Gálatas
1 Noqa apóstol* Pablon qelqamushaykichis. Apóstol kanaypaqqa manan runachu kamachiwarqan ni pichu churawarqan, aswanpas Jesucriston,+ payta kausarichiq Taytanchis Diospiwan.+ 2 Arí, noqa Pablon noqawan kashaq llapa iñiqmasikunapiwan qankuna Galacia provinciapi iñiq t’aqakunaman qelqamushaykichis:
3 Qankunawan kachun Taytanchis Diospa, jinallataq Señor Jesucristoq ancha sumaq sonqo kaynin thaj kayninpas. 4 Criston* Diosninchispa Taytanchispa munayninman jina+ juchanchiskunarayku wañurqan,+ chhaynapi kay tiempopi* millay kausaymanta librawananchispaq.+ 5 Wiñay-wiñaypaq Diosqa jatunchasqa kachun. Amén.*
6 Maytan admirakuni waj willakuyta allin willakuykunata jina chaskispaykichis+ Cristoq ancha sumaq sonqo kayninwan wajasuqniykichis Diosta manaraq imapi saqerparishasqaykichismanta. 7 Ichaqa manan kanchu waj allin willakuykunaqa, aswanmi jujkuna pantachiyta munashasunkichis+ Cristomanta allin willakuykunata q’ewispa. 8 Chayrayku, noqaykumanta mayqenña, janaq pachamanta angelña noqaykuq willasqayku allin willakuykunamanta waj willakuyta allin willakuykunata jina willasunkichis chayqa, ñakasqa kachun. 9 Jujtawan nimusaykichis: Pipas chaskisqaykichis allin willakuykunamanta waj willakuyta allin willakuykunata jina willasunkichis chayqa, piña kachun chaypas ñakasqa kachun.
10 Noqaqa manan runakunaq allin qhawariwanantachu munani, aswanpas Diospa allin qhawariwanantan, arí, noqaqa manan runatachu kusichiyta munani; runakunata kusichispallaraqchus kashayman chayqa, manachá Cristoq kamachinchu kayman. 11 Wayqeykuna,* kaytan yachanaykichista munani: Qankunaman willasqay allin willakuykunaqa manan runamantachu jamun.+ 12 Arí, chay willakuykunataqa manan pi runamantachu chaskirqani, ni pichu yachachiwarqanpas, aswanmi chaykunataqa kikin Jesucristopuni rijuriwaspa qowarqan.
13 Qankunaq yachasqaykichis jina, judío religionpi kashaspayqa+ nishutan qatikachaq kani Diospa iñiq t’aqanta, imaymana mana allinkunatan paykunata ruwaq kani.+ 14 Chaymantapas chay religionpi kashaspayqa nacionniypi wiñaymasiykunamantapas aswan allintaraqmi ñauparisharqani may tukuy sonqoywanpuni ñaupa taytaykunaq costumbrenkunata junt’aspa.+ 15 Ichaqa, nacechiwaqniy* jinallataq ancha sumaq sonqo kayninpi+ wajawaqniy Diosqa allinpaqmi qhawarirqan 16 Churinmanta allin willakuykunata nacionkunaman willanayta,+ chhaynapi chay nacionkuna Churinta reqsinankupaq. Chayta ruwanaypaq ajllashawaqtinqa manan noqaqa pi runamanchu phawarqani imatapas imayna ruwanaypaq tapukuq, 17 nitaq Jerusalén llaqtamanchu wicharqani noqamanta ñaupaqtaña apóstol kaqkunawan tupaq, aswanmi Arabia ladoman rirqani, chaymantataq Damasco llaqtaman kutirqani.+
18 Kinsa wata qhepamanñan Jerusalén llaqtataqa wicharqani+ Cefaswan*+ tupaq, chaypin paywan qhepakurqani chunka pisqayoq p’unchay. 19 Ichaqa manan wakin apostolkunawanqa tupanichu, Señorpa wayqen Santiagollawanmi+ tupani. 20 Kay qelqamusqaykunaqa cheqaqmi, kaytaqa Diospa ñaupanpin mana llullakuspa nimushaykichis.
21 Chaykuna qhepatataq Siria, Cilicia ladokunaman rirqani.+ 22 Judea provinciapi Cristoq iñiq t’aqankunapiqa manaraqmi mayqenpipas reqsisqachu karqani. 23 Paykunaqa “ñaupaqpi qatikachawaqninchis runan+ kunanqa chinkachiy munasqan iñiymanta allin willakuykunata willaspa purishan”+ nispa rimaqllatan noqamantaqa uyarisqaku. 24 Jinan paykunaqa noqa jawa Diosta jatuncharqanku.