Zacarías
1 Iskay wataña Darío kamachikushaqtinmi+ pusaq kaq killapi, Idopa nieton, Berekiaspa churin profeta Zacariasqa*+ Jehová Diosmanta kay simikunata chaskirqan: 2 “Jehová Diosmi taytaykichiskunapaq sinchita phiñakurqan.+
3 ”Chayrayku llaqta runakunata nimuy: Ejercitokunata kamachiq Jehová Diosmi* nin: Noqa ejercitokunata kamachiq Jehová Diosman kutirikamuwaychis, jinan noqapas qankunaman kutirimusaykichis,+ ninmi ejercitokunata kamachiq Jehová Dios.
4 ”Ama taytaykichiskuna jinaqa kaychischu, paykunatan ñaupa profetakunaqa nirqanku: Ejercitokunata kamachiq Jehová Diosmi nin: Mana allin kausayniykichista saqepuychis, mana allin ruwayniykichista wijch’upuychis,+ nispa.
”Paykunan ichaqa mana uyarikurqankuchu ni kasukurqankupaschu,+ ninmi Jehová Dios.
5 ”Kunanri, ¿maytaq chay taytaykichiskuna? ¿Wiñaypaqchu profetakunapas kausarqanku? 6 ¿Manachu taytaykichiskunaqa rikurqanku kamachiy profetakunawan willachisqay simikunaq junt’akusqanta?+ Chaymi paykunaqa noqaman kutirikamuwaspa nirqanku: Ejercitokunata kamachiq Jehová Diosqa imachus ruwasqanchisman jinan, imaynatachus kausasqanchisman jinan ruwawarqanchis, yuyaykusqanman jinapunin ruwawarqanchis,+ nispa”.
7 Darío iskay wataña kamachikushaqtinmi+ chunka jujniyoq sebat killapi* iskay chunka tawayoq p’unchaypi, Idopa nieton, Berekiaspa churin profeta Zacariasman Jehová Diosqa juj rijuriyta rikuchirqan.* 8 Tutan juj rijuriyta rikurqani, juj runan puka caballopi sillaykusqa wayq’opi sayashasqa, arrayán sach’a-sach’a ukhupi. Qhepanpitaq kashasqa puka caballokuna, ch’umpi caballokuna, yuraq caballokunapiwan.
9 Chaymi tapurqani: “Wiraqocháy, ¿pikunataq chay caballokunapi sillaykusqakunari?”, nispa.
Jinan noqawan rimashaq angelqa niwarqan: “Willasayki pikunachus kanku chayta”, nispa.
10 Arrayán sach’a-sach’a ukhupi sayashaq runataq nimurqan: “Paykunataqa Jehová Diosmi kachamurqan pachantinta qhawamunankupaq”, nispa. 11 Jinan paykunaqa arrayán sach’a-sach’a ukhupi sayashaq Jehová Diospa angelninta nirqanku: “Ñan pachantintaña qhawaramuyku, lliumi thajpi kausashanku”,+ nispa.
12 Chaymi Jehová Diospa angelninqa tapurqan: “Ejercitokunata kamachiq Jehová Diosníy, ¿jayk’aqkaman Jerusalén llaqtatapas Judá ayllupi kaq llaqtakunatapas mana khuyapayankichu?+ Qanchis chunka watakunan paykunawanqa phiñasqa kasharqanki”,+ nispa.
13 Jinan Jehová Diosqa noqawan rimashaq angelman sumaq simikunawan, kallpachaq simikunawan kutichimurqan. 14 Chaymi noqawan rimashaq angelqa niwarqan: “Kayta willamuy: Ejercitokunata kamachiq Jehová Diosmi nin: Jerusalentan, Siontan anchata sientespa defiendesaq, arí, tukuy sonqoywanmi defiendesaq.+ 15 Noqaqa sinchi phiñasqan kashani thajpi kausaq nacionkunawan.+ Llaqtaytaqa sumaqllatan castiganay karqan,+ chay nacionkunan ichaqa llaqtayta sinchita ñak’arichirqanku,+ nispa.
16 ”Chaymi Jehová Diosqa nin: Jerusalenmanmi khuyapayakuywan kutimusaq,+ wasiymi chaypi sayarichisqa kanqa,+ Jerusalenqa waskhawan medisqan kanqa,+ nispan nin ejercitokunata kamachiq Jehová Dios.
17 ”Chaymantapas kayta willamullaytaq: Ejercitokunata kamachiq Jehová Diosmi nin: Llaqtaykunaqa allin kaqkunawanmi jujmanta junt’a kallanqataq, Jehová Diosmi Sionta jujmanta kallpachanqa,+ Jerusalentapas jujmantan ajllakunqa,+ nispa”.
18 Chaymantataq juj rijuriypi tawa waqrakunata rikurqani.+ 19 Chaymi noqawan rimashaq angelta tapurqani: “¿Imataq chay waqrakunari?”, nispa. Angeltaq niwarqan: “Judata,+ Israelta,+ Jerusalenta+ ch’eqerichiq waqrakunan”, nispa.
20 Chaymantataq Jehová Diosqa tawa artesanokunata rikuchiwarqan. 21 Jinan tapurqani: “¿Ima ruwaqtaq paykunari jamushanku?”, nispa.
Paytaq niwarqan: “Kay waqrakunan Judá aylluta ch’eqerichirqanku manaña pipas umanta oqarinankama. Chaymi kay artesanokunaqa jamunqaku chay nacionkunata mancharichiq, waqrankutapas urmachiq. Chay nacionkunan waqrankuta oqarirqanku Judá ayllu runakunata ch’eqerichinankupaq”, nispa.