Jeremías
16 Jujmantan Jehová Diosqa rimapayamuwarqan, paymi niwarqan: 2 “Aman kay suyupiqa esposata maskhakunkichu, aman churiykikunapas ususiykikunapas kanqachu. 3 Kay suyupi naceq qhari wawakunamanta, warmi wawakunamanta, wachakuqnin mamankumanta, churiyaqnin taytankumantawanmi noqa Jehová Diosqa nini: 4 Millay onqoykunawanmi wañunqaku,+ manan pipas paykunamanta waqanqachu nitaq p’ampanqakupaschu, jallp’apaqmi wanu jina kapunqaku.+ Espadawan wañuchisqan kanqaku, yarqaymantan wañunqaku,+ ayankutaqa phalaq animalkuna kay jallp’api kaq animalkuna iman mijupunqaku, nispa.
5 ”Jehová Diosmi khaynata nin:
Aman mayqen wañuqniyoqpa wasinmanpas jaykunkichu,
aman waqaysiqpas nitaq khuyapayaqpas rinkichu,+ nispa.
Thaj kayniytan kay llaqtamanta qechupuni,
mana tukukuq munakuyniytan,* khuyapayakuyniytan qechupuni,+ ninmi Jehová Dios.
6 Jatunpas juch’uypas llapankun kay suyupiqa wañunqaku.
Manan p’ampasqachu kanqaku,
manan pipas paykunamantaqa waqanqachu,
manan pipas paykunamantaqa cuerponta kuchukunqachu,
manan pipas chujchantapas k’isukunqachu.*
7 Manan pipas wañuqniyoqkunata kallpachananpaq mijunata jaywarinqachu.
Manan pipas sonqon tiyaykunanpaq vino copata jaywarinqachu,
manan pipas taytan wañupusqanmanta, maman wañupusqanmanta vinota jaywarinqachu.
8 Aman fiesta ruwakusqan mayqen wasimanpas jaykunkichu,
aman paykunawan mijuqpas ni ujaqpas tiyaykunkichu.
9 ”Ejercitokunata kamachiq Jehová Diosmi, Israelpa Diosninmi nin: Qankunaq tiempoykichispin rikushaqtiykichis kay suyumanta kusikuyta q’ochukuytapas chinkachipusaq, casarakuq qhariq kusikuyninpas casarakuq warmiq kusikuyninpas chinkapunqan.+
10 ”Tukuy chaykunata kay llaqta runakunaman willaqtiykin paykunaqa tapusunkiku: ¿Imaraykun Jehová Dios nirqan ñak’ariykunata chayachimuwananchista? ¿Imapin pantarqanchis, ima juchatan Jehová Diosninchis contra ruwarqanchis?,+ nispa. 11 Qantaq ninki: Jehová Diosmi nin: Ñaupa taytaykichiskunan saqerpariwarqanku,+ paykunaqa juj dioskunatan servishallarqanku, chaykunamanmi k’umuykurqanku.+ Noqatan ichaqa qonqapuwarqanku, manan kamachikuyniykunatapas kasukurqankuchu.+ 12 Qankunaqa ñaupa taytaykichiskunamantapas aswan mana allintaraqmi ruwarqankichis,+ kasukuwanaykichismantaqa sapankaykichismi millay k’ullu sonqoykichiswan aysachikurqankichis.+ 13 Chayraykun mana reqsisqaykichis suyuman, ñaupa taytaykichiskunaq mana reqsisqan suyuman wijch’usaykichis,+ chaypin mana reqsisqaykichis dioskunata tuta-p’unchay servinkichis,+ manan noqaqa yanapasaykichischu, nispa.
14 ”Jehová Diosmi nin: ¡Egiptomanta Israel llaqtata orqomuq,+ wiñaypaq kausaq Jehová Diospa sutinpin jurani!, nispa ninanku tukukapunan p’unchaymi chayamushanña. 15 Aswanmi ninqaku: ¡Wichay lado suyumanta, tukuy suyukunaman ch’eqechisqa kasqankumanta Israel llaqtata pusampuq, wiñaypaq kausaq Jehová Diospa sutinpin jurani!, nispa. Jallp’ankumanmi, ñaupa taytankuman qosqay jallp’amanmi kutichimpusaq,+ nispa.
16 ”Jehová Diosmi nin: Askha challwaqkunatan wajachimusaq,
chay challwaqkunan challwata jina paykunata jap’inqaku.
Askha animal jap’iqkunatan wajachimusaq,
chay animal jap’iqkunan orqokunapi, moqo patakunapi paykunata jap’inqaku,
qaqa k’ajtukunapin jap’inqaku.
17 Noqaqa tukuy ima ruwasqankutan rikushani.
Manan noqamantaqa pakakuyta atinkumanchu,
manan juchankutaqa ñawiymanta pakayta atinkumanchu.
18 Ñaupaqtaqa mana allin ruwasqankumantaraqmi, juchankumantaraqmi kutichipusaq.+
Paykunaqa mana kausayniyoq, mana valeq, millay idolonkunawanmi jallp’ayta qhellicharqanku,
ajllakusqay jallp’aytan millakunapaq kaqkunawan junt’achirqanku,+ nispa”.
19 Diosníy Jehová, kallpaymi kanki, pakakunaymi kanki,
sinchi llakikuy tiempopi pakakunaymi kanki.+
Qanmanmi kay pachaq k’uchunkunamantaraq nacionkuna jamusunkiku, jinaspan ninqaku:
“Ñaupa taytanchiskunaqa mana valeq yanqa dioskunamanmi jap’ipakurqanku,
yanqa kaqkunamanmi, mana imapaq valeq kaqkunamanmi jap’ipakurqanku”,+ nispa.
20 ¿Runari atinmanchu dioskuna ruwakuyta?
Ruwakunmanña chaypas, chaykunaqa manan dioschu.+
21 Diosmi nin: “Kunanmi reqsichisaykichis,
kunanmi kallpayoq, atiyniyoq kasqayta rikuchisaykichis,
yachankichismi sutiyqa Jehová Dios kasqanta”, nispa.