Deuteronomio
18 ”Leví ayllu sacerdotekunaqa, llapa Leví runakunapas manan Israel runakuna ukhupiqa ima herenciatapas chaskinqakuchu. Paykunaqa Jehová Diospaq jaywasqa ruphachina ofrendakunamantan mijunqaku, chaymi paykunaq herenciankuqa kanqa.+ 2 Paykunaqa manan ima herenciatapas chaskinqakuchu wayqenkuna ukhupiqa. Diospa willasqan jina, Jehová Diosmi paykunaq herenciankuqa kanqa.
3 ”Kaykunatan sacerdotekunaqa chaskinqaku runakunaq jaywasqan ofrendakunamantaqa. Torotaña ovejataña sacrificiopi jaywankichis chaypas, paletillanta,* qhaqllinta,* wijsanta iman paykunamanqa qonkichis. 4 Chaymantapas ñaupaq oqarisqaykichis trigota, mosoq vinoykichista, ñaupaq aceiteykichista iman paykunamanqa qonkichis, qollankichistaqmi ovejaykichismanta ñaupaq rutuy willmatapas.+ 5 Jehová Diosmi Leví ayllu runakunataqa aylluykichiskuna ukhumanta ajllarqan, chhaynapi paykunapas churinkunapas Jehová Diospa sutinpi llaqta runakunata tukuy tiempo servinankupaq.+
6 ”Mayqen Leví runapas tiyasqan llaqtata saqespa+ Jehová Diospa ajllakusqan llaqtaman* ripuyta munanqa chayqa,+ rillanmanmi. 7 Chaymantapas atinmanmi chaypi Jehová Diosninpa sutinpi serviyta. Arí, atinmanmi Jehová Diospa ñaupanpi kashaq wakin Leví runakuna jina serviyta.+ 8 Chaymantapas wakin Leví runakunaq mijuna chaskisqanta jinan paypas mijunataqa chaskinqa.+ Kanqaña ñaupa taytankunamanta herencia chaskisqanta vendesqan chaypas chaskillanqan mijunataqa.
9 ”Jehová Diosniykichispa qonasuykichis jallp’aman jaykuspaykichisqa aman chay nacionkunaq millay mana allin ruwayninkutaqa ruwankichischu.+ 10 Aman qankuna ukhupiqa pipas qhari wawantapas ni warmi wawantapas ninapi ruphachinqachu.+ Chaymantapas aman qankuna ukhupiqa kanqachu suerte qhawaqpas,+ layqa ruwaykunata ruwaqpas,+ imata qhawaspa watuqpas,+ layqapas,+ 11 runamasinta khipuqpas, wañusqakunata tapuqman riqpas,+ watuqman riqpas,+ ni wañusqakunata tapuqpas.+ 12 Jehová Diosqa cheqnikunmi chaykuna ruwaqtaqa, chaykunata ruwasqankuraykun Jehová Diosniykichisqa ñaupaykichismanta chay nacionkunata qarqonqa. 13 Qankunaqa ch’uyatapunin kausankichis Jehová Diosniykichispa ñaupanpiqa.+
14 ”Jap’ikapunaykichis nacionkunapi tiyaq runakunaqa layqa ruwaqkunata,+ watuqkunata iman kasunku.+ Jehová Diosniykichisqa manan munanchu chaykuna ruwanaykichistaqa. 15 Jehová Diosniykichismi qankuna ukhumanta noqa jina juj profetata jatarichipusunkichis, qankunaqa paytan uyarinkichis.+ 16 Chaytaqa qankuna kikiykichismi Jehová Diosmanta mañakurqankichis Horeb orqopi juñukushaspaykichis,+ chaypin nirqankichis: Ama Jehová Diosniykuq kunkantaqa uyarichiwaykuchu, aman kay ninatapas yapamantaqa qhawachiwankikuchu, mana chayqa wañuykumanpas,+ nispa. 17 Chayta uyarispan Jehová Diosqa niwarqan: Paykunaqa allintan chayta nishanku. 18 Paykuna ukhumantan qanta jina juj profetata sayarichisaq,+ paymanmi simiyta willasaq,+ paytaq paykunaman willanqa llapa imachus kamachisqayta.+ 19 Pipas chay profetaq sutiypi rimasqanta mana uyarikunqachu chayqa, cuentatan mañasaq chay runamanta.+
20 ”Mayqen profetapas mana noqa kamachishaqtiy sutiypi imatapas rimanman, yanqa dioskunaq sutinpipas rimanman chayqa, wañuchisqan kanqa chay profetaqa.+ 21 Ichaqa yaqapaschá niwaq: ¿Imaynapitaq yachasaqku Jehová Dioschus nirqan chay simikunata icha manachus chaytari?, nispa. 22 Sichus juj profeta noqa Jehová Diospa sutiypi imatapas rimanqa, manataq chay rimasqan junt’akunmanchu chayqa, manan noqa Jehová Diospa simiytachu payqa rimashan, aswanmi payqa jatunchakuspa munaynillanta rimashan. Aman paytaqa manchakunkichu, nispa.