykichiskunapas thunisqan, ñut’usqan kanqa; millakuna idoloykichiskunapas ch’usaqman tukuchisqan kanqa, incienso q’apachina altarniykichiskunapas ñut’usqan kanqa, llapa ima ruwasqaykichiskunapas qonqasqan kanqa. 7 Wañusqakunaqa qankuna chaupimanmi wijch’uykamusqa kanqa,+ chhaynapin yachankichis noqa Jehová Dios kasqayta.+

8 ”Ichaqa manan llapaykichischu wañunkichis. Lliu nacionkunaman ch’eqechisqaymantan wakinqa espadamanta ayqenkichis.+ 9 Ayqekuqkunaqa may nacionmanchus apasqa kanqaku chaypin noqata yuyariwanqaku.+ Allintan reparanqaku may tukuytachus sonqoyta nanachiwarqan mana junt’aq* sonqonku,+ millakuna idolokunata munapayasqankupas chayta.+ Chay mana allinkuna ruwasqankuta reparaspan paykunaqa p’enqasqa kanqaku, jinaspa mayta sonqonkuta nanachikunqaku.+ 10 Chhaynapin paykunaqa yachanqaku noqa Jehová Dios kasqayta, llapa paykuna contra rimasqaypas paykunaman imachus chayamunanta rimasqaypas mana yanqachu kasqanta,+ nispa.

11 ”Tukuy munayniyoq Señor Jehová Diosmi nin: T’aqllapakuy, pampakunata jayt’apakuy, Israelpa mana allinkuna ruwasqanmanta, millay ruwaykuna ruwasqanmanta waqay. Paykunaqa espadawan, millay onqoywan, yarqaywan iman wañunqaku.+ 12 Karupi kaqqa millay onqoywanmi wañunqa, qayllapi kaqtaq espadawan wañunqa, chaykunamanta ayqekuqtaq yarqaymanta wañunqa. Llapa phiñakuyniytan paykunaman chayachisaq.+ 13 Wañuqninkunata wijch’urayaqta rikuspan, idolonkunaq ñaupanpi, altarninkunaq ladonpi,+ moqo patakunapi, orqo patakunapi, jatun sach’a k’uchukunapi, raphisapa sach’a k’uchukunapi wijch’urayaqta rikuspan; maykunapichus llapa millakuna idolonkuman sumaq q’apaq ofrendakunata jaywarqanku,+ chaykunapi wañuqninkunata wijch’urayaqta rikuspan qankunaqa yachankichis noqa Jehová Dios kasqayta.+ 14 Paykuna contran makiyta jaywarisaq, chhaynapin chay jallp’ata ch’inta saqesaq. Tiyasqanku llaqtakunaqa Diblá ch’inneqmantapas aswan ch’inmi kapunqa. Chhaynapin paykunaqa yachanqaku noqa Jehová Dios kasqayta, nispa”.