1 Crónicas

20 Wata qallariytan* reykunaqa guerraman maqanakuq lloqsiqku. Chay tiempopin Joabqa+ Israel soldadokunata umallispa maqanakuq rirqan, chaypin llapa Anmón runakunata wañuchirqan. Jinan Rabá llaqtata muyuykurqan,+ Davidtaq ichaqa Jerusalén llaqtapi qhepakurqan.+ Chaymantataq Joabqa Rabá llaqtata atiparqan.+ 2 Davidqa Malcanpa umanmantan coronata orqorqan. Chay coronaqa kinsa chunka tawayoq kilo* pesaq qorimantan ruwasqa karqan, ancha valorniyoq rumikunayoqtaq karqanpas, chay coronatan Davidpa umanman churarqanku. Davidqa apallarqantaqmi chay llaqtamanta imaymana qechusqanta.+ 3 Chaymantapas chay llaqtamantan runakunata orqorqan rumita kuchuspa llank’anankupaq; fierromanta filo herramientakunawan hachakunawan ima llank’anankupaq.+ Chhaynatan Davidqa ruwaq Anmón runakunaq tiyasqan llapa llaqtakunawanpas. Chaymantataq Davidqa llapa soldadonkunapiwan Jerusalenman kutipurqan.

4 Chay qhepamantaq Israel runakunaqa Filistea runakunawan Guézer llaqtapi maqanakurqanku. Chay kutipin Jusá runa Sibecaiqa+ Sipái sutiyoq refaín+ runata wañuchirqan. Chhaynapin Filistea runakunaqa Israel runakunaq kamachin kapurqanku.

5 Chaymantapas Israel runakunaqa jujmantan Filistea runakunawan maqanakullarqankutaq. Jinan Jairpa churin Elananqa Gaj llaqtayoq Goliatpa+ wayqen Lamita wañuchirqan. Chay runaq lanzanpa mangonqa karqan telarpi k’uyuna k’aspi jinan.+

6 Chay qhepamanpas jujmantan Israel runakunaqa Filistea runakunawan Gaj+ llaqtapi maqanakullarqankutaq. Chay llaqtapin karqan juj jatunkaray refaín runa,+ sapanka makinpi sapanka chakinpi soqta dedokunayoq. Llapanpiqa iskay chunka tawayoq dedokunayoqmi karqan. 7 Chay runan Israel runakunata k’amisharqan,+ chaymi Simeapa+ churin Jonatanqa chay runata wañuchirqan. Simeaqa Davidpa wayqenmi karqan.

8 Chay jatunkaray refaín runakunaqa+ Gaj+ llaqtapin tiyarqanku, paykunatan Davidwan kamachinkunawan wañuchirqanku.