Isaías
6 Rey Uzías wañupusqan watapin+ Jehová Diosta rikurqani alto patapi tiyashaqta,+ trononpi tiyashaqta; p’achanpas jatunkaraymi kasqa, templomanraqmi junt’aykushasqa. 2 Paypa muyuriqninpitaq serafín angelkuna kashasqa, chay angelkunaqa sapankan soqta rafrayoq kasqaku; iskay rafranwanmi uyankuta pakakusqaku, iskay rafranwantaq chakinkuta pakakusqaku, iskay rafranwantaq phalashasqaku.
3 Chay angelkunan fuerte kunkawan ninakurqanku:
“Ch’uya, ch’uya, ch’uyan ejercitokunata kamachiq Jehová Diosqa.+
Paypa lliflli kayninqa jallp’antinpin junt’a kashan”, nispa.
4 Paykuna rimaqtinkuqa punkukunaq marconkunaraqmi kuyurirqan, wasimanpas q’osñin junt’aykurqan.+
5 Jinan nirqani: “¡Ay imaraqmi noqamanta kanqa!
¡Kunanqa wañusaqchá,
noqaqa manan ch’uyata rimaqchu kani,
llaqtamasiykunapas millay rimaqkunan kanku!+
¡Reytan rikuruni, ejercitokunata kamachiq Jehová Diostan rikuruni!”, nispa.
6 Jinan juj kaq serafín angelqa noqaq kasqayman phalamurqan; jujnin makinpin payqa sansata apamusqa.+ Altarmantan chay sansata sansa jap’inawan orqomusqa.+ 7 Chay sansatan simiyman tupaykachiwarqan, jinaspan niwarqan:
“Kay sansan simiykita tupaykun,
chaymi juchayki chinkachisqa kapun,
juchaykin perdonasqa kapun”, nispa.
8 Chayllamanmi Jehová Diosqa rimamurqan, paymi nimurqan: “¿Pitan kachasaq? ¿Pin noqanchismanta rimaq rinqa?”,+ nispa. Jinan noqaqa nirqani: “¡Kaypin kashani! ¡Noqata kachaway!”,+ nispa.
9 Paytaq niwarqan: “Phaway, chay runakunata nimuy:
Maytaña uyarishaspapas manan entiendenkichischu,
maytaña qhawashaspapas manan reparayta atinkichischu,+ nispa.
10 Chay runakunaq sonqonta rumiyachimuy,+
paykunaq ninrinta wisq’amuy,+
ñawinkutapas tapamuy,
chhaynapi ama uyarinankupaq,
ama rikunankupaq,
ama imatapas entiendenankupaq,
ama Diosmanpas kutirikunankupaq,
chhaynapi ama qhaliyachisqa kanankupaq”, nispa.+
11 Jinan noqaqa tapurqani: “¿Jayk’aqkama Jehová Diosníy?”, nispa.
Paytaq niwarqan: “Kay llaqtakuna thunisqa kanankama, urmaykunankama,
runakunapas chinkachisqa kanankama,
wasikunapas ch’in kanankama,
jallp’apas purun kanankama;+
12 runatapas Jehová Dios karuman apapunankama,+
jallp’apas yaqa llapan saqerparisqa kanankama.
13 ”Ichaqa chunka kaq parten qhepanqaraq, chaypas jujmantan ruphasqa kapunqa. Sach’ata wit’ukuqtinqa, roble sach’atapas wit’ukuqtinqa qhepanraqmi k’ullunqa, chay k’ullunmantan juj ch’uya miray wiñamunqa”, nispa.