Éxodo
18 Madián runakunaq sacerdoten Moisespa suegron Jetron+ yacharusqa, Diosqa Moisespaq llaqtan Israelpaqpas tukuy imaymana ruwasqanta. Llapantan yacharusqa imaynatas Jehová Diosqa Israel runakunata Egiptomanta orqomurqan chaytapas.+ 2 Moisesqa Jetroq wasinmanmi esposan Ziporata kachapusqa, chaymi Jetroqa Ziporata 3 iskaynin wawankunatawan+ uywasharqan. Jujnin wawantan Moisesqa suticharqan Guersom*+ nispa. Nirqanmi: “Waj llaqtapin forastero kani”, nispa. 4 Jujnintataq suticharqan Eliezer* nispa. Nirqanmi: “Taytaypa Diosninmi yanapaqniyqa, paymi faraonpa* espadanmanta librawarqan”,+ nispa.
5 Jetroqa Moisespa esposanta wawankunatawan pusarikuspan payman aypaq rirqan. Chay tiempopaqqa Diospa orqonpa ladon ch’inneqpin Moisesqa karpakuspa tiyasharqan.+ 6 Paymanmi Jetroqa+ willachimurqan: “Noqa suegroykin qanwan tupaq jamushani esposaykiwan iskaynin wawaykikunawan kuska”, nispa. 7 Chayta uyarispa jinan Moisesqa suegronta chaskiq lloqsimurqan, paywan tupaspataq ñaupanpi k’umuykurqan, jinaspa much’awan napaykurqan. Sapankankun tapunakurqanku imaynachus kashanku chaytapas, chaymantataq Moisespa karpanman jaykurqanku.
8 Moisesqa llapantan suegronman willarqan imakunatachus Jehová Dios faraonta Egipto runakunatapas Israel runakunarayku ruwarqan chayta.+ Willarqanmi ima sasachakuykunapichus jamusqankupi tarikurqanku chayta,+ imaynatachus Jehová Dios paykunata librarqan chaytapas. 9 Jetroqa kusikurqanmi Jehová Dios Israel runakunata Egiptomanta libramunanpaq imaymanakuna ruwasqanta yachaspa. 10 Chaymantataq Jetroqa nirqan: “Jatunchasqa kachun Jehová Diosqa Egipto runakunamanta faraonpa makinmantawan libramusqasuykichismanta. Alabasqa kachun Diosqa Israel runakunata Egipto runakunaq makinmanta libramusqanmanta. 11 Kunanqa allintan yachani Jehová Diosqa llapa dios nisqakunamantapas aswan jatun kasqanta.+ Chaytan reparani jatunchakuq runakunamanta llaqtanta imayna cuidasqanpi”, nispa. 12 Chaymantataq Moisespa suegron Jetroqa ruphachina ofrendata juj sacrificiokunatawan Diosman jaywarqan. Chaykuna qhepamantaq Aaronwan Israelpi llapa umalliqkunapiwan* jamurqanku Moisespa suegronwan kuska mijuq, paykunaqa Diospa ñaupanpin mijurqanku.
13 Qhepantin p’unchaytaq Moisesqa imaynan ruwallaqpuni jinata Israel runakunaq quejakuyninta juzgananpaq tiyaykurqan. Ch’isiyaqmi runakunaqa Moisesman jamurqanku. 14 Moisespa imakunachus ruwasqanta rikuspan suegronqa nirqan: “¿Imatataq kaytari ruwashanki? ¿Imaraykutaq qanllari ch’isiyaq runakunaq quejanta uyarinki?”, nispa. 15 Moisestaq nirqan: “Runakunan Diospa yanapayninta maskhaspa noqaman jamuwanku. 16 Paykunapurapi ima problemapas kaqtinmi noqaman jamunku problemanku willaq. Noqataq chayta uyarispa Diospa imachus nisqanta imachus kamachikusqantawan paykunaman willani”,+ nispa.
17 Jinan Moisespa suegronqa nirqan: “Manan allintachu chaytaqa ruwashanki. 18 Qanlla chayta ruwanki chayqa sayk’upunkin, runakunapas sayk’upunqakun. Nishun qanllapaqqa chay ruwayqa. 19 Chayrayku uyariway imatachus yuyaychasayki chayta, Diospas qanwanmi kanqa:+ Imaynachus ruwashanki chhaynata runakunaq rantinta Diosman qayllaykushallay,+ problemankutapas apashallay payman.+ 20 Yachachishallay Diospa siminta kamachikuyninkunatapas.+ Willashallay imayna kausanankuta ima ruwanankutapas. 21 Ichaqa llaqta ukhumanta ajllay allin yachayniyoq,+ Diosta manchakuq, confianapaq jina runakunata, qolqeraykulla ima ruwaytapas cheqnikuqkunata.+ Paykunata churay waranqa runakunata umallinanpaq, pachajta umallinanpaq, pisqa chunkata umallinanpaq, chunkata umallinanpaq ima.+ 22 Paykuna runakunaq quejakuyninta uyarispa juzgachunku.+ Mana atispataq qanman apamuchunku, fácil kaqkunataqa paykunalla allichachunku. Chhaynapin paykuna llank’ayniykipi yanapasunkiku, manataqmi nishuchu ima ruwanaykipas kanqa.+ 23 Sichus chayta ruwanki chayqa, Diospas allinpaqchus qhawarinqa chay ruwasqaykita chayqa, facilmi qanpaq kanqa chay ruway, chhaynapin lliupas kusisqa karpankuman kutipunqaku”, nispa.
24 Moisesqa allinpaqmi qhawarirqan suegronpa nisqanta, chaymi kaq ratu imachus nisqanman jina ruwarqan. 25 Lliu Israel llaqtamantan ajllarqan allin yachayniyoq runakunata, jinaspa paykunata churarqan waranqa runata umallinanpaq, pachajta umallinanpaq, pisqa chunkata umallinanpaq, chunkata umallinanpaq ima. 26 Paykunan runakunaq quejakusqanta uyarispa chayta allichaqku. Sasa kaqkunataqa Moisesmanmi apaqku,+ fácil kaqkunatan ichaqa paykunalla allichaqku. 27 Chaymantataq Moisesqa suegronta despachapurqan,+ jinan Jetroqa tiyasqan llaqtaman ripurqan.