Éxodo
33 Jehová Diosmi Moisesta nillarqantaq: “Kaymanta ripuy Egiptomanta orqomusqayki runakunapiwan. Abrahanman, Isaacman, Jacobmanwan prometesqay jallp’aman ripuychis. Paykunamanmi jurarqani: Kay jallp’atan wawaykichiskunaman qopusaq,+ nispa. 2 Ñaupaykitan juj angelta kachasaq.+ Jinaspan Canaán runakunata, amorreo runakunata, Het runakunata, perizita runakunata, heveo runakunata, Jebús runakunatawan+ qarqosaq. 3 Maypichus lechepas mielpas askha kan chaymanmi rinkichis.+ Noqaqa manan riysisaykichischu, mana kasukuq k’ullu kasqaykichisraykupas+ ñanpi wañuchiykichisman”,+ nispa.
4 Chay k’araq simikunata uyarispan Israel runakunaqa sinchita llakikurqanku, chaymi manaña churakurqankuchu ima alajankutapas. 5 Jehová Diosmi Moisesta nirqan: “Israel runakunata niy, Diosmi nin: Qankunaqa mana kasukuq k’ullu runakunan kankichis.+ Noqaqa juj ratullapin qankunaman jamuspa ch’usaqman tukurachiykichisman.+ Aman churakunkichischu alajaykichiskunata imatachus qankunawan ruwasaq chayta allinta piensanaykama, nispa”. 6 Chaymi Israel runakunaqa Horeb orqopi llapa alajankuta orqokurqanku, manataqmi churakurqankuñachu.
7 Moisesqa karpanta oqarispan karpa-karpa jawapi karpakurqan, chaytan suticharqan “Dioswan tupana karpa” nispa. Pipas Jehová Diosta imatapas tapuyta munaqqa+ chay tupana karpamanmi riq. 8 Moisés karpanman ripuqtinqa llapa runakunan sayarispa qhawaqku. Llapankun karpanku punkupi sayaykuspa qhawaqku Moisés karpan ukhuman jaykunankama. 9 Karpan ukhuman jaykuqtin jinan sayaq phuyuqa+ karpa punkuman uraykamuspa chaypi sayaykuq, Diostaq Moiseswan rimaq.+ 10 Moisespa karpan punkupi sayaq phuyuta rikuspataq runakunaqa llapanku karpanku punkupi k’umuykuqku. 11 Jehová Diosqa uya-uyapuran Moiseswan rimaq,+ imaynan juj runa runamasinwan riman chhaynata. Karpa-karpaman Moisés jaykuqtinqa Nunpa churin Josuemi+ Moisespa karpanpi qhepakuq. Paymi Moisespa yanapaqninpas serviqninpas karqan.+
12 Moisesmi Jehová Diosta nirqan: “Kay llaqtata pusay nishawankin, ichaqa ¿pitaq riysiwanqari? Allintan reqsiyki,* sonqoypaq jinan kanki nishallawankitaqmi. 13 Diosnilláy sonqoykipaq jinataq kani chayqa, reqsichiway ñanniykikunata,+ chhaynapi qanta reqsinaypaq sumaq qhawariwasqaykipas ama pisiyananpaq. Amayá qonqankichu kay nación llaqtayki kasqantaqa”,+ nispa. 14 Jinan Diosqa nirqan: “Noqan qanwan kuska risaq,+ jinaspa samachisayki”,+ nispa. 15 Moisestaq nirqan: “Sichus mana noqaykuwanchu rinki chayqa, ama kaymanta lloqsichiwaykuchu. 16 Manachus riysiwankiku chayqa, ¿imaynapin pipas yachanman noqatapas llaqtaykitapas allinpaq qhawariwasqaykikuta? Sichus riysiwankiku+ chayqa, kay pachapi llapa llaqtakunamantapas jujniraymi kasaqku”,+ nispa.
17 Jinan Jehová Diosqa Moisesta nirqan: “Qanqa sonqoypaq jinan kanki, allintataqmi reqsiykipas, chaymi mañakuwasqaykiman jina ruwasaq”, nispa. 18 Moisestaq payta nirqan: “Diosníy, ama jinachu kay, uyaykita rikuchiway”,* nispa. 19 Jinan Diosqa nirqan: “Ñaupaykita pasaspan may sumaq sonqo kasqayta rikuchisayki, Jehová sutiymantan willasayki.+ Noqaqa pitachus allinpaq qhawariyta munani chaytan allinpaq qhawarisaq, pitachus khuyapayayta munani chaytan khuyapayasaq”,+ nispa. 20 Nillarqantaqmi: “Uyaytan ichaqa mana rikuwaqchu, manan pipas rikuwaspaqa kausanmanchu”, nispa.
21 Jehová Diosqa nillarqantaqmi: “Qayllaypin juj sitio kashan. Chaypi qaqa patapi sayaykuy. 22 Chayninta lliflli kayniywan pasashanaykaman qaqa k’ajtuman churasayki, qanta makiywan tapaykuspallan noqaqa chayninta pasasaq. 23 Chaymantaqa oqaripullasaqmi makiytaqa, jinan qanqa wasallayta rikunki. Uyaytan ichaqa mana rikunkichu”,+ nispa.