2 Samuel

12 Chaymi Jehová Diosqa Natanta+ Davidman kacharqan, Natantaq Davidman qayllaykuspa+ nirqan: “Iskay runakunan juj llaqtapi tiyarqanku, jujninmi karqan qhapaq, jujnintaq wajcha.* 2 Qhapaq runaqa askha wakayoq askha ovejayoqmi karqan,+ 3 wajcha runaqmi ichaqa rantikusqan uña ovejachallan karqan.+ Chay ovejachatan payqa cuidaq, wawankunawan kuskatataq wiñachiq. Chay ovejachaqa chay runaq imachus kapusqallantan mijuq, copanmantan tomaq, qhasqonpitaq* puñuqpas. Chay ovejachaqa ususin jinan karqan. 4 Juj p’unchaymi chay qhapaq runaman juj runa visitamurqan. Chay qhapaq runan ichaqa mana ni wakantapas ni ovejantapas ñak’ayta munarqanchu, aswanmi wajcha runaq ovejachanta jap’iruspa chay visitamuqnin runapaq wayk’upurqan”,+ nispa.

5 Chayta uyarispan Davidqa chay qhapaq runapaq sinchita phiñakurqan, jinaspan Natanta nirqan: “Wiñaypaq kausaq Jehová Diospa sutinpin jurayki,+ ¡chay runaqa wañuchisqan kanan! 6 Chaymantapas mana khuyapayakuspa ruwasqanmantan chay runaqa chay ovejaq jayk’achus valesqanman jina tawa kutita kutichipunan”,+ nispa.

7 Jinan Natanqa Davidta nirqan: “¡Qanmi chay runaqa kanki! Chaymi Israelpa Diosnin Jehová Diosqa kayta nisunki: Noqan Israelpi rey kanaykipaq ajllarqayki,+ noqan Saulpa makinmanta librarqayki.+ 8 Patronniyki Saulpa familianpa gobiernontan qanman qopurqayki,+ paypa esposankunatan makiykiman entregarqayki.+ Israelpi Judapi kamachikunaykipaqmi reyta churarqayki.+ Chaykuna qosqay pisi kaqtinqa, imaymanataraqmi qanpaq ruwanay karqan.+ 9 ¿Imaraykun mana allinta ruwaspa noqa Jehová Diosniykiq kamachikuyniyta pisicharqanki? ¡Qanmi Anmón runakunaq espadanwan+ Het runa Uriasta wañuchirqanki!+ Chaymantataq esposanwan casarakurqanki.+ 10 Uriaspa esposanta qechuruspa paywan casarakuspan noqata pisichawarqanki, chayraykun wasiykipiqa ñak’ariykuna kallanqapuni,+ nispa. 11 Jehová Diosmi nillantaq: Kunanmi ñak’ariykunata apachimusayki, chaykunaqa qan kikiykiq wasiykimantan jatarinqa.+ Ñawiykiq rikushaqtinmi esposaykikunata qechusayki, jinaspa juj qhariman qosaq,+ paymi llapa runaq rikushasqan* esposaykikunawan puñunqa.+ 12 Qanqa pakapin chaykunata ruwarqanki,+ noqan ichaqa p’unchaypi* llapa Israel runakunaq rikushasqan chaykunata ruwasaq, nispa”.

13 Jinan Davidqa Natanta nirqan: “Jehová Dios contran juchallikuni”,+ nispa. Natantaq nirqan: “Jehová Diosqa perdonasunkin chay juchaykita,+ qanqa manan wañunkichu.+ 14 Chaywanpas chayllaraq naceq wawaykiqa wañupunqan Jehová Diosta mana respetasqaykirayku”, nispa.

15 Chaymantataq Natanqa wasinman ripurqan.

Davidqa Uriaspa esposanwanmi juj wawayoq karqan, chay wawatan Jehová Diosqa onqoywan jap’ichirqan. 16 Chay wawanpaqmi Davidqa Diosta rogakurqan. Chaymi payqa ayunarqan, cuartonman jaykuspataq pampapi kumparayaspa illariq.+ 17 Jinan wasinpi kaq umalliqkunaqa* Davidman qayllaykuspa sayarichiyta munarqanku, paymi ichaqa mana munarqanchu; manan paykunawan mijuytapas munarqanchu. 18 Qanchis p’unchaymantataq Davidpa wawanqa wañupurqan. Jinan kamachinkunaqa manchakusharqanku wawanpa wañusqanta Davidman willayta, paykunan nisharqanku: “Wawan kausashallaqtinraq reywan rimaqtinchisqa manamá uyariwarqanchischu, kunan wañurusqanta willasun chayqa imataraqchá ruwanman. ¿Imaynatataq willasunri?”, nispa.

19 Kamachinkuna paykunapura rimashasqankuta uyarispan Davidqa repararqan wawan wañupusqanta, chaymi kamachinkunata tapurqan: “¿Wañurapunpunichu waway?”, nispa. Kamachinkunataq nirqanku: “Arí wañurapunmi”, nispa. 20 Jinan Davidqa pampamanta sayarispa uyanta maqchikurqan, aceitewantaq jawikurqan.+ P’achanta cambiakuspataq Jehová Diospa karpanman+ rirqan payta yupaychaq. Chaymantataq wasinman* kutispa mijunata mañakuspa mijurqan. 21 Chay ruwasqanta rikuspan kamachinkunaqa nirqanku: “¿Imaraykun chayta ruwanki? Wawayki kausashaqtintaq ayunarqanki waqarqanki ima, kunan wañuruqtintaq ichaqa pampamanta jatarirunki, mijunatapas mijurunki, ¿imaynataq chayri?”, nispa. 22 Jinan Davidqa nirqan: “Waway kausashaqtinqa nirqanin: Yaqapaschá Jehová Diosqa khuyapayawaspa wawayta kausachinman,+ nispa. Chaymi ayunarqanipas+ waqarqanipas. 23 Kunanqa wañupunñataq chayqa, ¿imapaqñataq ayunayman? ¿Chaywanchu kausarichiyman?+ Noqaqa wañuy pachamanqa chayallasaqmi,+ paymi ichaqa mana kutimunqañachu”,+ nispa.

24 Jinan Davidqa esposan Bat-Sebata+ sonqocharqan. Chaymantataq paywan puñurqan, tiempowantaq Bat-Sebaqa qhari wawata onqokurqan, chay wawatan suticharqanku Salomón*+ nispa. Jehová Diosqa munakurqanmi chay wawata,+ 25 chayraykun Jehová Diosqa profeta Natanta+ kacharqan chay wawata Jedidías* nispa sutichanankupaq.

26 Joabqa Rabá+ llaqtapi tiyaq Anmón runakunawanmi+ maqanakusharqan, jinan chay llaqtata atiparqan. Chay llaqtapin kasharqan reypa palacion.+ 27 Jinan Joabqa Davidman willachimurqan: “Rabá llaqta contra maqanakuspaymi+ chay llaqtaq unu jaykunan ladota* atiparuniña. 28 Kunanqa wakin soldadokunata juñumuy, jinaspa qan kikiyki jamuspa kay llaqtata lliuta atipay, noqa lliuta atipaqtiyqa noqatachá jatunchawankuman”, nispa.

29 Chaymi Davidqa llapa soldadokunata juñuspa Rabá llaqtata rirqan, paykunawan maqanakuspataq chay llaqtata atipaspa jap’ikapurqan. 30 Chaymantataq Davidqa Malcanpa umanmanta coronata orqorqan. Chay coronaqa kinsa chunka tawayoq kilo* pesaq qorimantan ruwasqa karqan, ancha valorniyoq rumikunayoqtaq karqanpas, chay coronatan Davidpa umanman churarqanku. Davidqa apallarqantaqmi chay llaqtamanta imaymana qechusqanta.+ 31 Chaymantapas chay llaqtamantan runakunata orqorqan rumita kuchuspa llank’anankupaq; fierromanta filo herramientakunawan fierro hachakunawan ima llank’anankupaq; chaymantapas ladrillokunata ruwanankupaq. Chhaynatan Davidqa ruwaq Anmón runakunaq tiyasqan llapa llaqtakunawanpas. Chaymantataq Davidqa llapa soldadonkunapiwan Jerusalenman kutipurqan.